ភ្នំពេញ ៖ បុរសម្នាក់បានសម្លាប់សង្សាររបស់ខ្លួននៅនឹងក្នុងបន្ទប់ជួល ក្រោយមកជនសង្ស័យបាន យកកូនកាំបិតអារកសម្លាប់ខ្លួនឯងតាមក្រោយ ប៉ុន្តែមិនស្លាប់។ ហេតុការណ៍ភ្ញាក់ផ្អើលនេះ បានកើតឡើងនៅវេលាម៉ោង ៨ព្រឹក ថ្ងៃទី១៤ ខែមករា ឆ្នាំ២០២០ ដែលស្ថិតនៅក្នុងបន្ទប់ជួលលេខ៧ ជិតផ្សារបឹងសាឡាង ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
ជនដៃដល់មានឈ្មោះ ហ៊យ ផល្លា ហៅតាចេក ភេទប្រុស អាយុ ២៦ឆ្នាំ មុខរបរ កម្មកររោងចក្រ ស្នាក់បន្ទប់ជួលជាមួយជនរងគ្រោះ និងមានស្រុកកំណើតនៅឃុំធ្លាប្រជុំ ស្រុកកោះអណ្តែត ខេត្តតាកែវ។ ចំណែកឯនារីរងគ្រោះឈ្មោះ សុខ ស៊ឹម ហៅអាពៅ ភេទស្រី អាយុ ជាង២០ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួលលេខ៧ ភូមិបឹងសាឡាង សង្កាត់ឫស្សីកែវ រាជធានីភ្នំពេញ និងមានស្រុកកំណើតភូមិឧត្តម ឃុំឧត្តម ស្រុកពាមជរ ខេត្តព្រៃវែង។
នៅមុនពេលកើតហេតុ គឺជនរងគ្រោះ និងប្អូនស្រីជីដូនមួយ ព្រមទាំងជនដៃដល់ជាសង្សារ បានស្នាក់នៅក្នុងបន្ទប់ជួលលេខ៧ ជាមួយគ្នា។ លុះដល់ព្រឹកថ្ងៃទី១៤ ខែមករា ឆ្នាំ ២០២០ វេលាម៉ោង ៧ព្រឹក ប្អូនស្រីជីដូនមួយរបស់នារីរងគ្រោះ បានចេញទៅធ្វើការ ស្រាប់តែពេលនោះ មិនឃើញបងស្រីរបស់ខ្លួនមកធ្វើការដែរ ក៏បានទូរស័ព្ទទៅប្រាប់ក្រុមគ្រួសាររបស់បងស្រីរងគ្រោះឲ្យមកពិនិត្យមើលនៅក្នុងបន្ទប់ជួល។
ក្រោយមកប្អូនស្រីជីដូនមួយក៏បានចេញពីរោងចក្រមកកាន់បន្ទប់ស្នាក់នៅនេះវិញ ស្រាប់តែឃើញបន្ទប់បានចាក់សោទ្វាខាងក្នុង។ ភ្លាមៗនោះប្អូនស្រីជីដូនមួយ ក៏បានស្រែកហៅអ្នកជិតខាងឲ្យជួយ រួចក៏មានបុរសម្នាក់ដែលជាអ្នករត់ម៉ូតូឌុប ដែលរស់នៅជិតខាងគ្នា ក៏បានទាញឈើមួយដុំ ដើម្បីមកវាយទ្វារបន្ទប់ជួល ស្រាប់តែពេលនោះ ក៏ឃើញជនរងគ្រោះដេក នៅក្បែរជនសង្ស័យ ដោយឃើញជនសង្ស័យបាន អារកសម្លាប់ខ្លួនឯង។
ជនរងគ្រោះ ត្រូវក្រុមគ្រួសារយកតាមម៉ូតូរ៉ឺម៉កកង់បី យកទៅសង្គ្រោះបន្ទាន់នៅមន្ទីរពេទ្យកាល់ម៉ែត តែនារីរងគ្រោះបានស្លាប់បាត់ទៅហើយ។ ចំណែកឯជនសង្ស័យក៏បានដឹកយកទៅសង្គ្រោះបន្ទាន់នៅឯមន្ទីរពេទ្យកាល់ម៉ែត ។ ស្ថានភាពរបស់ជនសង្ស័យរបួសធ្ងន់ធ្ងរ៕ ដោយ៖កូឡាប