ភ្នំពេញ៖ នៅលើបណ្ដាញសង្គមហ្វេសប៊ុក នៅថ្ងៃទី១៥ខែមករា ឆ្នាំ២០២០នេះ កំពុងល្បីខ្លាំងទៅលើសមត្ថកិច្ចប៉ូលិសម្នាក់ ដែលលេងល្បិចដាក់ថ្នាំញៀនក្នុងហោប៉ៅខោ យុវជនម្នាក់ ក្រោយពីធ្វើការឆែកឆេររួចមក។ ប៉ុន្តែករណីនេះ ស្នងការដ្ឋាននគរបាលរាជធានីភ្នំពេញ បានចេញសេចក្តីបំភ្លឺថា រូបភាពព៌ណស តូចនោះ មិនមែនជាគ្រឿងញៀន នោះទេ វាគឺជាដែកកេះរបស់ជនសង្ស័យដែលមានព៌ណស។ ហើយវីដេអូនេះ កើតឡើងតាំងពីឆ្នាំ២០១៨ មកម្ល៉េះ ប៉ុន្តែក្រុមបណ្តាញសង្គម មកផុសឡើងវិញ។
សូមបញ្ជាក់ថា តាមវីដេអូដែលបានបង្ហោះនោះ គេឃើញថាប៉ូលិសម្នាក់បានឃាត់ខ្លួនយុវជនម្នាក់ ដើម្បី ឆែកឆេរគ្រប់កន្លែងទាំងអស់។ ក្រោយពីឆែកឆេរទាំងក្នុងលីអូមក ស្រាប់តែគេឃើញប៉ូលិសនោះបានយករបស់ម្យ៉ាង (សង្ស័យថាកញ្ចប់ថ្នាំញៀន) ទៅដាក់ក្នុងហោប៉ាវយុវជននោះ ហើយក៏វាយខ្នោះដៃរូបគេតែម្ដង។
នៅរសៀលថ្ងៃទី១៥មករានេះ សេចក្តីបកស្រាយបំភ្លឺ របស់ក្រុមព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ដោយបានបញ្ជាក់ថា អធិការដ្ឋាននគរបាលខណ្ឌជ្រោយចង្វា សូមធ្វើការបញ្ជាក់ជូនសាធារណជនឲ្យបានជ្រាបថា រូបភាពព៌ណស តូចនោះ មិនមែនជាគ្រឿងញៀន នោះទេ វាគឺជាដែកកេះរបស់ជនសង្ស័យដែលមានព៌ណស ។
ស្នងការដ្ឋាននគរបាលរាជធានីភ្នំពេញ បានបញ្ជាក់ថា ដោយមាន Facebook Account និង Facebook Page មួយចំនួន បានយកព័ត៌មានចាស់ក្នុងពេល ដែលសមត្ថកិច្ចចម្រុះ នៃអធិការដ្ឋាននគរបាលខណ្ឌជ្រោយចង្វា ចុះរឹតបន្តឹងច្បាប់ចរាចរណ៍តាំងពីថ្ងៃទី១២ ខែមីនា ឆ្នាំ២០១៨ ក្នុងពេលនោះជនសង្ស័យ២នាក់ បានជិះម៉ូតូជិតមកដល់គោលដៅត្រួតពិនិត្យ ក៏បានជិះគេចខ្លួន ដោយមានការសង្ស័យនៅពេលនោះ កម្លាំងអន្តរាគមន៍នៃអធិការខណ្ឌ បានដេញចាប់បានរួចធ្វើការឆែកឆេរ និងនាំយកទៅពិនិត្យទឹកនោមដើម្បីស្វែងរកសារធាតុញៀន ជាលទ្ធផលគឺពិតជាមានសារធាតុញៀនមែន ។ Account and Page មួយចំនួនបានយកព័ត៌មាននេះ មកចុះផ្សាយខុសពីការពិត និងមានលក្ខណៈបំផុសបំផុល ញុះញង់ឲ្យមានការស្អប់មកលើកងកម្លាំងនគរបាល ស្របពេលដែលមួយពេលរយៈចុងក្រោយនេះ សមត្ថកិច្ចនៃស្នងការដ្ឋាននគរបាលរាជធានីភ្នំពេញ ក៏ដូចជាតាមបណ្តាខណ្ឌ ប៉ុស្តិ៍ តែងតែទទួលបានការគាំទ្រ និងសរសើរពីសំណាក់ប្រជាពលរដ្ឋ ៕ដោយ៖កូឡាប