មនុស្សយ៉ាងហោចណាស់ចំនួន ៧៧នាក់បានស្លាប់ និង ៩៤នាក់រងរបួស ក្រោយផ្ទាំងទឹកកកបានបាក់សង្កត់ផ្ទះជាច្រើន នៅក្នុងប្រទេសប៉ាគីស្ថាន។
ហេតុការណ៍បាក់ផ្ទាំងទឹកកកកើតឡើង ដោយសារតែការធ្លាក់ព្រិលខ្លាំងនៅក្នុងស្រុក Neelum Valley ស្ថិតក្នុងតំបន់ Kashmir ដែលគ្រប់គ្រងដោយប៉ាគីស្ថាន។ នេះបើតាមការបញ្ជាក់របស់អាជ្ញាធរប្រចាំតំបន់។
ផ្ទះជាច្រើនខ្នង ត្រូវបានបំផ្លាញ និងកប់ដោយផ្ទាំងទឹកកក ហើយជនរងគ្រោះភាគច្រើនបានស្លាប់ និងរបួសនៅក្នុងផ្ទះពួកគេ។
ចំនួនអ្នកស្លាប់អាចនឹងកើនឡើង ខណៈដែលមានការព្រួយបារម្ភថា មានមនុស្សជាច្រើនកំពុងជាប់នៅក្រោមទឹកកក។
ការធ្លាក់ព្រិលខ្លាំងគឺជារឿងធម្មតានៅក្នុងប្រទេសប៉ាគីស្ថាន ក្នុងរដូវនេះ។ នេះបើតាមការបញ្ជាក់របស់ប្រធានមជ្ឈមណ្ឌលព្យាករណ៍អាកាសធាតុជាតិ ប៉ុន្តែលោកលើកឡើងដោយ នៅឆ្នាំនេះអាកាសធាតុត្រជាក់ខ្លាំងជាងឆ្នាំមុន ដោយសារតែបញ្ហាការប្រែប្រួលអាកាសធាតុ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN