ខេត្តស្វាយរៀង៖ប្រជាពលរដ្ឋចំនួន០៦គ្រួសារនៅភូមិព្រៃស្ទៀង និងភូមិបុស្សឃុំស្វាយតាយាន ស្រុកកំពង់រោទ៌មានការព្រួយបារម្មណ៍ខ្លាចបាក់ដីស្រែរបស់ពួកគាត់ ចូលទៅក្នុងរណ្តៅដីដែលក្រុមអាជីវកម្មជីកយកអាចម៍ដីលក់គឺជីរណ្តៅជ្រៅ ហើយចោទគ្មានជើងទេ និងទុកច្រាំងរណ្តៅតូចត្រឹមតែ២,៥០ម៉ែត្រទៅ៣ម៉ែត្រ ខុសកិច្ចសន្យាក្នុងអាជីវកម្ម គឺទុកច្រាំង៥ម៉ែត្រ ទើបប្រជាពលរដ្ឋដែលមានដីស្រែជាប់មាត់រណ្តៅមានការព្រួយបារម្មណ៍ខ្លាចបាក់ដីស្រែរបស់ពួកគាត់ ចូលទៅក្នុងរណ្តៅដីនោះ។ ករណីប្រជាពលរដ្ឋព្រួយបារម្មណ៍នេះកើតឡើង កាលពីរសៀលថ្ងៃទី១៤មករា២០២០។
បើតាមស្ត្រីឈ្មោះពៅធីតា អាយុ៤៥ឆ្នាំជា ជនពិការជើងទាំងពីរ រស់នៅភូមិបុស្ស ឃុំស្វាយតាយាន បានប្រាប់អ្នកសារព័ត៌មានថា គាត់ជាជនពិការរស់នៅម្នាក់ឯង មានដីស្រែកន្លះហិកតា ធ្វើស្រែនិងចិញ្ចឹមមាន់ទាគ្រាន់ និងចិញ្ចឹមជីវិតប្រចាំថ្ងៃ
ហើយក្នុងខែមករា២០២០នេះ គាត់ព្រួយបារម្មណ៍យ៉ាងខ្លាំង ដេកមិនលក់ដោយមានក្រុមហ៊ុនជីកអាចម៍ដីលក់មកជីករណ្តៅជាប់ដីស្រែ របស់គាត់ គឺជីកជ្រៅ ហើយទុកច្រាំងតូច និងជីកចោទចុះក្រោមអត់ជីកជើងទេ ទើបភ័យខ្លាចបាក់ដីស្រែចូលក្នុងរណ្តៅដី។ ស្ត្រីពិការរូបនេះ ក៏បានសុំអំពាវនាវសូមឲ្យអាជ្ញាធរគ្រប់លំដាប់ថ្នាក់ចុះពិនិត្យ និងដោះស្រាយឲ្យពួកគាត់ដោយអនុគ្រោះ។
ដោយឡែកស្ត្រីឈ្មោះពៅ យ៉ង់ អាយុ៥៨ឆ្នាំ នៅភូមិបុស្សនោះដែរ ក៏បាននិយាយទាំងអួលដើមក ថា ម្ចាស់អជីវកម្មជីកយកអាចម៍ដីលក់នេះ ជីកជ្រៅៗណាស់ គាត់ព្រួយបារម្មណ៍ខ្លាចបាក់ដីស្រែ ចូលក្នុងរណ្តៅនោះ ដោយដីស្រែពួកគាត់មានបន្តិចបន្តួចគ្រាន់ធ្វើស្រែផ្គត់ផ្គង់ជីវភាព ហើយបើបាក់ដីស្រែចូលក្នុងរណ្តៅដីមែន គឺគ្មានសង្ឃឹមអ្វីទេ។
ចំណែកឈ្មោះព្រំ សាវី ភេទស្រី អាយុ៥៣ឆ្នាំ នៅភូមិព្រៃស្ទៀង ឃុំស្វាយតាយាន ស្រុកកំពង់រោទ៌ បានមានប្រសាសន៍ថា នៅភូមិព្រៃស្ទៀង គឺប៉ះពាល់ដីស្រែប្រជាពលរដ្ឋចំនួន៥គ្រួសារ ទី១,រូបគាត់ព្រំ សាវី ប៉ះពាល់ដីខាងកើតរណ្តៅចំនួន៦០ម៉ែត្រ ទី២ឈ្មោះមាស រ៉ុន ភេទប្រុស អាយុ៥៨ឆ្នាំ ប៉ះពាល់ក្បាលដី២០ម៉ែត្រ ទី៣ឈ្មោះភ័គ្រ ភេទប្រុស អាយុ៥៦ឆ្នាំ ប៉ះពាល់ក្បាលដី៣០ម៉ែត្រ ទី៤ ឈ្មោះ តា ប៉ាន់ ភេទប្រុស អាយុ៦៣ឆ្នាំ ប៉ះពាល់ក្បាលដី៥០ម៉ែត្រ និងទី៥ឈ្មោះតា ឡន ភេទប្រុស អាយុ៦៥ឆ្នាំ ប៉ះពាល់ក្បាលដី៤០ម៉ែត្រ។
ប្រភពដដែលបន្តទៀតថា ដោយដីពួកគាត់នៅឆ្ងាយពីផ្ទះ ជាប់ព្រំប្រទល់ភូមិបុស្សពួគាត់ ធ្លាប់បានប្តឹងទៅលោកមេភូមិព្រៃស្ទៀង ឲ្យចុះទៅពិនិត្យមើល និងដោះស្រាយមុនមិនទាន់ មានការបាក់ដីស្រែរបស់ពួកគាត់ក៏ប៉ុន្តែពុំឃើញមានកោះហៅទៅដោះស្រាយ ទើបពួកគាត់សុំឲ្យអ្នកសារព័ត៌មាន ចុះផ្សាយឲ្យថ្នាក់ដឹកនាំខេត្តនិងថ្នាក់ជាតិ បានដឹងនិងដោះស្រាយ។
ទាក់ទិនករណីប្រជាពលរដ្ឋព្រួយបារម្មណ៍នេះដែរ លោកពៅ រាក់ ម្ចាស់អាជីវកម្មជីករណ្តៅយកអាចម៍ដីលក់បានប្រាប់អ្នកសារព័ត៌មានយើងថា លោកមានច្បាប់អនុញ្ញាតធ្វើអាជីវកម្ម ពីលោកប្រធានមន្ទីររ៉ែនិងឋាមពលខេត្តស្វាយរៀងគឺ រណ្តៅមានទំហំ៧០ម៉ែត្រ ជីកជម្រៅ៥ម៉ែត្រនិងទុកមាត់ច្រាំង៥ម៉ែត្រ ហើយមកដល់ថ្ងៃទី១៤មករានេះ ទើបតែជីកបានជម្រៅ៣ម៉ែត្រទៅ៤ម៉ែត្រទេ មិនទាន់គ្រប់ចំនួនក្នុងច្បាប់អនុញ្ញាតទេ ក៏ប៉ុន្តែប្រជាពលរដ្ឋដែលមានដីក្បែររណ្តៅដីចេះ តែព្រួយបារម្មណ៍។ ហើយប្រសិនបើខែវស្សាមានបាក់ដីស្រែរបស់ប្រជាពលរដ្ឋ ចូលក្នុងរណ្តៅដីនោះ ក្រុមហ៊ុននិងធ្វើកិច្ចសន្យាសងសំណងកាខូចខាតទាំងអស់។
លោកប៉ុក តក ប្រធានមន្ទីររ៉ែនិងថាមពលខេត្តស្វាយរៀង មានប្រសាសន៍ថា បើប្រជាពលរដ្ឋព្រួយបារម្មណ៍ ឬកើតទុក្ខមិនសុខចិត្ត សូមឲ្យដាក់ពាក្យបណ្តឹងមកមន្ទីររ៉ែនិងថាមពលខេត្តស្វាយរៀង លោកនិងទទួលពិនិត្យ និងចាត់មន្ត្រីឲ្យចុះទៅពិនិត្យ ដោះស្រាយដល់ទីតាំងកើតហេតុ។
មហាជនបានលើកឡើងថា នៅចុងឆ្នាំ២០១៩ និងដើមខែមករា២០២០នេះ មានក្រុមហ៊ុនធ្វើអាជីវកម្មជីករណ្តៅដីយកអាចម៍ដីលក់នេះ ច្រើនកន្លែងហើយបង្កឲ្យហុយដីប៉ះពាល់ ដល់សុខភាពប្រជាពលរដ្ឋរស់នៅតាមដងផ្លូវដោយរថយន្តដឹកដីដាក់លើសទ្រុង អត់គ្របធ្វើឲ្យហុយធូលីដីចូលផ្ទះប្រជាពលរដ្ឋ និងជ្រុះដីតាមផ្លូវនិងខូចផ្លូវលំជនបទផងដែរ សូមឲ្យអាជ្ញាធរពិនិត្យមើលផងទាន៕ ដោយ៖វ៉ៃកូ
