ភ្នំពេញ៖ មន្ត្រីជាន់ខ្ពស់នៃក្រសួងអប់រំ បានអះអាងថា ដើម្បីអភិវឌ្ឍកូនក្មេងម្នាក់ ឲ្យមានអនាគតល្អ ត្រូវមានការចូលរួមពីគ្រប់លំដាប់ថ្នាក់ទាំងអស់ ទាំងគ្រូ ទាំងអាណាព្បាបាល និងទាំងអ្នកជុំវិញខ្លួន ទើបធ្វើឲ្យក្មេងម្នាក់នេះ មានការរីកចម្រើនបានល្អ ដូច្នេះសូមឪពុកម្តាយត្រូវយកចិត្តទុកដាក់លើការងារនេះជាទីបំផុត ហើយអាណាព្យាបាលទាំងអស់ កុំគិតថា កូនបានសិក្សានៅសាលាឯកជន ឬសាលារដ្ឋ ឬសាលាអន្តរជាតិ មានកម្រិតសិក្សា និងចំណេះដឹងខុសគ្នា ព្រោះលោកគ្រូ អ្នកគ្រូ បានយកចិត្តទុកដាក់ ក្នុងការបង្រៀនសិស្ស តាមកម្មវិធីសិក្សារបស់ក្រសួងអប់រំយុវជននិងកីឡាបានយ៉ាងល្អ។
លោកជំទាវ ស្រូយ សុជាតិ អគ្គនាយិកា នៃអគ្គនាយកដ្ឋានយុវជន ក្រសួងអប់រំ យុវជននិងកីឡា និងជាអគ្គលេខាធិការ នៃលេខាធិការដ្ឋានក្រុមប្រឹក្សាជាតិកម្ពុជា ដើម្បីអភិវឌ្ឍយុវជន បានថ្លែងក្នុងពិធីប្រគល់ប័ណ្ណសរសើរជូនដល់បុគ្គលិក ថ្នាក់ដឹកនាំឆ្នើម វិញ្ញាបនបត្របញ្ជាក់ការសិក្សា និងអាហារូបករណ៍ ជូនដល់សិស្សពូកែប្រចាំឆ្នាំ២០១៩ នៃសាលាអន្តរជាតិអាស៊ាន កាលពីថ្ងៃទី១៩ខែមករាឆ្នាំ២០២០នៅវិទ្យាស្ថានជាតិអប់រំថា សុភាសិតមួយបានលើកឡើងថា “បើអ្នកណាបើកទ្វាសាលា អ្នកនោះបិទច្រកនូវការល្អិតល្ងង់” ។ ដូច្នេះការវិនិយោគរបស់អស់លោកលោកស្រីដែលជាអាណាព្យាបាល លើកូននោះ គឺជាការវិនិយោគយ៉ាងត្រឹមត្រូវជាទីបំផុត និងមានលទ្ធផលដ៏យូរអង្វែង។
លោកជំទាវ បានបន្តថា ក្រោមការដឹកនាំរបស់រាជរដ្ឋាភិបាលកម្ពុជា យើងទទួលបាននូវសុខសន្តិភាព ។ ក្រៅតែអំពីការផ្គត់ផ្គង់ការអប់រំ សាលារដ្ឋដែលគ្រប់គ្រងដោយក្រសួងអប់រំយុវជននិងកីឡា ដោយសារមិនមានការគ្រប់គ្រាន់ចំពោះសិស្ស បានន័យថាមិនមានគ្រប់ច្រកល្អក ទើបមានការចូលរួមរបស់សាលាឯកជន។
លោកជំទាវ ក៏បានអំពាវនាវដល់អាណាព្យាបាល កុំគិតថា កូនបានសិក្សានៅសាលាឯកជន ឬសាលារដ្ឋ ឬសាលាអន្តរជាតិ ព្រោះថាលោកគ្រូអ្នកគ្រូ បានយកចិត្តទុកដាក់ក្នុងការបង្រៀនសិស្សតាមកម្មវិធីសិក្សាបានយ៉ាងល្អ ។ “ដើម្បីអភិវឌ្ឍកូនក្មេងម្នាក់ ដើម្បីឲ្យមានអនាគតបាន ត្រូវមានការចូលរួមពីគ្រប់លំដាប់ថ្នាក់ទាំងអស់ ទាំងគ្រូ ទាំងអាណាព្បាបាល ទាំងអ្នកជំវិញខ្លួន ទើបធ្វើឲ្យក្មេងម្នាក់នេះ មានការរីកចម្រើនបានល្អ ដូច្នេះសូមឪពុកម្តាយត្រូវយកចិត្តទុកដាក់លើការងារនេះជាទីបំផុត” លោកជំទាវ បានថ្លែងបន្ថែមដូច្នេះ។
លោកជំទាវអគ្គនាយិកា បានមានប្រសាសន៍ថា ក្រោមការដឹកនាំរបស់លោកព្រឹទ្ធសភាចារ្យរដ្ឋមន្ត្រីក្រសួងអប់រំ បានយកចិត្តក្នុងការធ្វើកំណែទម្រង់លើវិស័យអប់រំ ដែលការធ្វើកំណែទម្រង់នេះ ផ្តល់ការសិក្សាមួយយ៉ាងជាក់លាក់ ផ្តល់ការសិក្សាមួយដល់សិស្សនិស្សិត សិស្សានុសិស្សទាំងអស់ ។ នេះហើយជាអ្វីដែលសាលាគ្រប់ទីកន្លែងទាំងអស់ ធ្វើអ្វីទាក់ទងនឹងការអប់រំចង់បាន។ ជាថ្មីម្តងទៀត លោកស្រីបានរំលឹកថា ការអប់រំកូនក្មេងម្នាក់ ដើម្បីឲ្យមានចំណេះវិជ្ជា មិនមែនគ្រាន់តែជាការអប់រំ នៅក្នុងសាលានោះទេ គឺឪពុកម្តាយត្រូវអប់រំកូនៗរបស់ខ្លួននៅផ្ទះបន្ថែមទៀត។ លោកជំទាវ ក៏បានផ្តល់នូវយោល់គន្លឹះយ៉ាងសំខាន់ដល់សាលាអន្តរជាតិអាស៊ានថា ការវិនិយោគលើវិស័យអប់រំ មិនដូចការលក់ខោអាវ ដែលមានការបញ្ចុះតម្លៃនោះទេ គឺត្រូវតែពង្រឹងគុណភាព យកគុណភាពជាចម្បង សិក្សាភាពបរទេសត្រូវភ្ជាប់ជាមួយកំព្យូទ័រ ព្រោះឥឡូវយើងឈានដល់កម្រិតសិក្សាវិទ្យាសាស្ត្រ ៤.០ ហើយបច្ចុប្បន្នការសិក្សាតាមកម្មវិធីថ្មីបែបទំនើបដែលមានឈ្មោះ ស្ទែម (Stem) ដែលជំរុញឲ្យសិស្សទាំងអស់ឈានទៅរកវិទ្យាសាស្ត្រពិត ។
ក្នុងឱកាសនោះដែរ លោក ហុង លីម ជាគណៈគ្រប់គ្រងនិងស្ថាបនិកសាលាអន្តរជាតិអាស៊ាន បានថ្លែងថា សាលាអន្តរជាតិអាស៊ាន បានចាប់ដំណើរការនៅថ្ងៃទី៣ ខែមេសា ឆ្នាំ២០០៦ ។ គិតមកដល់ បច្ចុប្បន្នមានអាយុកាល១៨ឆ្នាំ នៅលើវិថីអប់រំនិងបណ្តុះបណ្តាលធនធានមនុស្ស ក្រោមចក្ខុវិស័យ គុណភាព ឧត្តមភាព និង គុណធម៌ អមជាមួយបេសកកម្មចម្បង គឺ លើកកម្ពស់ការសិក្សារបស់សិស្សឲ្យមានភាពល្អប្រសើរ ជាមួយការបង្រៀនតាម និយាមគរុកោសល្យ និងសម្ភារឧបទេសទាន់សម័យកាល។ ផ្តល់ជូនសិស្សានុសិស្សនូវបរិយាកាសសិក្សាប្រកបដោយសុវត្ថិភាព ផាសុកភាព ។ លើកកម្ពស់ស្មារតីទទួលខុសត្រូវ ឥរិយាបទប្រកបដោយគុណធម៌ និងវប្បធម៌ឲ្យតម្លៃគ្នា ព្រមទាំងអប់រំសិស្សានុសិស្សឲ្យមានផ្នត់គំនិតសុទិដ្ឋិនិយម សីលធម៌ និងសុជីវធម៌ ដើម្បីក្លាយជាទំពាំងស្នងឫស្សី និងពលរដ្ឋគំរូក្នុងសង្គម។
គួររំលឹកផងដែរ សាខាដំបូងបំផុត មានទីតាំងស្ថិតនៅបណ្តោយផ្លូវ២៧១ សង្កាត់ផ្សារដើមថ្កូវខណ្ឌចំការមន។ ដោយកិច្ចខិតខំប្រឹងប្រែង និងសាមគ្គីភាពពីសំណាក់ថ្នាក់ដឹកនាំនិងបុគ្គលិក រួមផ្សំនិងការផ្តល់ទំនុកចិត្តពីសំណាក់សិស្សានុសិស្ស និងមាតាបិតាសិស្ស សាលាបានពង្រីកទីតាំងបន្ថែមជាបន្តបន្ទាប់ រហូតមានចំនួន៧សាខា ក្នុងរាជធានីភ្នំពេញ និងក្រុងតាខ្មៅ ខេត្តកណ្តាល ហើយគោលដៅសាខាទី៨ សម្រាប់ឆ្នាំ២០២០ មានទីតាំងនៅសង្កាត់ចាក់អង្រែ ខណ្ឌមានជ័យ។ គិតមកដល់បច្ចុប្បន្ន សាលាមានសិស្សានុសិស្សសរុប ៤៩២៥នាក់ និងបុគ្គលិកកំពុងបម្រើការងារចំនួន២៦៩នាក់។
លោកបានបន្តថា ក្នុងរយៈកាលជាង១ទសវត្សរ៍កន្លងមកនេះ ក្រៅពីការផ្តល់ចំណេះដឹងដល់កុលបុត្រកុលធីតាកម្ពុជា សាលាបានចូលរួមផ្តល់ឱកាសការងារដល់បុគ្គលិកជាច្រើនរយនាក់ ឲ្យទទួលបានទាំងចំណេះនិង ការពង្រីកនិងពង្រឹងជំនាញ ក៏ដូចជាបន្ថែមបទពិសោធន៍ក្នុងជីវិតការងារ ការទ្រទ្រង់ជីវភាព និងទុនបន្តការសិក្សា។
ដោយឡែកចំពោះសិស្សានុសិស្ស ក្រៅពីផ្តល់ចំណេះដឹងផ្នែកភាសា និងចំណេះដឹងទូទៅ សាលាតែងយកចិត្តទុកដាក់ ក្នុងការអប់រំសីលធម៌ សុជីវធម៌ វិន័យ បណ្តុះផ្នត់គំនិតក្នុងការចែករំលែកតាមរយៈការធ្វើសកម្មភាពសង្គម និងពិធីរៃអង្គាសនានា ដើម្បីបរិច្ចាគជូនដល់កុមារក្រីក្រទីជនបទ និងមន្ទីរពេទ្យគន្ធបុប្ផា។ ជាងនេះទៅទៀត សិស្សានុសិស្សទាំងអស់ ទទួលបានការបណ្តុះផ្នត់គំនិតភាពជាអ្នកដឹកនាំ ជាធនធានដែលនឹងធំធាត់ដោយមានគោលដៅជាក់លាក់ មានផែនការជីវិតទៅតាមដំណាក់កាលនៃវ័យរបស់ខ្លួន។
លោកនាយកសាលា សូមលើកទឹកចិត្តដល់មាតាបិតាសិស្សទាំងអស់ សូមចូលរួមស្វែងយល់។ ជាក់ស្តែង នៅក្នុងឆ្នាំ២០១៩កន្លងទៅនេះ គឺជាឆ្នាំទី១ដែលសាលាបានអនុវត្ត ការបញ្ជ្រាបនូវកម្មវិធីទម្លាប់ល្អទាំង៧របស់បុគ្គលឆ្នើម (The 7 habits for Highly Effective People) ដោយទទួលសិទ្ធិស្របច្បាប់ពី Franklin Covey សហរដ្ឋ អាមេរិក។ ជាកម្មវិធីដែលមានសាលាចំនួនជាង៤ooo ក្នុងចំណោម១៧៥ប្រទេស កំពុងដាក់អនុវត្ត។
តាមរយៈការអញ្ជើញឲ្យចូលរួមក្នុងពិធីនានា របស់សាលា ដែលមានការដាក់បញ្ជ្រាបកម្មវិធីនេះ និងសូមលើកទឹកចិត្តបុត្រធីតាឲ្យចូលរួមចាប់ផ្តើមអនុវត្តដើម្បីកែប្រែទម្លាប់អវិជ្ជមាន ហើយទទួលយកទម្លាប់វិជ្ជមាន ដែលមានប្រយោជន៍ចំពោះខ្លួនឯង។
ក្នុងនាមជាគ្រឹះស្ថានអប់រំឯកជនមួយ ដែលទទួលបានការគាំទ្រពីសំណាក់មាតាបិតាសិស្សសាលាអន្តរជាតិអាស៊ាន តែងចូលរួមលើកកម្ពស់គោលដៅអភិវឌ្ឍប្រកបដោយចីរភាព ស្តីពីការអប់រំឆ្នាំ២០៣០ ឆ្ពោះទៅធានាគុណភាពអប់រំ ប្រកបដោយបរិយាប័ន្ន និងលើកកម្ពស់ការសិក្សាពេញមួយជីវិតសិទ្ធិសេរីភាព និងសុភមង្គលសម្រាប់បុគ្គល គ្រួសារនិងសង្គមជាតិ៕ដោយ៖បញ្ញាស័ក្តិ