ភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យា នៅថ្ងៃទី១៤មករានេះបានឲ្យដឹងថា កងកម្លាំងសមត្ថកិច្ច បានឃាត់ខ្លួនជនសង្ស័យម្នាក់ ដែលបង្ហោះលក់ឧបករណ៍នេសាទខុសច្បាប់ (ដុំឆក់ត្រី) នៅលើបណ្តាញសង្គម Facebook និង YouTube។
ក្រោយពីបានទទួលបទបញ្ជាពី លោកនាយឧត្តមសេនីយ៍ អគ្គស្នងការនគរបាលជាតិ កាលពីថ្ងៃទី ១១ ខែមករា ឆ្នាំ ២០២០ សមត្ថកិច្ចនគរបាលនៃនាយកដ្ឋានប្រឆាំងបទល្មើសបច្ចេកវិទ្យា បានធ្វើការស្រាវជ្រាវរកជនសង្ស័យ ដែលបានប្រើប្រាស់បណ្ដាញសង្គម Facebook និង YouTube ដើម្បីផ្សព្វផ្សាយ ផលិតនិងលក់ឧបករណ៍នេសាទខុសច្បាប់ តាមសំណើស្នើសុំពីប្រតិភូរាជរដ្ឋាភិបាល ទទួលបន្ទុកអគ្គរដ្ឋបាលជលផល នៃក្រសួងកសិកម្មរុក្ខាប្រមាញ់ និង នេសាទ។
ជាលទ្ធផលនៃការស្រាវជ្រាវ នាយកដ្ឋានប្រឆាំងបទល្មើសបច្ចេកវិទ្យា បានឃាត់ខ្លួនជនសង្ស័យម្នាក់ឈ្មោះ ង្វៀន យ៉ាំងតេវ ភេទប្រុសអាយុ ៣១ឆ្នាំ ជាជនជាតិវៀតណាម នៅចំណុចមុខផ្ទះជួលគ្មានលេខ ផ្លូវជាតិលេខ ០១ ភូមិស្ដៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល ដោយរឹបអូសបានឧបករណ៍ឆក់ត្រីដែលបានកែច្នៃរួចចំនួន០២គ្រឿងជាប់នឹងខ្លួន។
បន្ទាប់មក កម្លាំងរបស់នាយកដ្ឋាន បានសហការជាមួយ ស្នងការដ្ឋានខេត្តកណ្តាល និង សមត្ថកិច្ចមូលដ្ឋាន ព្រមទាំងមានការសម្របសម្រួល ដឹកនាំដោយលោក ទិន សុចិត្រា ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល បានធ្វើការត្រួតពិនិត្យឆែកឆេរផ្ទះជនសង្ស័យ និងរកឃើញឧបករណ៍ឆក់ត្រីដែលកែច្នៃរួចចំនួន ៩ គ្រឿងទៀត។
គួរបញ្ជាក់ផងដែរថា កន្លងមកថ្មីៗនេះជនសង្ស័យបានបង្ហោះផ្សព្វផ្សាយ លក់ឧបករណ៍ឆក់ត្រីកែច្នៃ ដែលមានប្រសិទ្ធភាពខ្ពស់តាមរយៈបណ្ដាញសង្គម Facebook និង YouTube ដែលធ្វើឱ្យមានការរិះគន់ជាខ្លាំង នៅតាមបណ្ដាញសង្គម។ ដោយឃើញបែបនេះ លោក ប្រតិភូរាជរដ្ឋាភិបាលទទួលបន្ទុក អគ្គរដ្ឋបាលជលផល បានស្នើសុំឱ្យមន្ត្រីជំនាញរបស់នាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការនគរបាលជាតិ ជួយស្រាវជ្រាវនឹងស្វែងរកជនសង្ស័យមកផ្តន្ទាទោស ព្រោះការប្រើប្រាស់ឧបករណ៍ឆក់ ដើម្បីនេសាទត្រី ជាបទល្មើសព្រហ្មទណ្ឌ ដែលបានចែងនៅក្នុងច្បាប់ជលផល ម្យ៉ាងទៀតការប្រើប្រាស់ឧបករណ៍ឆក់ ដើម្បីនេសាទត្រីមានលក្ខណៈបំផ្លាញធនធានមច្ឆាជាតិ យ៉ាងធ្ងន់ធ្ងរបំផុត។ នៅព្រឹកថ្ងៃទី១៣ ខែមករាឆ្នាំ ២០២០ ជនសង្ស័យត្រូវបានបញ្ជូន ទៅតុលាការខេត្តកណ្ដាល ដើម្បី ចាត់វិធានការតាមផ្លូវច្បាប់៕ដោយ៖កូឡាប
