ខេត្តស្វាយរៀងៈលោក ជុំ ហាត ប្រធានក្រុមប្រឹក្សាខេត្ត ស្វាយរៀងនៅព្រឹកថ្ងៃទី១៦ មករា ឆ្នាំ២០២០នេះបានអញ្ជើញជាអធិបតី នៅក្នុងកិច្ចប្រជុំវិសាមញ្ញលើកទី១ ឆ្នាំទី១ អាណត្តិទី៣ របស់ក្រុមប្រឹក្សាខេត្តដែលបានប្រព្រឹត្តទៅ នៅសាលប្រជុំសាលាខេត្តស្វាយរៀង ។
ពិធីនេះក៏មានការអញ្ជើញចូលរួមពីលោក លោកស្រីជាសមាជិកក្រុមប្រឹក្សាខេត្ត លោក លោកស្រីប្រធាន អនុប្រធានមន្ទីរនានា និងលោក លោកស្រីនាយកទីចាត់ការទាំង៥របស់សាលាខេត្តស្វាយរៀងជាច្រើនរូបទៀត។
កិច្ចប្រជុំនេះផ្តោតសំខាន់ទៅលើសេចក្តីព្រាងរបៀបវារៈដូចជា ១- ការអនុម័តសេចក្តីព្រាងផែនការអភិវឌ្ឍន៍រយៈពេល៥ឆ្នាំ (២០២០-២០២៤) និងកម្មវិធីវិនិយោគបីឆ្នាំរំកិល (២០២០-២០២២) របស់ខេត្តស្វាយរៀង។ ២- សេចក្តីផ្សេងៗ។
ក្រុមប្រឹក្សាខេត្ត អាណត្តិទី៣ មានចក្ខុវិស័យរួមចំណែកជាមួយរាជរដ្ឋាភិបាលកម្ពុជា គឺការកសាងរដ្ឋបាលឯកភាពមួយដែលរឹងមាំ រក្សានូវបានសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គម មានការអភិវឌ្ឍប្រកបដោយចីរភាព និងសមធម៌ ជាមួយនឹងការប្រកាន់ខ្ជាប់យ៉ាងម៉ឺងម៉ាត់នូវគោលការណ៍ លទ្ធិប្រជាធិបតេយ្យ សេរីពហុបក្ស គោរពសិទ្ធិ និងសេចក្តីថ្លៃថ្នូររបស់មនុស្ស ជាសង្គមមួយដែលមានកោសិការផ្សារភ្ជាប់គ្នា និងត្រូវបានពង្រឹងដើម្បីធានាថាប្រជាជនក្នុងខេត្តស្វាយរៀង មានចំណេះដឹងខ្ពស់ មានសុខភាពល្អ មានជីវភាពសមរម្យ និងមានការរស់នៅប្រកបដោយសុខដុមរមនា ទាំងក្នុងរង្វង់គ្រួសារ ទាំងសហគមន៍ និងទាំងសង្គមជាតិទាំងមូល៕ដោយ៖ វ៉ៃកូ