ប្រធានាធិបតីអ៊ីរ៉ង លោក Hassan Rouhani បាននិយាយនៅថ្ងៃសុក្រនេះថា រូបលោកចង់បញ្ចៀសង្រ្គាម ក្រោយពេលក្រុងតេហេរ៉ង និងវ៉ាស៊ីនតោនទំនងហាក់ ស្ថិតនៅមាត់ជ្រោះនៃសង្រ្គាមកាលពីដើមខែមករានេះ។
មុនពេលបោះឆ្នោតសភាមកដល់នៅថ្ងៃទី ២១ ខែកុម្ភៈខាងមុខ មេដឹកនាំរូបនោះបានថ្លែងថា ការចរចាជាមួយនឹងពិភពលោកនៅតែអាចកើតមាន។
លោកនិយាយថា “រដ្ឋាភិបាលកំពុងធ្វើកិច្ចការរាល់ថ្ងៃ ដើម្បីបង្ការការប្រឈមមុខដាក់គ្នាផ្នែកយោធា ឬសង្រ្គាម”។
កាលពីដើមខែនេះ តំបន់មជ្ឈិមបូព៌ាស្ថិតក្នុងស្ថានភាពប្រុងជើងកាង ក្រោយពេលសហរដ្ឋអាមេរិច បានវាយប្រហារតាមដ្រូន ដើម្បីសម្លាប់មេដឹកនាំយោធាកំពូលរបស់អ៊ីរ៉ងឈ្មោះ Qasem Soleimani។
ក្រោយសម្លាប់ឧត្តមសេនីយ៍ Qasem Soleimani អ៊ីរ៉ងបានធ្វើការសងសឹកដោយបានបាញ់មីស៊ីលជាច្រើនគ្រាប់ ស្រោចទៅលើមូលដ្ឋានទ័ពអាមេរិច នៅអ៊ីរ៉ាក់។
អ្វីដែលធ្វើឲ្យអ៊ីរ៉ងរងសម្ពាធកាន់តែខ្លាំងនោះគឺ មីស៊ីលរបស់ខ្លួនបានបាញ់ចំយន្តហោះអ៊ុយក្រែន បណ្តាលឲ្យមនុស្សទាំងអស់ចំនួន ១៧៦នាក់ស្លាប់បាត់បង់ជីវិត ដែលអ្នកដំណើរភាគច្រើនជាជនជាតិអ៊ីរ៉ង និងកាណាដា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia