ខេត្តកោះកុង៖ សមត្ថកិច្ចមូលដ្ឋាន បានប្រាប់ថា មានដ្រូនមួយគ្រឿងមានលេខសម្គាល់ 1701002 ធ្លាក់នៅក្នុងភូមិសាស្ត្រ ភូមិស្មាច់ ឃុំកោះស្តេច ស្រុកគិរីសាគរ ខេត្តកោះកុង ដែលប្រទះឃើញនៅព្រឹកថ្ងៃ១៧ ខែមករា ឆ្នាំ២០២០ ។
រហូតមកទល់ពេលនេះ សមត្ថកិច្ចកំពុងធ្វើការហ៊ុមព័ទ្ធ ដោយមិនទាន់មានអ្នកណាហ៊ានប៉ះពាល់នៅឡើយទេ រង់ចាំចារកម្មពីខាងរាជធានីភ្នំពេញមកពិនិត្យ។
លោកសុខ ចេង មេឃុំកោះស្ដេច បានបញ្ជាក់ប្រាប់ថា រហូតមកដល់ម៉ោង១២ថ្ងៃត្រង់ ថ្ងៃទី១៧ ខែមករា ឆ្នាំ២០២០នេះ សមត្ថកិច្ចកំពុងធ្វើការហ៊ុមព័ទ្ធយាមកាមនៅកន្លែង ដែលដ្រូនធ្លាក់នោះ មិនទាន់មានអ្នកណាហ៊ានប៉ះពាល់នោះឡើយ រង់ចាំចារកម្មពីខាងក្រសួងចុះមកត្រួតពិនិត្យសិន។
លោកមេឃុំ បញ្ជាក់ថា ការធ្លាក់ ស្ថិតនៅលើដីវាល ដូច្នេះពុំមានការប៉ះពាល់ដល់អាយុជីវិតមនុស្សឡើយ ហើយដ្រូននេះធំណាស់ ដោយស្លាបមានប្រវែង៩ម៉ែត្រ (សងខាង) បណ្ដោយប្រហែង៤ម៉ែត្រជាង ។ ដ្រូននេះ ពុំមានបំពាក់អាវុធ ឬគ្រាប់ អ្វីនោះទេ ហើយបើតាមការសន្និដ្ឋានក្រៅផ្លូវការ វាអាចមកដើម្បីស៊ើបការណ៍ ចាប់យកទិដ្ឋភាពតំបន់នេះ មានអ្វីខ្លះប៉ុណ្ណោះ។
ពាក់ព័ន្ធនឹងករណីនេះ លោកឧត្តមសេនីយ៍ទោ សំ ឃិតវៀន ស្នងការនគរបាលខេត្តកោះកុង បានបញ្ជាក់ប្រាប់ថា ករណីនេះសមត្ថកិច្ចកំពុងធ្វើការស្រាវជ្រាវ និងពិនិត្យមើលជាក់ស្ដែងថាតើវាជាកម្មសិទ្ធិរបស់អ្នកណា។
លោកឧត្តមសេនីយ៍ទោ សំ ឃិតវៀន បានបញ្ជាក់បន្ថែមថា នៅតំបន់នោះមានក្រុមហ៊ុនមួយឈ្មោះ ញូញៀន ក៏ប៉ុន្ដែយ៉ាងណានោះគឺរង់ចាំសមត្ថកិច្ចជំនាញដែលមកពីក្រសួងមហាផ្ទៃ សហការជាមួយខាងខេត្ត និងភាគីពាក់ព័ន្ធ ចុះពិនិត្យមើលស្រាវជ្រាវយន្ដហោះដ្រូនដែលធ្លាក់នេះ ជាកម្មសិទ្ធិរបស់អ្នកណាគេ។
ស្នងការនគរបាលខេត្តកោះកុង បានបញ្ជាក់ថា យន្ដហោះដ្រូននេះបានធ្លាក់នៅចំកណ្ដាលព្រៃ មិនបណ្ដាលឲ្យប៉ះពាល់ដល់មនុស្ស ឬសត្វឡើយ៕ដោយ៖កូឡាប
