ភ្នំពេញ ៖ អភិបាលរាជធានីភ្នំពេញ លោក ឃួង ស្រេង បានជំរុញឲ្យគ្រប់សាលារៀន ទាំងឯកជននិងរដ្ឋ ត្រូវមានការផ្សព្វផ្សាយ និងទប់ស្កាត់ការលក់នំចំណីផ្អែម និងភេសជ្ជៈផ្អែម ក្នុងបរិវេណសាលារៀន ដោយសារថា ការទទួលទាននំចំណីផ្អែម និងភេសជ្ជៈផ្អែមខ្លាំង នឹងធ្វើឲ្យក្មួយៗសិស្សានុសិស្ស ដែលជាទំពាំងស្នងឫស្សី នៃសង្គមជាតិយើង ត្រូវប្រឈមមុខនឹងហានិភ័យ ដូចជា ជំងឺដង្កូវស៊ីធ្មេញ, ជំងឺបេះដូង, ជំងឺធាត់ហួសកម្រិត និងជំងឺទឹកនោមផ្អែម ជាដើម។
ការជំរុញបែបនេះរបស់ លោក ឃួង ស្រេង បានធ្វើឡើងកាលពីព្រឹក ថ្ងៃសៅរ៍ ៩រោច ខែបុស្ស ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១៨ ខែមករា ឆ្នាំ២០២០ ក្នុងពិធីសម្ពោធ សាលាអន្តរជាតិ អេដវេន ដែលមានទីតាំងស្ថិតនៅតាមបណ្ដោយផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
លោក ឃួង ស្រេង បានមានប្រសាសន៍លើកឡើងថា ការបង្កើតសាលាបង្រៀនឯកជន សាលាអន្តរជាតិ អេដវេន នេះ គឺជាផ្នែកមួយ នៃការគាំទ្រគោលនយោបាយកំណែទម្រង់វិស័យអប់រំ របស់រាជរដ្ឋាភិបាលកម្ពុជា ដែលជាការចូលរួមចំណែកលើកកម្ពស់ការផ្តល់សេវាអប់រំកាន់តែប្រសើរឡើង នៅក្នុងមូលដ្ឋានរាជធានីភ្នំពេញ។
សាលារៀនឯកជន មានតួអង្គដ៏សំខាន់មួយ ក្នុងចំណោមតួអង្គស្នូលនានា នៅក្នុងការកសាងមូលធនមនុស្សសម្រាប់ការពារ កសាង និងអភិវឌ្ឍន៍ប្រទេសជាតិ។
ក្នុងឱកាសនោះដែរ លោកឃួង ស្រេង ក៏បានជំរុញឲ្យ លោកស្រី ជា ស៊ីណា ប្រធានក្រុមប្រឹក្សាភិបាល គណៈគ្រប់គ្រង សាស្ត្រាចារ្យ លោកគ្រូ អ្នកគ្រូទាំងអស់ នៃសាលាអន្តរជាតិ អេដ វេន ត្រូវអនុវត្តឲ្យបានខ្ជាប់ខ្ជួននូវរាល់កម្មវិធីអប់រំ និងនិយាមគរុកោសល្យរបស់ក្រសួងអប់រំ យុវជន និងកីឡា ពិសេសត្រូវអនុវត្តគោលការណ៍របស់រាជរដ្ឋាភិបាលកម្ពុជា ការអប់រំសម្រាប់ទាំងអស់គ្នា” និងការជំរុញចលនាអប់រំក្នុងសាលាតាមពាក្យស្លោក “កូនល្អ សិស្សល្អ មិត្តល្អ ពលរដ្ឋល្អ ឲ្យកាន់តែសកម្មខ្លាំងក្លា និងមានប្រសិទ្ធភាពខ្ពស់។ ផ្តល់សេវាអប់រំ ដោយផ្តោតជាសំខាន់លើ “គុណភាពជាចម្បង” ។ គួរផ្សារភ្ជាប់ការអប់រំសិស្សានុសិស្ស ទៅនឹងមេរៀនប្រវត្តិសាស្ត្រ វប្បធម៌ ទំនៀមទម្លាប់ ប្រពៃណីជាតិ វប្បធម៌សន្តិភាព ការគោរពសិទ្ធិ សេចក្ដីថ្លៃថ្នូររបស់មនុស្សសីលធម៌ សុជីវធម៌ សិល្បៈ កីឡា និងបំណិនជីវិតផ្សេងៗដើម្បីឲ្យពួកគេទទួលបាននូវចំណេះដឹងកាន់តែប្រសើរ និងក្លាយជាគ្រាប់ពេជ្រពិតប្រាកដសម្រាប់សង្គមជាតិ។ គួរបានបង្កើតកម្មវិធីអប់រំផ្សព្វផ្សាយបន្ថែម ពាក់ព័ន្ធទៅនឹងការប្រយុទ្ធប្រឆាំងអំពើហិង្សា, ការជួញដូរស្ត្រី និងកុមារ លុបបំបាត់ការរើសអើងក្នុងសង្គម, ទប់ស្កាត់ការរីករាលដាល នៃមេរោគអេដស៍-ជំងឺអេដស៍, គ្រោះថ្នាក់ នៃការប្រើប្រាស់គ្រឿងញៀន និងការអប់រំពាក់ព័ន្ធនឹងការគោរពច្បាប់ចរាចរណ៍ផ្លូវគោកជាដើម។ ជំរុញការផ្សព្វផ្សាយ និងទប់ស្កាត់ការលក់នំចំណីផ្អែម និងភេសជ្ជៈ ផ្អែមក្នុងបរិវេណសាលារៀន ដូចអ្វីដែលរដ្ឋបាលរាជធានីភ្នំពេញ បានធ្វើការណែនាំនាពេលកន្លងមក ពីព្រោះ ការទទួលទាននំចំណីផ្អែម និងភេសជ្ជៈផ្អែមខ្លាំង នឹងធ្វើឲ្យក្មួយៗសិស្សានុសិស្ស ដែលជាទំពាំងស្នងឫស្សី នៃសង្គមជាតិយើង ត្រូវប្រឈមមុខនឹងហានិភ័យ ដូចជា
ជំងឺដង្កូវស៊ីធ្មេញ, ជំងឺបេះដូង, ជំងឺធាត់ហួសកម្រិត និងជំងឺទឹកនោមផ្អែម ជាដើម ហើយប្រសិនបើធនធានមនុស្សរបស់យើងមានសុខភាពមិនល្អ នោះសង្គមជាតិ ក៏ត្រូវជួបប្រទះបញ្ហាដែរ ដូច្នេះ យើងត្រូវយកចិត្តទុកដាក់អំពីបញ្ហានេះទាំងអស់គ្នា។
លោកស្រីជា ស៊ីណា ប្រធានក្រុមប្រឹក្សាភិបាល សាលាអន្តរជាតិ អេដ វេន បានមានប្រសាសន៍ថា ដោយទឹកចិត្តស្រឡាញ់គាំទ្រវិស័យអប់រំ និងទទួលបានការអនុញ្ញាតពីក្រសួងពាណិជ្ជកម្ម និងក្រសួងអប់រំផង នៅថ្ងៃទី១៨ ខែវិច្ឆិកា ឆ្នាំ២០០៨ លោក សេង ឡុង បានបង្កើត សហគ្រាសឯកបុគ្គល ស្មាតឃីដ អ៊ីនធើណេសិនណលស្គូល ហើយបើកបម្រើសេវាអប់រំឯកជនក្រោមពាណិជ្ជនាម “ស្មាធ-ឃីដ អ៊ិនធើណេសិនណលស្នូលឬ សាលាអន្តរជាតិ ស្មាធ ឃីដ សាខាទី០១ចាប់ពីថ្ងៃ០៧ ខែមករា ឆ្នាំ២០០៩ ដោយមានការគាំទ្រពីមាតាបិតា និងសិស្សានុសិស្សយ៉ាងច្រើនរហូតដល់ចំនួនចុះឈ្មោះសិក្សាកើនដល់ប្រមាណ៣០០០ (បីពាន់) ក្នុងឆ្នាំសិក្សា២០១៨-២០១៩ ។ សហគ្រាសឯកបុគ្គល “ស្មាធ
-ឃីដ អ៊ិនធើណេសិនណលស្គូលបានវិវត្តន៍ខ្លួនទៅជាក្រុមហ៊ុនស្មាធ ឃីដ អ៊ិនធើណេសិនណលស្គូល ត្រាស់ អេទ្យCo.Ltd” ហើយពង្រីកសក្តានុពលខ្លួនពី០១ សាខារហូតដល់ ០៧សាខា៕ដោយ៖កូឡាប