ខេត្តស្វាយរៀង៖ ដើម្បីជីវភាពក្នុងគ្រួសារបុរសម្នាក់ ខំឡើងដើមត្នោតទាំងខ្លួនឈឺសង្ស័យងងឹតមុខធ្លាក់ពីលើដើមត្នោត កម្ពស់១០ម៉ែត្រ បានបណ្តាលឱ្យស្លាប់ចោលប្រពន្ធ និងកូន គ្មានអឡោះអាល័យ។
ហេតុការណ៍នេះបាន កើតឡើងកាលពីវេលាម៉ោង៤និង៤ ៥នាទីរសៀលថ្ងៃទី១៤ ខែមករា ឆ្នាំ២០២០ នៅចំណុចភូមិព្រែខ្ជាយ ឃុំកំពង់ត្រាច ស្រុករមាសហែក ខេត្តស្វាយរៀង។
បើយោងតាមសមត្ថកិច្ចបានឲ្យដឹងថា៖ ជនរងគ្រោះ ដែលធ្លាក់ពីលើដើមត្នោតនោះមានឈ្មោះ អ៊ុំ ចយ អាយុ ៥៨ ឆ្នាំ មុខរបរឡើងត្នោតរស់ នៅភូមិឃុំខាងលើ។
ប្រភពបន្តទៀតថា៖ ក្រុមគ្រួសារខាងលើនេះ មានជីវភាពក្រីក្រខ្វះខាតរកព្រឹកខ្វះល្ងាច ហើយមានតែមុខរបរឡើងត្នោត ដើម្បីចិញ្ចឹមជីវិតនិងប្រពន្ធកូន។
ប្រភពឱ្យដឹងបន្តថា៖ មុនកើតហេតុបុរសរងគ្រោះនេះ បានដើរ ចេញពីផ្ទះមកដាក់ទឹកត្នោត ដូចសព្វរាល់ដងដែល នៅខាងជើងផ្ទះចម្ងាយ១២ម៉ែត្រ លុះប្រមាណកន្លះម៉ោង ស្រាប់តែជនរងគ្រោះសង្ស័យ ងងឹតមុខមុខធ្លាក់ពីលើចុង ត្នោតកម្ពស់ប្រមាណជាង១០ម៉ែត្រ មកដី បង្កការភ្ញាក់ផ្អើលដល់អ្នកភូមិ និងក្រុមគ្រួសារតែម្ដង។
បច្ចុប្បន្នសពត្រូវបានសមត្ថកិច្ច ប្រគល់ឲ្យក្រុមគ្រួសារយកមកធ្វើបុណ្យ តាមប្រពៃណីទាំងក្ដុកក្ដួលបំផុត ៕ដោយ៖ វ៉ៃកូ