ភ្នំពេញ៖ ក្រសួងមហាផ្ទៃ បើកកិច្ចប្រជុំក្រុមការងាររៀបចំតាក់តែងសេចក្តីព្រាងច្បាប់ស្តីពីការប្រឆាំងការផ្តល់ហិរញ្ញប្បទានដល់រីកសាយភាយអាវុធប្រល័យលោក។
នៅទីស្តីការក្រសួងមហាផ្ទៃ នារសៀលថ្ងៃអង្គារ ទី១៤ ខែមករា ឆ្នាំ២០២០ ក្រសួងមហាផ្ទៃ បើកកិច្ចប្រជុំក្រុមការងាររៀបចំតាក់តែងសេចក្តីព្រាងច្បាប់ស្តីពីការប្រឆាំងការផ្តល់ហិរញ្ញប្បទានដល់រីកសាយភាយអាវុធប្រល័យលោក (អាវុធមហាប្រល័យ) ក្រោមអធិបតីភាព លោកងី ច័ន្ទ្រផល រដ្ឋលេខាធិការ ក្រសួងមហាផ្ទៃ ដោយមានការចូលរួមពី រដ្ឋលេខាធិការក្រសួងមហាផ្ទៃ រដ្ឋលេខាធិការ អនុរដ្ឋលេខាធិការនៃក្រសួង ស្ថាប័ននានា អគ្គលេខាធិការដ្ឋានក្រសួងមហាផ្ទៃ អគ្គនាយក នៃអគ្គនាយកដ្ឋាននានា ប្រធាន អនុប្រធាននាយកដ្ឋាននានា អគ្គស្នងការរងនៃអគ្គស្នងការដ្ឋាននគរបាលជាតិ ព្រមទាំងអង្គភាព ស្ថាប័នពាក់ព័ន្ធជាច្រើនផងដែរ។
ក្នុងឱកាសនោះ លោកងី ច័ន្ទ្រផល បានមានប្រសាសន៍ថា កិច្ចប្រជុំនារសៀលនេះ គឺដើម្បីពិនិត្យ កែសម្រួល និងស្រងមតិយោបល់ពាក់ព័ន្ធនានាពីបណ្តាក្រុមការងារ និងអង្គប្រជុំទាំងមូលសម្រាប់ជាធាតុចូលក្នុងការរៀបចំតាក់តែងសេចក្តីព្រាងច្បាប់ស្តីពីការប្រឆាំងការផ្តល់ហិរញ្ញប្បទានដល់រីកសាយភាយអាវុធប្រល័យលោក (អាវុធមហាប្រល័យ)នេះ ហើយក៏និងរៀបចំការងារមួយចំនួនដើម្បីដាក់ជូនក្រុមការងារធ្វើការសិក្សារៀបចំធ្វើយ៉ាងណាឲ្យច្បាប់មួយនេះសមស្របលើការអនុវត្ត។ ជាងនេះទៀត លោក បានជម្រុញឲ្យក្រុមការងារទាំងអស់ខិតខំពន្លឿនការរៀបចំសេចក្តីព្រាងច្បាប់នេះឲ្យបានចប់យ៉ាងឆាប់បំផុតនាពេលខាងមុខ។
សូមជម្រាបថា៖ ច្បាប់នេះមានគោលបំណងដាក់ចេញវិធានការប្រឆាំងការផ្តល់ហិរញ្ញប្បទានដល់ការរីកសាយភាយអាវុធប្រល័យលោក (អាវុធមហាប្រល័យ) ព្រមទាំងរៀបចំ និងអនុវត្តវិធានការទាំងនោះ។ លើសពីនេះទៀត ច្បាប់នេះ និងអនុក្រឹត្យទាំងឡាយសម្រាប់អនុវត្តច្បាប់នេះ ត្រូវប្រើប្រាស់ដើម្បីទប់ស្កាត់ និងគ្រប់គ្រងការផ្តល់ហិរញ្ញប្បទានដល់ការរីកសាយភាពអាវុធប្រល័យលោក (អាវុធមហាប្រល័យ)៕ ដោយ៖កូឡាប
