គ្រួសាររបស់ជនរងគ្រោះកាណាដា ដែលបានស្លាប់ក្នុងគ្រោះថ្នាក់យន្តហោះនៅក្នុងប្រទេសអ៊ីរ៉ង នឹងទទួលបានប្រាក់ឧបត្ថម្ភចំនួន ២៥.០០០ដុល្លារក្នុងមួយគ្រួសារ ពីរដ្ឋាភិបាល ដើម្បីជួយដោះស្រាយតម្រូវការបន្ទាន់ពួកគេ។ នេះបើតាមការបញ្ជាក់របស់នាយករដ្ឋមន្រ្តីកាណាដា លោក Justin Trudeau កាលពីថ្ងៃសុក្រម្សិលមិញ។
លោកថ្លែងថា ប្រាប់ឧបត្ថម្ភ ដែលនឹងចំណាយលើពិធីបុណ្យសព និងការធ្វើដំណើរ នឹងទៅដល់គ្រួសារជនរងគ្រោះក្នុងរយៈពេលប៉ុន្មានថ្ងៃខាងមុខនេះ។
លោកថ្លែងប្រាប់អ្នកសារព័ត៌មានថា “ខ្ញុំសូមបញ្ជាក់ឲ្យច្បាស់ថាៈ ពួកយើងរំពឹងថា អ៊ីរ៉ងនឹងផ្តល់ប្រាក់សំណងទៅដល់គ្រួសារជនរងគ្រោះ។ ប៉ុន្តែខ្ញុំបានជួបពួកគេ (គ្រួសារជនរងគ្រោះ) ពួកគេមិនអាចចាំជាច្រើនសប្តាហ៍ទៀតទេ។ ពួកគេត្រូវការការជួយគាំទ្រភ្លាមៗ”។
ការប្រកាសផ្តល់ប្រាក់ឧបត្ថម្ភ កើតឡើងក្រោយពេលអ៊ីរ៉ងបានទទួលស្គាល់កាលពីសប្តាហ៍មុនថា យោធារបស់ខ្លួនបានបាញ់ទម្លាក់យន្តហោះអ៊ុយក្រែនដោយអចេតនា ក្រោយពេលវាហោះឡើងភ្លាមៗចេពីព្រលាន Imam Khomeini ក្បែររដ្ឋធានីតេហេរ៉ង។
សូមបញ្ជាក់ថា ការធ្លាក់យន្តហោះកាលពីថ្ងៃទី ៨ ខែមករានេះ បណ្តាលឲ្យមនុស្សចំនួន ១៧៦នាក់ស្លាប់ទាំងអស់។ ក្នុងចំណោមអ្នកស្លាប់ មានប្រជាពលរដ្ឋកាណាដាចំនួន ៥៧ ចំណែកពលរដ្ឋអ៊ីរ៉ងមានច្រើនជាងគេ រហូតដល់ជាង ៨០នាក់។
ការបាញ់ធ្លាក់យន្តហោះដោយអចេនា កើតឡើងតែប៉ុន្មានម៉ោងប៉ុណ្ណោះ ក្រោយពេលយោធាអ៊ីរ៉ងបានធ្វើការបាញ់មីស៊ីលស្រោចទៅលើមូលដ្ឋានទ័ពអាមេរិចនៅអ៊ីរ៉ាក់ ដើម្បីជាការសងសឹកដល់ការសម្លាប់ឧត្តមសេនីយ៍របស់ខ្លួនឈ្មោះ Qasem Soleimani៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN