ភ្នំពេញ៖ សម្តេចតេជោ ហ៊ុន សែន បានថ្លែងថា នាពេលកន្លងមកធ្លាប់មានសមាគមធាក់ស៊ីក្លូមួយចំនួន ធ្លាប់បានយកថវិកាសម្តេច ដើម្បីទៅទ្រទ្រង់សកម្មភាពនានា តែទីបំផុតបែរជាយកទៅបម្រើប្រយោជន៍ផ្ទាល់ខ្លួន។ ព្រោះតែហេតុនេះហើយ ទើបសម្តេចបង្កើតមូលនិធិត្រីចក្រយាន ហើយគ្រប់គ្រងដោយខ្លួនឯង។
នៅព្រឹកថ្ងៃសៅរ៍ ទី១៣ ខែមករា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រី បានអញ្ជើញជួបសំណេះសំណាល ព្រមទាំងពិសារអាហារជាមួយបងប្អូនអ្នកធាក់ស៊ីក្លូក្នុងរាជធានីភ្នំពេញចំនួន ៣០៨នាក់ ដែលធ្វើឡើងនៅមជ្ឈមណ្ឌលកោះពេជ្រ។ យើងដឹងហើយថា ស៊ីក្លូ គឺជាអត្តសញ្ញាណមួយរបស់ជាតិយើងដែរ ដែលយើងត្រូវនាំគ្នាថែរក្សាកុំអោយបាត់បង់។
នៅក្នុងឱកាសដ៏វិសេសវិសាលនេះ សម្តេចតេជោ នាយករដ្ឋមន្ត្រី បានប្រកាសបើកជាផ្លូវការនូវ “សមាគមមូលនិធិត្រីចក្រយាន (មូលនិធិស៊ីក្លូ)។ មូលនិធិនេះ គឺចាប់ផ្តើមពីថវិកាសប្បុរស ៥០០ លានរៀល ដែលបានទទួលពីសប្បុរសជននានា និងពាណិជ្ជករនៅក្នុងប្រទេស។ បងប្អូនអ្នកធាក់ស៊ីក្លូ គឺអាចដាក់ពាក្យសុំចូលជាសមាជិកសមាគបាន ដោយមិនតម្រូវអោយបង់ប្រាក់សមាជិកឡើយ។ សមាជិកទាំងអស់នឹងទទួលបាននូវផលប្រយោជន៍មួយចំនួនដូចជា៖ ប្រាក់ជួលស៊ីក្លូប្រចាំថ្ងៃ ២០០០រៀល ប្រាក់អាហារ ៥០០០រៀលនិងសេវាថែទាំសុខភាព និងព្យាបាលដោយឥតគិថ្លៃ នៅតាមមន្ទីរពេទ្យរដ្ឋ ដែលផ្តល់ដោយមូលនិធិសមធម៌។
ក្រៅពីផលប្រយោជន៍ខាងលើ គឺសមាគមនឹងពិចារណាក្នុងការផ្តល់ការឧបត្តម្ភបន្ថែមជូនបងប្អូនអ្នកធាក់ស៊ីក្លូ ដូចជាក្នុងរដូវបុណ្យទាន (ចូលឆ្នាំ និងភ្ជុំបិណ្ឌ មរណភាពជាដើម)។ សម្តេចតេជោ ហ៊ុន សែន ត្រូវបានជ្រើតាំងជា ប្រធានកិត្តិយសរបស់ “សមាគមមូលនិធិត្រីចក្រយាន (មូលនិធិស៊ីក្លូ)”។ នៅថ្ងៃនេះបងប្អូនសមាជិកអ្នកធាក់ស៊ីក្លូទាំង៣០៨នាក់ នឹងទទួលបានប្រាក់ឧបត្ថម្ភ ៥៧ម៉ឺនរៀល (៥០០០០រៀល ជាអំណោយ ពីសម្តេចតេជោ និងសម្តេចកិត្តិព្រឹទ្ធបណ្ឌិត និង ៧០០០០រៀល ប្រាក់ពីមូលនិធិ) ព្រមទាំង ភួយ អាវរងា កន្សែង ក្រមា អាវភ្លៀង និងមុង។ មូលនិធិទាំងនេះ គឺដាក់នៅក្នុងកាត Wing ដែលបងប្អូនងាយស្រួលអាចបើកនៅ Wing នៅគ្រប់ទីកន្លែង។ នេះគឺជាយកចិត្តទុកដាក់ដ៏ខ្ពង់ខ្ពស់របស់សម្តេចទាំងទ្វេ ដើម្បីអោយជីវិត និងជីវភាពរស់នៅរបស់លោកតា អុំ ពូ និងបងប្អូនអ្នកធាក់ស៊ីក្លូទូទាំងប្រទេសកាន់តែប្រសើរឡើង។ សូមបងប្អូនអ្នកធាក់ស៊ីក្លូ គោរពច្បាប់ចរាចរណ៍ កុំប្រើប្រាស់គ្រឿងស្រវឹងដើម្បីចៀសវាងគ្រោះថ្នាក់ផ្សេងៗ។ សូមក្រុមហ៊ុនទេសចរណ៍ជួយទាក់ទាញទេសចរបរទេសអោយចូលរួមប្រើប្រាស់ស៊ីក្លូ។ យើងចូលរួមជិះស៊ីក្លូដើម្បីជួយលើកស្ទួយជីវភាពបងប្អូនស៊ីក្លូ។ ស៊ីក្លូ គឺកាត់បន្ថយការបំពុលបរិស្ថានក្នុងទីក្រុង។
សម្តេចតេជោ ហ៊ុន សែន បានអរគុណដល់សប្បុរជនទាំងអស់ដែលបានឧបត្ថម្ភដល់មូលនិធិស៊ីក្លូថ្ងៃនេះ និងបន្តឧបត្ថម្ភប្រចាំឆ្នាំ។ នៅថ្ងៃនេះ មូលនិធិសរុបដែលទទួលបានជាបថមគឺមាន ប្រាក់វិភាគទានសម្តេចតេជោ និងសម្តេចកិត្តិ ២៤០០០0ដុល្លារ និងប្រាក់សប្បុរជនជាង ២០០០០០ ដុល្លារថែមទៀត។
សម្តេចតេជោ ហ៊ុន សែន បានថ្លែងថា មានហេតុផលចំនួន៤ ដែលនាំឲ្យសម្តេចសម្រេចបង្កើតមូលនិធិត្រីចក្រយាន (មូលនិធិស៊ីក្លូ)។ ហេតុផលទាំង៤នោះរួមមាន៖ ខែមករា ជាខួប ៣៩ឆ្នាំនៃការរំដោះប្រទេសចេញពីរបប ប៉ុល ពត។ ៥ មករា ខួប ៤២ឆ្នាំ នៃអាពាហ៍ពិពាហ៍របស់សម្តេច។ ថ្ងៃទី៨ មករា ជាខួប ៣៩ឆ្នាំ នៃការចូលកាន់កាប់អំណាចរដ្ឋតាមរយៈជ្រើសតាំង ជារដ្ឋមន្ត្រីក្រសួងការបរទេស និងទី៤ នៅថ្ងៃទី១៤ ខែមករា គឺជាខួបលើកទី ៣៣ឆ្នាំ ដែលសម្តេចបានឡើងកាន់តំណែងជានាយករដ្ឋមន្ត្រី។ សម្តេចតេជោ ហ៊ុន សែន បានអំពាវនាវដល់អ្នកប្រកបរបរលើវិស័យទេសចរណ៍ទាំងអស់ ចូលរួមគាំទ្រដល់អ្នកធាក់ស៊ីក្លូ។ សម្តេចក៏បានអំពាវនាវដល់អ្នកធាក់ស៊ីក្លូ កុំបរិភោគគ្រឿងស្រវឹងពេលធាក់ស៊ីក្លូ៕ ដោយ៖កូឡាប
