ភ្នំពេញ៖ឡានកាមរីហាយប្រ៊ីត១គ្រឿង ដោយម្ចាស់ឡានបើកបរលឿនដូចហោះ មិនប្រយ័ត្នជ្រុលចង្កូតបុកក្បាលនាគពុះចែកផ្លូវ បណ្ដាលឲ្យខ្ទាតចេញពីជួរមួយកង់ ចំណែក២កង់ទៀត រងការខូចខាត។ ហើយឡានក្រឡាប់អូសរាប់សិបម៉ែត្រ តែមិនមានមនុស្សរងរបួស។
ករណីនេះបានកើតឡើងកាលពីម៉ោងទៀបភ្លឺ ថ្ងៃទី១៥ ខែមករា ឆ្នាំ២០២០ នៅលើកំណាត់មហាវិថីម៉ៅសេទុង កែងនិងផ្លូវ១៩៣ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ។
សាក្សីនៅកន្លែងកើតហេតុនិយាយថា មុនពេលកើតហេតុខាងលើនោះ គេបានឃើញបុរសម្នាក់បើកឡាន កាមរីហាយប្រ៊ីត ពណ៌ស ពាក់ផ្លាកលេខភ្នំពេញ2BE 7632 និងមានបុរស២នាក់ទៀតរួមដំណើរជាមួយ ធ្វើដំណើរតាមមហាវិថីម៉ៅសេទុង ក្នុងទិសដៅ ពីត្បូងទៅជើង ក្នុងល្បឿនល្បឿន ដូចហោះ។ លុះមកដល់ចំណុចកើតហេតុ ក៏ជ្រុលចង្កូតទៅបុកនិងក្បាលនាគពុះចែកផ្លូវពេញទំហឹង បណ្តាលឲ្យខ្ទាតចេញពីជួរមួយកង់ចំណែក២កង់ទៀត រងការខូចខាតហើយឡានបង្កបានក្រឡាប់ផ្ងាជើង ទ្រមេឃ ខ្ទាតអូសរាបសិបម៉ែត្រ តែមិនមានមនុស្សរងរបួស។
ក្រោយពេលកើតហេតុ ឃើញមានកម្លាំងសមត្ថកិច្ចមូលដ្ឋាន និងជំនាញចរាចរណ៍ខណ្ឌបានចុះទៅកន្លែងកើតហេតុ រួចហើយក៏ហៅរថយន្តមកស្ទួចយករថយន្តមកទៅ រក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕ដោយ៖កូឡាប
