ភ្នំពេញ ៖អគ្គស្នងការដ្ឋាននគរបាលជាតិ បានផ្សព្វផ្សាយព័ត៌មាននៅថ្ងៃទី១៣មករានេះថា មេខ្លោងជួញដូរគ្រឿងញៀនជិត១០គីឡូក្រាម ២នាក់ ត្រូវកម្លាំង ជំនាញ នៃមន្ទីរប្រឆាំងបទល្មើសគ្រឿងញៀន(ក៤) ឃាត់ខ្លួន នៅចំណុចផ្ទះគ្មានលេខ ផ្លូវទំនប់កប់ស្រូវ ភូមិសំរោងក្រោម សង្កាត់សំរោង ខណ្ឌពោធិ៍សែនជ័យ រាជធានីភ្នំពេញ និងនៅចំណុចភូមិជ្រាវ ឃុំអមលាំង ស្រុកថ្ពង ខេត្តកំពង់ស្ពឺ កាលពីថ្ងៃទី១០ ខែមករា ឆ្នាំ២០២០ វេលាម៉ោង១៦និង៣០នាទី ។
ការឃាត់ខ្លួនមេខ្លោងទាំង២នាក់នេះ ធ្វើឡើងក្រោយទទួលបញ្ជាពី លោកនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, លោកនាយឧត្តមសេនីយ៍ ម៉ក់ ជីតូ អគ្គស្នងការរង និងលោក ឧត្តមសេនីយ៍ឯក ឡឹក វណ្ណៈ ប្រធានមន្ទីរប្រឆាំងគ្រឿងញៀន ក្រោមការសម្របសម្រួលពីតំណាងអយ្យការ និងដឹកនាំប្រតិបត្តិការផ្ទាល់ដោយ លោកឧត្តមសេនីយ៍ទោ ឃឹង សារ៉ាត់ នាយករងមន្ទីរប្រឆាំងគ្រឿងញៀន។
ជនសង្ស័យរួមមាន ៖១.ឈ្មោះ គឹម វ៉ា ភេទប្រុស កើតឆ្នាំ១៩៨៥ ជនជាតិខ្មែរ មុខរបរ ម៉ូតូកង់បីឥណ្ឌា។ ២. ឈ្មោះ កែវ សុធា ភេទប្រុស កើតឆ្នាំ១៩៩៥ ជនជាតិខ្មែរ មុខរបរ មិនពិតប្រាកដ។ វត្ថតាងចាប់យកបានរួមមាន សារធាតុញៀន មេតំហ្វេតាមីន(ICE) ទម្ងន់ 9គីឡូក្រាម 643.06ក្រាម រថយន្ត ២គ្រឿង ជញ្ជីងថ្លឹង ២ គ្រឿង និងទូរស័ព្ទ ២គ្រឿង ៕ដោយ៖បញ្ញាស័ក្តិ
