ភ្នំពេញ៖ តាមរយៈ វីដេអូ ២ នេះ សមត្ថកិច្ចមិនត្រូវយោគយល់ ឬ លើកលែងឲ្យ យុវតីពាលទាំងនោះជាដាច់ខាត ។ គួរតែបញ្ជូនយុវតីពាលទាំងនោះទៅ តុលាការចាត់ការតាមច្បាប់ ។នេះបើតាមការបញ្ជាក់របស់លោកផែង វណ្ណៈនៅថ្ងៃទី១៧មករានេះ។
សាហាវហួស សិស្សស្រីទំនើងប្រើហឹង្សាលើសិស្សស្រីនៅវិទ្យាល័យផ្សារដើមថ្កូវត្រូវចាប់ខ្លួន។
មានការភ្ញាក់ផ្អើលមួយនៅថ្ងៃទី ១៦ ខែ មករា ឆ្នាំ ២០២០ នេះ បន្ទាប់ពី បាន ឃើញ វីដេអូ សិស្សសាលា មួយក្រុម ភាគច្រើនជាសិស្សស្រី បានព្រួតគ្នា ប្រើហឹង្សា លើសិស្សស្រីម្នាក់យ៉ាងព្រៃផ្សៃបំផុត ។
បន្ទាប់ពី បែកធ្លាយ វីដេអូ នេះភ្លាម សមត្ថកិច្ច នគរបាលខណ្ឌចំការមន បានស្រាវជ្រាវរកឃើញថា ករណីនេះ បានកើតឡើងនៅ វិទ្យាល័យ ផ្សារដើមថ្កូវ តាំងពីថ្ងៃទី ២៥ ខែ ធ្នូ ឆ្នាំ ២០១៩ មកម្ល៉េះ ។
ពាក់ព័ន្ធ នឹងអំពើហឹង្សានេះ យុវតីទំនើង ៤នាក់ ត្រូវបានសមត្ថកិច្ច ចាប់ឃាត់ខ្លួន បញ្ជូនមកអធិការដ្ឋាននគរបាល ខណ្ឌចំការមន ដើម្បី សាកសួរ ។
លោក កែវ សុធា ព្រះរាជ អាជ្ញា អមសាលាដំបូង រាជធានីភ្នំពេញ បានឲ្យដឹងថា ករណីនេះ លោកបានឲ្យសមត្ថកិច្ច ពិនិត្យចាត់ការ តាមច្បាប់ ។
សមត្ថកិច្ចមូលដ្ឋាន នៅថ្ងៃទី១៦ ខែមករា ឆ្នាំ២០២០នេះ បានឃាត់ ខ្លួនសិស្សស្រីទំនើង ៤នាក់ យកទៅសួរនាំ និងចាត់វិធានការតាមផ្លូវច្បាប់ បន្ទាប់ពីពួកគេ វាយទាត់ធាក់ និង ជេរប្រមាថ ដល់សិស្សស្រីម្នាក់ នៅវិទ្យាល័យផ្សារដើមថ្កូវ ខណ្ឌចំការមន រាជធានីភ្នំពេញ។
នៅរសៀលថ្ងៃទី១៦ ខែមករា ឆ្នាំ២០២០នេះ ប្រជាពលរដ្ឋ និងក្រុមគ្រួសារក្មេងស្រីរងគ្រោះ បានដឹកដៃកូនមកស្នើសុំនគរបាលជួយអន្តរាគមន៍ និងឃាត់ក្មេងស្រីពាលបង្កហេតុ ដើម្បីយកមកសាកសួរនាំពីហេតុការណ៍កើតឡើង នៅវិទ្យាល័យផ្សារដើមថ្កូវ ក្នុងសង្កាត់ផ្សារដើមថ្កូវ ខណ្ឌចំការមន។
បើតាមសមត្ថកិច្ច ជនរងគ្រោះរៀនថ្នាក់ទី៨ ឈ្មោះ ស្រ៊ុន កែវមរកត អាយុ ១៦ឆ្នាំ ស្នាក់នៅសង្កាត់ផ្សារដើមថ្កូវ ផ្លូវ៣៤៣០។ ចំណែកក្រុមជនបង្កមានគ្នា ៤នាក់ រៀនថ្នាក់ទី៩ម្នាក់ ដោយហៅបក្ខពួកពីខាងក្រៅស្រីវិទ្យាល័យផ្សេងចំនួន ៣ទៀត មកវាយលើជនរងគ្រោះថែមទៀត។
យោងតាមក្រុមគ្រួសារអ្នករងគ្រោះ បានឲ្យដឹងថា ករណីហិង្សានេះ កើតឡើងកាលពីរសៀល ថ្ងៃទី២៥ ខែធ្នូ ឆ្នាំ២០១៩ នៅក្នុងវិទ្យាល័យផ្សារដើមថ្កូវ។ បន្ទាប់ វាយដំលើរាងកាយ ដោយប្រើជើង ធាក់ខ្លួន និងចំក្បាលរួចមក ក្រុមជនបង្កបានគំរាម ដល់ជនរងគ្រោះថែមទៀត។ ចំណែកជនរងគ្រោះមិនបានទៅរៀនទេ ព្រោះខ្លួនប្រាណជ្រាំពេញខ្លួនប្រាណទាំងអស់។
បើតាមម្តាយយុវតីរងគ្រោះបានអះអាងថា គាត់មិនបានដាក់ពាក្យបណ្តឹងនៅឡើយទេ ទើបតែរសៀលថ្ងៃទី១៦ ខែមករា ឆ្នាំ២០២០ ឃើញមានរូបភាព បង្ហោះតាមសង្គមហ្វេសប៊ុក ហើយបានដឹងថា កូនគាត់មានកូនសិស្សស្រីដូចគ្នា ចោមរោម វាយយ៉ាងចាស់ដៃ។ ម្តាយរូបនេះ បានបន្តថា ក្រោយមក ក៏នគរបាលប៉ុស្តិ៍ផ្សារដើមថ្កូវ បានអន្តរាគមន៍ និងស្វែងរកតាមសកម្មភាព ហិង្សាតាមវីដេអូឃ្លីប និងនាំក្មេងស្រីសិស្សសាលាចំនួន៤នាក់។ ម្តាយយុវតីរងគ្រោះ មិនចង់ឲ្យនគរបាលដាក់ ទោសទណ្ឌលើក្មេងបង្កហិង្សាមកលើកូនគាត់ទេ គ្រាន់តែចង់ឲ្យអប់រំ និងឪពុកម្ដាយមកធានា កុំឲ្យប្រើហិង្សាមកលើក្មេងស្រីដទៃទៀត។
ដោយឡែកក្មេងស្រីជនដៃដល់ទាំងបួន ត្រូវបានបញ្ជូនទៅស្នងការនគរបាលរាជធានីភ្នំពេញហើយ និងរង់ចាំចំណាត់ការបន្ត តើថាតុលាការនឹងចោទប្រកាន់ ឬយ៉ាងណា?
ដោយឡែកនៅថ្ងៃនេះស្រាប់តែលេចចេញវីដេអូថ្មីមួយទៀតពីសកម្មភាពដដែល ដោយក្មេងស្រីទាំងនោះបានព្រួតវាយធ្វើបាបជេរប្រមាថយុវតីម្នាក់នោះ យ៉ាងសាហាវ។
នេះជាលើកទី២ ហើយដែលក្មេងស្រីទំនើង ធ្វើសកម្មភាព គួរឲ្យស្អប់ខ្ពើមនៅក្នុងសង្គម បន្ទាប់ពីករណីទី១ បានកើតឡើងនៅស្រុក មេសាង ខេត្តព្រៃវែង ៕
