ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានណែនាំប្រជាពលរដ្ឋ ប្រុងប្រយ័ត្នចំពោះកុងតាក់ភ្លើង ត្រូវបិទឲ្យអស់ មុននឹងចាកចេញពីគេហដ្ឋាន ព្រោះអគ្គិភ័យភាគច្រើនកើតឡើង ពីអគ្គិសនីនេះតែម្តង ដោយសារតែធ្វេសប្រហែសរបស់ម្ចាស់ផ្ទះ ។
ក្នុងឱកាសបុណ្យចូលឆ្នាំចិន ដែលខិតជិតមកដល់នោះ លោក ឃួង ស្រេង បានមានប្រសាសន៍ថា ដើមឡើយយើង មានផ្ទះតូចតាចហើយ មានរបង មានអីមិនគត់មត់ កាលណាចេញទៅរកស៊ីតែងបារម្ភ ខ្លាចមានចោរចូល ខ្លាចមានអគ្គិភ័យ ឥឡូវមានសោចាក់ស្រួលបួល ប៉ុន្តែកន្លែងខ្លះខ្ពស់ ត្រូវប្រយ័ត្នអំពីអគ្គិភ័យខ្លះផង ចេញពីផ្ទះ ត្រូវបិទភ្លើងឲ្យអស់ កុំឲ្យមានបញ្ហានេះកើតឡើង ជារឿយៗអគ្គិភ័យ ច្រើនតែកើតឡើង នៅរដូវប្រាំង ហើយមូលហេតុអគ្គិសនីនេះឯង។ ដូច្នេះកុំទៅបន្ទោសអគ្គិសនីជាអ្នកធ្វើឲ្យឆេះ ប៉ុន្តែមូលហេតុមកពីម្ចាស់ផ្ទះ មានការធ្វេសប្រហែស។
លោក ឃួង ស្រេង បានលើកឡើងថា បិទបារ៉ែតភ្លើងតែម្តងផ្ទះដែលចេញហើយ គួរបិទបារ៉ែតតែម្តង ។ កុំគិតថា ទូរទឹកកកស្អុយអី បើកទូរចោលទៅ ។ បញ្ហានេះជាពិសោធន៍ ដែលខ្ញុំសង្កេតឃើញថា ក្នុងរាជធានីភ្នំពេញ ភាគច្រើនអគ្គិភ័យឆាប់ឆេះ ដោយសារបញ្ហាដោតឌុយសាកចោល ដែលសូមឲ្យបងប្អូនប្រុងប្រយ័ត្ន ។
ក្នុងពិធីប្រគល់ប័ណ្ណកម្មសិទ្ធិជូនប្រជាពលរដ្ឋចំនួន៥១គ្រួសារ ដែលរងផលប៉ះពាល់ពីគម្រោងអភិវឌ្ឍន៍ក្រុងរណបជ្រោយចង្វា នៅព្រឹកថ្ងៃទី២០ ខែមករានេះ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ថា ការចែកប័ណ្ណកម្មសិទ្ធិជូនប្រជាពលរដ្ឋចំនួន៥១ គ្រួសារនាពេលនេះ គឺជាលើកទី៥ហើយ ដែលសរុបទំាងអស់ចំនួន៣៤១ប័ណ្ណ ដែលគ្រោង នឹងបញ្ចប់នាពេលឆាប់ៗនេះ។
លោកអភិបាលរាជធានីភ្នំពេញ បានបញ្ជាក់ថា ការចែកប័ណ្ណ ប្រគល់ផ្ទះជូនប្រជាពលរដ្ឋដែលរងផលប៉ះពាល់ពីគម្រោងអភិវឌ្ឍន៍ក្រុងរណបជ្រោយចង្វានេះ ជាការឆ្លុះបញ្ចាំងនៃការយកចិត្តទុកដាក់ខ្ពស់ របស់ប្រមុខរាជរដ្ឋាភិបាល ក្នុងការធានាសិទ្ធិកាន់កាប់ស្របច្បាប់របស់ប្រជាពលរដ្ឋ សំដៅលើកកម្ពស់ជីវភាព សុខុមាលភាព និងកាត់បន្ថយភាព ក្រីក្រ រួមទំាងរួមចំណែកការពង្រឹងយុត្តិធម៌ និងស្ថិរភាពសង្គម។
អ្នកឧញ៉ា ពុងឃាវសែ អគ្គនាយកក្រុមហ៊ុនអូស៊ីអាស៊ីបានឲ្យដឹងថា មកដល់ពេលនេះក្រុមហ៊ុន អូស៊ីអាស៊ីបានដោះស្រាយផលប៉ះពាល់ជូនប្រជាពលរដ្ឋបានចំនួន៩២,០៦ភាគរយហើយ ខណៈនៅ សល់ជាង៧ភាគរយ ឬជាង៨០គ្រួសារទៀត នឹងត្រូវដោះស្រាយបញ្ចប់នាពេលខាមុខ។ លោកបានបញ្ជាក់ថា ក្រុមហ៊ុនបានខិតខំអភិវឌ្ឍន៍ក្រុងរណបជ្រោយចង្វា ឲ្យក្លាយទៅជាទីក្រុងទំនើបនាពេលខាងមុខនេះ ដោយមានមជ្ឈមណ្ឌលពាណិជ្ជកម្ម អគាររដ្ឋបាល សួនច្បារ ផ្លូវគមនាគមន៍ធំទូលាយ សួនកម្សាន្តរ និងអគារលំនៅដ្ឋានប្រណិតៗ ផ្សារទំនើប សម្រាប់ការរស់នៅបែបស៊ីវិល័យរបស់ប្រជាពលរដ្ឋក្នុងទីក្រុង៕ដោយ៖កូឡាប