ខេត្តស្វាយរៀងៈលោក ម៉ែន វិបុល អភិបាលខេត្តស្វាយរៀង អមដំណើរដោយលោកនាយកទីចាត់ការហិរញ្ញវត្ថុសាលាខេត្ត លោកប្រធានមន្ទីរ-អង្គភាពជំនាញ ពាក់ព័ន្ធនាថ្ងៃទី១៧ ខែមករា ឆ្នាំ២០២០នេះ បានអញ្ជើញចុះពិនិត្យការស្ថាបនាច្រាំងទន្លេវ៉ៃគោ (ទំនប់តាណេង) បន្ថែម ផ្នែកខាងជើង នឹងផ្នែកខាងត្បូង ក្នុងនោះចាក់ពង្រីកនូវច្រាំងទន្លេតាមបណ្តោយផ្លូវជាតិលេខ១ ភ្ជាប់ពីច្រាំងផ្នែកខាងលិចទៅកើតដល់គល់ស្ពានហាយវេ មានប្រវែង២២០ម៉ែត្រ និងផ្នែកខាងត្បូងចាប់ពីច្រាំងខាងលិចដល់គល់ស្ពានតាហោ។
ក្រោមការដឹកនាំក្នុងអាណត្តិរបស់លោក ម៉ែន វិបុល អភិបាលខេត្ត លោកបានកសាងនូវសមិទ្ធផលធំៗជាច្រើន សម្រាប់កូនចៅជំនាន់ក្រោយ ហើយច្រាំងទន្លេនេះ និងមានការរៀបចំក្រាលការ៉ូឡា សួនច្បារសាធារណៈ ការបំពាក់នូវសម្ភារហាត់ប្រាណ ការរៀបចំឲ្យមានចំណតរថយន្តសម្រាប់ភ្ញៀវទេសចរណ៍ជាដើម។
សម្រាប់ទីតាំងជាប់របងវិទ្យាល័យស្វាយរៀង ផ្នែកខាងជើងជាប់ផ្លូវជាតិលេខ១ ក្នុងពេលឆាប់ៗខាងមុខនេះ និងរៀបចំចាក់ដីបំពេញ ដើម្បីសម្រួលដល់ការធ្វើដំណើររបស់សិស្សានុសិស្សពេលចេញពីសាលា ក៏ដូចជាការកែលម្អសោភ័ណភាពនៅទីនោះ។ សមិទ្ធផលទាំងនេះ ក្រោយស្ថាបនារួចរាល់និងជួយលើកកម្ពស់សោភ័ណភាព ក្នុងខេត្តឲ្យកាន់តែល្អប្រសើរឡើងថែមទៀត ៕ ដោយ៖វ៉ៃកូ
