ប្រទេសអ៊ីរ៉ងបាននិយាយថា ខ្លួនបានធ្វើការចាប់ខ្លួនមនុស្សម្នាក់ដែលបានថតវីដេអូ បង្ហាញពីយន្តហោះអ៊ុយក្រែន ត្រូវបាញ់ទម្លាក់ដោយមីស៊ីល។
ជនដែលត្រូវចាប់ខ្លួននោះនឹងប្រឈមនឹងការចោទប្រកាន់ ពាក់ព័ទ្ធទៅនឹងសន្តិសុខជាតិ។
ជើងយន្តហោះ Flight PS752 ត្រូវបានបាញ់ទម្លាក់កាលពីថ្ងៃពុធសប្តាហ៍មុន ភ្លាមៗក្រោយពេលវាបានហោះចេញពីទីក្រុងតេអេរ៉ង បណ្តាលឲ្យស្លាប់មនុស្សចំនួន ១៧៦នាក់។
ក្រោយពេលមានសោកនាដកម្មនេះកើតឡើង មេដឹកនាំអ៊ីរ៉ងបានប្រកាសសុំទោស ដោយលើកឡើងថា យន្តហោះនោះត្រូវបានបាញ់ទម្លាក់ដោយអចេតនា និងបានប្រកាសចាប់ខ្លួនមនុស្សជាច្រើននាក់ ពាក់ព័ន្ធនឹងហេតុការណ៍នោះ។
ប្រធានាធិបតីអ៊ីរ៉ង លោក Hassan Rouhani បានថ្លែងថា ការស៊ើបអង្កេតនឹងត្រូវគ្រប់គ្រងដោយតុលាការពិសេស។
លោកថ្លែងថា “នេះនឹងមិនមែនជាករណីធម្មតាដូចមុនៗឡើយ។ ពិភពលោកទាំងមូលនឹងតាមដានតុលាការនេះ”។
មេដឹកនាំអ៊ីរ៉ងរូបនោះក៏បានសង្កត់ធ្ងន់ថា សោកនាដកម្មនោះកើតឡើងមិនមែនដោយសារតែមនុស្សម្នាក់នោះទេ ប៉ុន្តែវាកើតឡើងដោយសារតែមានភាគីខ្លះទៀត ដែលក្នុងន័យនេះគឺចង់សំដៅទៅដល់អាមេរិច។
សូមបញ្ជាក់ថា ការធ្លាក់យន្តហោះអ៊ុយក្រែន កើតឡើងនៅពេលដែលអ៊ីរ៉ងបានធ្វើការបាញ់មីស៊ីលទៅលើមូលដ្ឋានទ័ពអាមេរិច នៅក្នុងប្រទេសអ៊ីរ៉ង ដើម្បីជាការសងសឹកចំពោះការសម្លាប់មេបញ្ជាការរបស់ខ្លួនឈ្មោះ Soleimani៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC