ខេត្តព្រះសីហនុ៖ តំណាងបុគ្គលិក បម្រើការងារនៅសណ្ឋាគារមានស្លាកយីហោ “ប្រពៃណីបុរីគុជអាស៊ី ” មានទីតាំងនៅម្តុំបុរីគុជអាស៊ី ស្ថិតក្នុងសង្កាត់លេខ៣ ក្រុង-ខេត្តព្រះសីហនុ បានប្រកាសស្វែងរកកិច្ចអន្តរាគមន៍ពីថ្នាក់ដឹកនាំមន្ទីរស្ថាប័នពាក់ព័ន្ធ ជាពិសេស លោក គួច ចំរើន អភិបាលខេត្តព្រះសីហនុ ឲ្យជួយអន្តរាគមន៍លើកណី ដែលពួកគាត់បានអះអាងថា ខាងម្ចាស់សណ្ឋាគារ មិនបានបើប្រាក់បៀវត្សរ៍ប្រចាំខែជូនពួកគាត់ និងបានចាកចេញពីសណ្ឋាគារ កាលពីព្រឹកថ្ងៃទី១៨ ខែមករា ឆ្នាំ២០២០ បាត់ស្រមោលឈឹង។
ទាក់ទិនបញ្ហានេះ អ្នកយកព័ត៌មានគេហទំព័រ “CEN” នៅមិនទាន់អាចស្វែងរកប្រភពពីខាងភាគីម្ចាស់សណ្ឋាគារឈ្មោះ ”ប្រពៃណីបុរីគុជអាស៊ី” ដើម្បីបញ្ជាក់ ឬបំភ្លឺអំពីមូលហេតុ ដែលថៅកែសណ្ឋាគារខាងលើនេះ មិនបើកប្រាក់ខែជូនបុគ្គលិក បា ននៅឡើយទេនៅរសៀលថ្ងៃសៅរ៍ ទី១៨ ខែមករា ឆ្នាំ២០២០នេះ។
យ៉ាងនេះក្តី លោក យ៉ូវ ខេមរា ប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តព្រះសីហនុ បានឲ្យដឹងថា ចំពោះព័ត៌មានខាងលើនេះ លោកនឹងបញ្ជូនមន្ត្រីឲ្យចុះពិនិត្យ និងឈានដល់ជួយសម្របសម្រួលកង្វល់ជូនបុគ្គលិកសណ្ឋាគារ “ប្រពៃណីបុរីគុជអាស៊ី” តាមដែលអាចអនុវត្តទៅបាន៕ ដោយ៖ ដែន សីមា
