ភ្នំពេញ ៖ លោកស្រី ម៉ែន សំអន ឧបនាយករដ្ឋមន្ដ្រី រដ្ឋមន្ដ្រីទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានបញ្ជាក់ថា ការអនុវត្តច្បាប់ទប់ ស្កាត់អំពើពុករលួយ ភាពអយុត្តិធម៌ក្នុងសង្គម និងការរំលោភបំពានដោយប្រើអំណាច ត្រូវបានលុបបំបាត់ និងហួសសម័យ។
ក្នុងពិធី បើកសន្និបាតបូកសរុបលទ្ធផលការងារឆ្នាំ២០១៩ និងផែនការទិសដៅភារកិច្ចឆ្នាំ២០២០ របស់ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ដែល បានធ្វើឡើងនាថ្ងៃចន្ទទី២០ ខែមករា ឆ្នាំ២០២០ នៅសណ្ឋាគារសុខាភ្នំពេញ លោកស្រីម៉ែន សំអន បានបញ្ជាក់ថា៖ វឌ្ឍន ភាពការងារ នៃបេសកកម្មចម្បងរបស់ក្រសួង ដើម្បីឲ្យអង្គសន្និបាតធ្វើការត្រួតពិនិត្យតាម ដាន ដូចជា ការអនុវត្តច្បាប់ ទប់ស្កាត់អំពើពុករលួយ ភាពអយុត្តិធម៌ក្នុងសង្គម និងការរំលោភបំពានដោយប្រើអំណាច ដើម្បីបម្រើប្រយោជន៍បុគ្គល និងបក្ខពួក គ្រួសារ និងការពារសិទ្ធិរបស់ពលរដ្ឋ និងសុវត្ថិភាពសាធារណៈ គឺពង្រឹងអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណ ដើម្បីកំណើនការងារសមធម៌ និងប្រសិទ្ធ ភាពរបស់រាជរដ្ឋាភិបាល។
ទន្ទឹមនឹងការពិនិត្យលើរបាយការណ៍ ប្រចាំ ឆ្នាំ២០១៩ លោកស្រី ម៉ែន សំអន បានផ្តល់ជាការលើកទឹកចិត្តចំពោះថ្នាក់ដឹកនាំ និងមន្ត្រីគ្រប់ថ្នាក់ចំណុះឲ្យក្រសួង ដែលបានអនុវត្តប្រកបដោយលទ្ធផល ល្អក្នុងសកម្មភាពការងារកន្លងមក មានលក្ខណៈសម្បត្តិថ្លៃថ្នូរ ស័ក្តិសមជាអ្នកបម្រើដ៏ល្អរបស់ប្រជាជនដោយផ្លាស់ប្តូរឥរិយាបទ ប្រែក្លាយខ្លួនទៅជាអ្នកផ្តល់សេវាដ៏មានប្រសិទ្ធភាព និងជាដៃគូរអភិវឌ្ឍន៍ ដែលអាចទុកចិត្តបាន សំដៅបម្រើប្រជាពលរដ្ឋឱ្យកាន់តែប្រសើរឡើង តាមរយៈការបង្កើនប្រសិទ្ធផលសេវាកម្មសាធារណៈ។
លោកស្រី ជាមួយគ្នានេះ មន្ត្រីរាជការក្រសួងទាំងអស់ត្រូវយកចិត្តទុកដាក់អនុវត្តឱ្យបានល្អ តាមអភិក្រមទាំង៥ របស់សម្តេចតេជោនាយករដ្ឋមន្ត្រី គឺ៖ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ដែលយើងត្រូវចងចាំកុំឲ្យភ្លេចខ្លួន៕ដោយ បញ្ញាស័ក្តិ