ភ្នំពេញ៖ លោកអ៊ូ ច័ន្ទរ័ត្ន អតីតអ្នកតំណាងរាស្រ្ត នៃអតីតគណបក្សប្រឆាំង នៅថ្ងៃទី១៣មករានេះ បានថ្លែងថា សវនាការករណីលោក កឹម សុខា ថ្ងៃទី១៥ មករា ២០២០ នេះ លោកមានការព្រួយបារម្ភ ក្នុងការចូលរួមសង្កេតការណ៍ និងគាំទ្រទឹកចិត្តដល់ការតស៊ូរបស់លោក ដោយវិធានការណ៍របស់អាជ្ញាធររាជរដ្ឋាភិបាល ហាក់ដូចជាលើសពីអ្វីដែលអាចកើតឡើង ដែលអាចក្លាយជាការរឹតត្បិត និងធ្វើឲ្យមានការភ័យខ្លាចដល់ប្រជាពលរដ្ឋ។
នៅផេកហ្វេសប៊ុក Chanrath Ou – អ៊ូ ច័ន្ទរ័ត្ន នាថ្ងៃទី១៣ មករា ២០២០ បានផ្សាយព័ត៌មានថា “សវនាការករណីលោកប្រធាន កឹម សុខា ថ្ងៃទី១៥ មករា ២០២០ នេះ ខ្ញុំមានការព្រួយបារម្ភ ក្នុងការចូលរួមសង្កេតការណ៍ និងគាំទ្រទឹកចិត្តដល់ការតស៊ូរបស់លោក។ ខ្ញុំបានឃើញការព្រួយបារម្មណ៍ និងវិធានការណ៍របស់អាជ្ញាធររាជរដ្ឋាភិបាល ហាក់ដូចជាលើសពីអ្វីដែលអាចកើតឡើង ដែលអាចក្លាយជាការរឹតត្បិត និងធ្វើឲ្យមានការភ័យខ្លាចដល់ប្រជាពលរដ្ឋ។ ខ្ញុំយល់ថានឹងប៉ះពាល់សិទ្ធិសេរីភាពប្រជាពលរដ្ឋ និងប៉ះពាល់ដល់រូបភាពសន្តិភាព ដែលជាមោទនភាពរបស់រាជរដ្ឋាភិបាល”។
លោកបានបន្តថា “ខ្ញុំសូមអំពាវនាវដល់អាជ្ញាធរមេត្តាមានការប្រយ័ត្នប្រយែង ក្នុងការអនុវត្តវិធានការណ៍ ចំពោះប្រជាពលរដ្ឋដោយអនុគ្រោះ និងសូមអំពាវនាវដល់បងប្អូនដែលចូលរួមគាំទ្រទឹកចិត្តលោកប្រធាន កឹម សុខា មេត្តារក្សាឲ្យបាននូវរបៀបរៀបរយ និងអហិង្សា”។
នៅថ្ងៃ១៥ មករា នេះ កងកម្លាំងមានសមត្ថកិច្ច នឹងដាក់ពង្រាយការពារសន្តិសុខ សណ្តាប់ធ្នាប់ជាច្រើននាក់ផងដែរ។
នាព្រឹកថ្ងៃចន្ទ ទី១៣ ខែមករា ឆ្នាំ២០២០នេះ រដ្ឋបាលរាជធានីភ្នំពេញបានបើកកិច្ចប្រជុំគណៈបញ្ជាការ ឯកភាពរដ្ឋបាលរាជធានីភ្នំពេញ ដោយមានការចូលរួមពី អភិបាល អភិបាលរងរាជធានីភ្នំពេញ ស្នងការនគរបាលរាជធានីភំ្នពេញ មេបញ្ជាការកងរាជអាវុធហត្ថរាជធានីភំ្នពេញ ព្រះរាជអាជ្ញា ប្រធានសាលាដំបូងរាជធានី មន្ទីរអង្គភាពជំនាញពាក់ព័ន្ធ និងរដ្ឋបាលខណ្ឌទាំង១៤ ដើម្បីត្រួតពិនិត្យ និងពង្រឹងកិច្ចការត្រួតពិនិត្យអាវុធជាតិផ្ទុះ ការបង្ក្រាបបទល្មើសល្បែងស៊ីសង គ្រឿងស្រវឹងគ្រឿងញៀនខុសច្បាប់ក្នុង រាជធានីភ្នំពេញ និងជាពិសេសកិច្ចការការពារសន្ដិសុខ សណ្ដាប់ធ្នាប់ និងរបៀបរៀបរយសាធារណៈជូនបងប្អូនប្រជាពលរដ្ឋក្នុងរាជធានីភ្នំពេញ។
ក្នុងកិច្ចប្រជុំនោះ លោកឃួង ស្រេង អភិបាលរាជធានីភ្នំពេញ បានជំរុញឲ្យអភិបាលខណ្ឌទំាង១៤ ពង្រឹងកិច្ចការពាររសន្តិសុខសណ្តាប់ធ្នាប់ នៅតាមមូលដ្ឋានរបស់ខ្លួន ដើម្បីធានាបានសុខសុវត្ថិភាព ជូនប្រជាពលរដ្ឋ និងភ្ញៀវបរទេសដែលស្នាក់នៅក្នុងរាជធានីភ្នំពេញ។
ក្នុងកិច្ចប្រជុំនោះ បានផ្តោតសំខាន់លើការកិច្ចការត្រួតពិនិត្យអាវុធជាតិផ្ទុះ ការបង្ក្រាបបទល្មើសល្បែងស៊ីសង គ្រឿងស្រវឹងគ្រឿងញៀនខុសច្បាប់ក្នុង រាជធានីភ្នំពេញ និងជាពិសេសកិច្ចការការពារសន្ដិសុខ សណ្ដាប់ធ្នាប់ និងរបៀបរៀបរយសាធារណៈជូនបងប្អូនប្រជាពលរដ្ឋក្នុងរាជធានីភ្នំពេញ។
លោកឃួង ស្រេង អភិបាលរាជធានីភ្នំពេញបានណែនាំឲ្យ អាជ្ញាធរខណ្ឌទាំង១៤ សមត្ថកិច្ចពាក់ព័ន្ធទាំងអស់នៅក្នុងរាជធានីភ្នំពេញ ត្រូវពង្រឹងទៅលើផ្នែកសន្តិសុខសណ្តាប់ធ្នាប់ ជូនប្រជាពលរដ្ឋឲ្យបានល្អបំផុត ការបង្ក្រាបល្បែងស៊ីសង និងការបង្ក្រាបទៅលើគ្រឿងញៀន ដែលជាបញ្ហាដ៏ធំដែលអាជ្ញាធរមានសមត្ថកិច្ច ត្រូវតែបង្ក្រាបឲ្យខាងតែបាន៕ដោយ៖កូឡាប