ខេត្តបន្ទាយមានជ័យ៖អគ្គស្នងការដ្ឋាននគរបាលជាតិ បានផ្សាយព័ត៌មានថា លោកនាយករងសាកលវិទ្យាល័យគ្រប់គ្រង និងសេដ្ឋកិច្ច(UME) សាខាខេត្តបន្ទាយមានជ័យ បានស្លាប់ភ្លាមៗ ក្នុងហេតុការណ៍គ្រោះថ្នាក់ចរាចរណ៍ កើតឡើងនៅវេលាម៉ោងង១០និង១០នាទីយប់ ថ្ងៃទី១៥ ខែមករា ឆ្នាំ២០២០ នៅលើកំណាត់ផ្លូវជាតិលេខ៦ ត្រង់ចំណុចស្ពានទី៤ ក្រៅទីប្រជុំជនស្ថិតក្នុង ភូមិកំព្រីង សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ទោ សួន នីប៉ូ នាយរងការិយាល័យនគរបាលចរាចរណ៍ផ្លូវគោក នៃស្នងការដ្ឋានខេត្តបន្ទាយមានជ័យ បានឲ្យដឹងថា ៖ ករណីគ្រោះថ្នាក់ចរាចរណ៍កើតឡើងរវាងរថយន្តម៉ាកតូយូតាកាម៉ារី(បាឡែន)ពាក់ផ្លាកលេខ ភ្នំពេញ 2X-3613 បើកបរក្នុងទិសដៅពីទិសកើតទៅលិច បុកប៉ះរថយន្តធុនធំ មិនស្គាល់ម៉ាក ពីក្រោយក្នុងទិសដៅ ស្របទិសគ្នា បណ្តាល ឲ្យអ្នកបើកបរម្នាក់ បានស្លាប់បន្ទាប់ពីខ្ទាតចេញពីរថយន្ត ហើយរថយន្តខូចខាតធ្ងន់ធ្ងរ ។ ចំណែកឯរថយន្តធុនធំនោះមិនស្គាល់ភិនស្គាល់ភិនភាគ បើករត់គេចបាត់ តែសមត្ថកិច្ចនគរបាលបាននិងកំពុងស្រាវជ្រាវ ។
នាយរងការិយាល័យនគរបាលចរាចរណ៍ បានបន្តថា៖ មូលហេតុនៃគ្រោះថ្នាក់នោះ មកពីអ្នកបើកបររថយន្តតូច បើកបរល្បឿនលឿនខ្វះការប្រុងប្រយ័ត្ន ហើយសង្ស័យស្ថិតក្រោមឥទ្ធិពលនៃគ្រឿងស្រវឹង ។
អ្នកស្រីពែក សុភួង នាយិកាវិទ្យាល័យ អូរអំបិលក្រុងសិរីសោភ័ណ បានឲ្យដឹងថា ៖ ជនរងគ្រោះនោះ គឺស្វាមីរបស់អ្នកស្រី លោកសាស្ត្រាចារ្យ សំ សុខា អាយុ៥០ឆ្នាំ បង្រៀននៅវិទ្យាល័យជប់វារី ស្រុកព្រះនេត្រព្រះ និងធ្វើការក្រៅម៉ោងរដ្ឋជានាយករងសាកលវិទ្យាល័យគ្រប់គ្រងនិងសេដ្ឋកិច្ច(UME) សាខាខេត្តបន្ទាយមានជ័យ។ មុនពេលកើតហេតុស្វាមីរបស់អ្នកស្រី បានមកបង្រៀននៅវិទ្យាល័យជប់វារី ហើយចូលរួមកម្មវិធីមិត្តភក្តិ លុះពេលយប់ក៏ត្រឡប់មកគេហដ្ឋានវិញ ហើយជួបគ្រោះថ្នាក់ដូច្នេះ ។ ភរិយា បងប្អូន សាច់ញាតិមិត្ត មិត្តរួមអាជីព សិស្ស និស្សិត មន្ត្រីអប់រំ និងអាជ្ញាធរមានសមត្ថកិច្ចចាត់ទុកមរណភាពលោកសាស្ត្រាចារ្យសំ សុខា ជាបាត់បង់អ្នកជាតិស្រឡាញ់ និងធនធានមនុស្សដ៏ល្អប្រពៃម្នាក់ ។ បច្ចុប្បន្នសពត្រូវបានរៀបចំធ្វើបុណ្យនៅគេដ្ឋាន ស្ថិតក្នុងភូមិ សង្កាត់អូរអំបិល ក្រុងសិរីសោភ័ណ ៕ដោយ៖បញ្ញាស័ក្តិ