អ្នកទេសចរចំនួន ៦នាក់ត្រូវបានចាប់ខ្លួន បន្ទាប់ពីរងការចោទប្រកាន់ថា បានបំផ្លាញបេតិកភណ្ឌវប្បធម៌ ដោយពួកគេបានធ្វើការបន្ទោរបង់ (បត់ជើងធំ) នៅក្នុងប្រាសាទមួយនៃតំបន់ប្រវត្តិសាស្រ្ត Machu Picchu ស្ថិតក្នុងប្រទេសប៉េរូ។
ប៉ូលិសប្រចាំតំបន់ថ្លែងថា “អ្នកទេសចរ ៦នាក់កំពុងត្រូវបានឃុំខ្លួន និងធ្វើការស៊ើបអង្កេត ដោយក្រសួងសាធារណៈពីបទឧក្រិដ្ឋកម្មប្រឆាំងនឹងបេតិកភណ្ឌវប្បធម៌”។
អ្នកទេសចរទាំងនោះ ត្រូវបានចាប់ខ្លួនកាលពីថ្ងៃអាទិត្យកន្លងទៅនេះ ក្រោយពេលឆ្មាំឧទ្យាន និងប៉ូលីសបានឃើញពួកគេ ស្ថិតនៅតំបន់រឹតបណ្តឹង នៃប្រាសាទព្រះអាទិត្យ (Temple of Sun) ដែលជាតំបន់ដ៏សំខាន់នៃបន្ទាយ Inca។
លោកប៉ូលីសឈ្មោះ Wilbert Leyva បានថ្លែងថា អាជ្ញាធរបានប្រទះឃើញ បំណែកថ្មបាក់ដែលចេញពីជញ្ជាំង និងស្មានប្រេះនៅលើឥដ្ឋ។
អាជ្ញាធរវប្បធម៌បាននិយាយថា ពួកគេក៏បានឃើញលាមកផងដែរ នៅក្នុងប្រាសាទព្រះអាទិត្យ។
អ្នកទេសចរទាំងនោះ រួមមានជនជាតិបារាំងម្នាក់ ប្រេស៊ីល ២នាក់ អាហ្សង់ទីន ២នាក់ និងឈីលីម្នាក់។
ពួកគេប្រឈមនឹងការជាប់គុករយៈពេល ៤ឆ្នាំប្រសិនជារកឃើញកំហុសដូចការចោទប្រកាន់មែន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
