មនុស្សចំនួន ៧នាក់បានស្លាប់ និង ៣នាក់ទៀតកំពុងបាត់ខ្លួន ក្រោយពេលមានហេតុការណ៍បាក់ស្ពាន់នៅលើកោះសូម៉ាត្រា នៃប្រទេសឥណ្ឌូណេស៊ី។ នេះបើតាមការបញ្ជាក់របស់ភ្នាក់ងារគ្រោះមហន្តរាយ នៃប្រទេសនេះ កាលពីថ្ងៃចន្ទនេះ។
មានមនុស្សចំនួន ៣០នាក់ ដែលភាគច្រើនជាសិស្សសាលាស្ថិត នៅលើស្ពានកាលពីពេលរសៀល ថ្ងៃអាទិត្យម្សិលមិញនេះ នៅពេលស្ពានដែលទើបសាងសង់រួចបានបាក់ បណ្តាលឲ្យសិស្សជាច្រើននាក់បានធ្លាក់ចូលក្នុងទឹកនៅខាងក្រោមស្ពាន ខណៈដែលអ្នកផ្សេងបាន ចាប់ឱបរបងស្ពានជាប់។
កម្រិតទឹកនៅខាងក្រោមស្ពាន គឺខ្ពស់ជាងធម្មតា និងមានចរន្តខ្លាំង ក្រោយពេលមានភ្លៀងធ្លាក់ខ្លាំងនៅក្នុងតំបន់។
“ស្ពានប្រហែលជាមិនអាចទ្រទ្រង់ទម្ងន់បាន វាក៏បាក់តែម្តង។ មនុស្ស ៧នាក់ស្លាប់ និង ៣នាក់បាត់ខ្លួន”។ នេះជាការលើកឡើងរបស់ប្រធានភ្នាក់ងារបន្ធូរបន្ថយគ្រោះមហន្តរាយ។
សិស្សមួយចំនួនដែលបានធ្លាក់ចូលក្នុងទឹក ត្រូវបានជួយសង្រ្គោះ ខណៈដែលក្រុមសង្រ្គោះបានស្វែងរកចំងាយ ២០គីឡូម៉ែត្រពីកន្លែងកើតហេតុ ដើម្បីស្វែងរកជនរងគ្រោះបាត់ខ្លួន ដែលជាក្មេងជំទង់ទាំងអស់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
