រដ្ឋបាលរបស់លោកដូណាល់ ត្រាំ បានទាក់ទងទៅកាន់ប្រទេសកូរ៉េខាងជើង ដើម្បីបន្តការចរចាផ្នែកការទូតឡើងវិញ ក្រោយពេលការចរចារបស់ប្រទេសទាំងពីរ បានជាប់គាំងតាំងពីខែតុលាមក។ នេះបើតាមការបញ្ជាក់របស់ទីប្រឹក្សាសន្តិសុខជាតិឈ្មោះ Robert O’Brien told Axios។
“ពួកយើងបានទាក់ទងទៅកាន់កូរ៉េខាងជើង និងប្រាប់អោយពួកគេដឹងថា ពួកយើងចង់បន្តការចរចា”។ នេះជាការបញ្ជាក់របស់លោកថ្លែងប្រាប់ប្រព័ន្ធផ្សព្វផ្សាយ។
លោកបន្ថែមទៀតថា “ពួកយើងបានប្រាប់ឲ្យពួកគេដឹងតាមរយៈប៉ុស្តិ៍ទូរទស្សន៍ជាច្រើនថា ពួកយើងចង់យកការចរចាត្រឡប់មកវិញ និងដើម្បីអនុវត្តការប្តេជ្ញាចិត្តរបស់ប្រធាន គីមក្នុងការរំសាយអាវុធនុយក្លេអ៊ែរនៅឧបទ្វីបកូរ៉េ”។
ការថ្លែងបែបនោះរបស់មន្រ្តីជាន់ខ្ពស់អាមេរិច កើតឡើងក្នុងខែជាមួយគ្នា ដែលមេដឹកនាំកូរ៉េខាងជើង គីម ជុងអ៊ុនបានលើកឡើងថា នឹងមិនមានការរំសាយនុយក្លេអ៊ែរឡើយនៅឧបទ្វីបកូរ៉េ ប្រសិនជាអាមេរិចនៅតែជំនះអនុវត្តគោលនយោបាយសត្រូវលើកូរ៉េខាងជើង។
សូមបញ្ជាក់ថា កិច្ចចរចារវាងអាមេរិច និងកូរ៉េខាងជើងលែងបន្តទៀតកាលពីឆ្នាំមុន នៅទីក្រុង Stockholm ប្រទេសស៊ុយអ៊ែត កន្លែងដែលមន្រ្តីអាមេរិចថ្លែងថា ពួកគេមានការចរចាយ៉ាងល្អ ខណៈអ្នកចរចាជាន់ខ្ពស់កូរ៉េខាងជើងបានបន្ទោសអាមេរិចថា ជាអ្នកធ្វើឲ្យកិច្ចចរចានោះបញ្ចប់។
អ្នកចរចាជាន់ខ្ពស់កូរ៉េខាងជើងថ្លែងថា ការបែកខ្ញែកនៃកិច្ចចរចាដោយគ្មានលទ្ធផលអ្វីនោះ គឺកើតឡើងទាំងស្រុង ដោយសារតែអាមេរិចមិនព្រមបោះបង់ទស្សនៈ និងអាកប្បកិរិយាចាស់កំរិតពួកគេ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN