បុរសជនជាតិអូស្រ្តាលីម្នាក់ ត្រូបានអាជ្ញាធររកឃើញនៅមានជីវិតនៅឡើយ ក្រោយពេលបាត់ខ្លួនអស់រយៈពេល ៣សប្តាហ៍នៅក្នុងព្រៃដែលមានក្រពើរស់នៅច្រើន ស្ថិតនៅភាគខាងជើងប្រទេសអូស្រ្តាលី។ នេះបើតាមការបញ្ជាក់របស់ប៉ូលីសនៅថ្ងៃអង្គារនេះ។
បុរសរូបនោះមានឈ្មោះថា Milan Lemic។ យានយន្តរបស់គាត់បានជាប់ផុងក្នុងភក់ កាលពីថ្ងៃទី ២២ ខែធ្នូ ខណៈពេលធ្វើដំណើរក្នុងព្រៃ Daintree ស្ថិតក្នុងរដ្ឋ Queenland។
ដំបូងឡើយ ប៉ូលីសមានការព្រួយបារម្ភថា បុរសវ័យ ២៩ឆ្នាំរូបនោះ ត្រូវបានក្រពើស៊ីបាត់ទៅហើយ ដោយសារតែតំបន់នោះសម្បូរក្រពើរស់នៅច្រើន ប៉ុន្តែក្រោយពេលស្វែងរកអស់ជាច្រើនថ្ងៃ ពួកមិនឃើញមានក្រពើថាធំៗដែលនឹងអាចវាយប្រហារគាត់បាននោះទេ។
បុរសសំណាងរូបនោះ ត្រូវបានប្រទះឃើញដោយប៉ូលីសនៅថ្ងៃចន្ទម្សិលមិញនេះ ចម្ងាយ ៤ ទៅ ៥គីឡូម៉ែត្រពីយានយន្តដែលគាត់បោះបង់ចោល។
ប៉ូលីសនិយាយថា “គាត់នៅមានរាងកាយមាំមួនល្អដដែល។ គាត់រស់នៅបានដោយសារតែផ្លែឈើព្រៃ”៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia