ភ្នំពេញ៖ លោក មុត ចន្ថា នាយខុទ្ទកាល័យរបស់លោក កឹម សុខា នៅព្រឹកថ្ងៃទី១៣ ខែមករា ឆ្នាំ២០២០នេះ បានសរសេរពាក្យស្លោកទូន្មានចំនួនបី គឺលោកបានដាស់តឿនដល់ពួកយើងត្រូវធ្វើយ៉ាងចៀសវាងឲ្យបាននូវការប្រើប្រាស់កម្លាំងបាយ និងមធ្យោបាយហិង្សាជាដាច់ខាត ក្នុងការតស៊ូរបស់យើងតាមផ្លូវនយោបាយ។
សូមបញ្ជាក់ថា សាលាដំបូងរាជធានីភ្នំពេញប្រកាសថា នឹងបើកសវនាការជាសាធារណៈនៅសាលសវនាការទី១ ដើម្បីជំនុំជម្រះ លើសំណុំរឿងព្រហ្មទណ្ឌលោក កឹម សុខា ដែលជាប់ចោទពីបទសន្និដ្ឋិភាព ជាមួយបរទេស តាមមាត្រា៤៤៣ នៃក្រមព្រហ្មទណ្ឌ នៅថ្ងៃទី១៥ ខែមករា ឆ្នាំ២០២០។ ក្នុងសវនាការនោះ នឹងអនុញ្ញាតឲ្យអ្នកចូលស្តាប់ត្រឹមតែ ៣០នាក់ប៉ុណ្ណោះ។
លោក មុត ចន្ថា បានបញ្ជាក់ថា អហិង្សាគឺជាគោលការណ៍អចិន្រ្តៃយ៍។ យើងនៅចាំយ៉ាងច្បាស់នូវពាក្យទូន្មានរបស់លោកប្រធាន កឹម សុខា ក្នុងការតស៊ូតាមផ្លូវនយោបាយ គឺ៖ -សូមកុំយកក្បាលជល់ថ្ម -សូមកុំបង្កបញ្ហា និង-សូមដោះស្រាយបញ្ហាដោយសន្តិវិធី។
ពាក្យស្លោកទូន្មានទាំងបីនេះ គឺលោកបានដាស់តឿនដល់ពួកយើងត្រូវធ្វើយ៉ាងចៀសវាងឲ្យបាននូវការប្រើប្រាស់កម្លាំងបាយ និងមធ្យោបាយហិង្សាជាដាច់ខាត ក្នុងការតស៊ូរបស់យើងតាមផ្លូវនយោបាយ។ ការតស៊ូនយោបាយរបស់យើង គឺតាមរយៈគណបក្សនយោបាយស្របច្បាប់ ដើម្បីចូលរួមប្រកួតប្រជែងនៅក្នុងដំណើរការបោះឆ្នោតដោយសេរី ត្រឹមត្រូវ យុត្តិធម៌ និងប្រជាធិបតេយ្យ ហើយយើងត្រូវប្រកួតលើគោលនយោបាយ និងកម្មវិធីនយោបាយ ដោយមិនត្រូវប្រើប្រាស់ពាក្យពេជ្រជេរប្រមាថ លាបពណ៌ ចោទប្រកាន់ មួលបង្កាច់ និងរើសអើងជាតិសាសន៍ដែលបង្កជាបញ្ហា ជម្លោះ និងការឈឺចាប់។ សំខាន់ជាងនេះ ការដោះស្រាយបញ្ហាត្រូវធ្វើឡើងដោយសន្តិវិធី ហើយថាគ្មានបញ្ហាណាដែលអាចត្រូវដោះស្រាយបានដោយហិង្សាឡើយ។ លោកប្រធាន កឹម សុខា បានគូសបញ្ជាក់ថា “អំពើហិង្សានាំឲ្យជាតិ និងប្រជាពលរដ្ឋខ្មែរ គឺជាអ្នកចាញ់ និងជាអ្នកខាតបង់”។
លោកប្រធាន កឹម សុខា តែងតែអប់រំ និងផ្សព្វផ្សាយបណ្តុះស្មារតីឲ្យប្រជាពលរដ្ឋខ្មែរ មានសតិសម្បជញ្ជៈ ដើម្បីលុបបំបាត់អគតិបី គឺៈ “ខ្លាច ខ្លៅ ឃ្លាន” ដែលពួកខ្មែរក្រហមប្រល័យពូជសាសន៍ខ្លួនឯងបានបង្កើតឡើង ក្នុងរបបពិឃាតដ៏ឃោរឃៅ ព្រៃផ្សៃ និងអមនុស្សរបស់ខ្លួនរយៈពេលជាង ៣ឆ្នាំ។ ព្រះពុទ្ធព្រះបរមគ្រូនៃយើងបានប្រៀនប្រដៅថា ”បើសិនជាមនុស្សគ្មានសតិសម្បជញ្ញៈ គឺស្មើនិងសត្វ”។
រដ្ឋធម្មនុញ្ញ ឆ្នាំ១៩៩៣ នៃព្រះរាជាណាចក្រកម្ពុជាប្រកាន់យកគោលការណ៍ (របបនយោបាយ) ប្រជាធិបតេយ្យសេរី ពហុបក្ស។ អំណាចយោធាននិយម ឬអំណាចផ្តាច់ការនិយម ត្រូវបានលុបបំបាត់ នៅក្រោយការបោះឆ្នោតសភាធម្មនុញ្ញ នាខែឧសភា ឆ្នាំ១៩៩៣ និងនៅក្រោយការអនុម័តនិងការចូលជាធរមាននៃរដ្ឋធម្មនុញ្ញ នៅថ្ងៃទី២៤ ខែកញ្ញា ឆ្នាំ១៩៩៣។ លោកប្រធាន កឹម សុខា និងអ្នកនយោបាយខ្មែរផ្សេងទៀត ព្រមទាំងអ្នកដឹកខ្មែរ បានខិតខំអនុវត្តតាមស្មារតីរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ដើម្បីទប់ស្កាត់ការវិលត្រឡប់នៃអំណាចយោធានិយម អំណាចផ្តាច់ការ ជាពិសេសរបបប្រល័យពូជសាសន៍ មកកាន់ព្រះរាជាណាចក្រកម្ពុជាទី២ នៃយើង៕ដោយ៖កូឡាប