ភ្នំពេញ៖ក្រសួងអប់រំ បានលើកឡើងថា រយៈពេលកន្លងមកនេះ បាតុភាពអសកម្ម និងអសីលធម៌មួយចំនួនបានកើតឡើងទាំងនៅក្នុង ទាំងនៅបរិវេណនៃគ្រឹះស្ថានសិក្សា ដែលបានបង្កឱ្យមានគ្រោះថ្នាក់ផ្សេងៗ ក្នុងករណីខ្លះរហូតដល់បាត់បង់អាយុជីវិតរបស់យុវជនក្នុងវ័យសិក្សា។
ក្រសួងអប់រំ យុវជន និងកីឡា នៅថ្ថៃទី២០មករា បានសេចក្តីប្រកាសព័ត៌មានស្តីពីវិធានការពង្រឹង និងលើកកម្ពស់វិន័យ បទបញ្ជាផ្ទៃក្នុងនិងការអប់រំសីលធម៌ នៅតាមគ្រឹះស្ថានសិក្សា។
រយៈពេលកន្លងមកនេះ បាតុភាពអសកម្ម និងអសីលធម៌មួយចំនួនបានកើតឡើងទាំងនៅក្នុង ទាំងនៅ
បរិវេណនៃគ្រឹះស្ថានសិក្សា ដែលបានបង្កឱ្យមានគ្រោះថ្នាក់ផ្សេងៗ ក្នុងករណីខ្លះរហូតដល់បាត់បង់អាយុជីវិតរបស់យុវជនក្នុងវ័យសិក្សា។ ក្រសួងអប់រំ យុវជន និងកីឡាទទួលស្គាល់នូវរាល់កង្វល់ និង ការព្រួយបារម្ភនានាររបស់សាធារណជន មាតាបិតា អ្នកអាណាព្យាបាល និងសិស្ស និស្សិតទាំងអស់ ព្រមទាំងចូលរួមសោកស្តាយនិងរំលែកទុក្ខ ចំពោះក្រុមគ្រួសារដែលទទួលរងផលប៉ះពាល់ ដោយសារហេតុការណ៍ទាំងនេះ។
ក្នុងគោលបំណងទប់ស្កាត់នូវបាតុភាពអសកម្ម និងអសីលធម៌ទាំងនេះនៅថ្ងៃខាងមុខ ក្រសួង អប់រំយុវជននិងកីឡា សូមអំពាវនាវ និងណែនាំដល់អាជ្ញាធរអប់រំគ្រប់លំដាប់ថ្នាក់ គ្រឹះស្ថានសិក្សា លោកគ្រូ អ្នកគ្រូយុវជន សិស្សានុសិស្ស និងយុវជន ព្រមទាំងមាតាបិតា អ្នកអាណាព្យាបាល សហគមន៍ និង អាជ្ញាធរមានសមត្ថកិច្ចគ្រប់លំដាប់ថ្នាក់ សូមចូលរួមពង្រឹង និងលើកកម្ពស់ការគោរពវិន័យ បទបញ្ជាផ្ទៃក្នុង និង ការអប់រំសីលធម៌
ដូចខាងក្រោម ៖
១. គណៈកម្មការគ្រប់គ្រងសាលារៀន ៖ គណៈកម្មការទ្រទ្រង់សាលារៀន នាយកសាលារៀន និងគ្រូបន្ទុកថ្នាក់ ត្រូវផ្សព្វផ្សាយ និងពង្រឹងការអនុវត្តឱ្យបានហ្មត់ចត់បំផុតនូវ “សេចក្តីណែនាំ ០១. សណន ចុះថ្ងៃ
ទី២០ ខែមករា ឆ្នាំ២០២០ របស់ក្រសួងអប់រំ យុវជន និងកីឡា ស្តីពីការពង្រឹងការអនុវត្ត បទបញ្ជាផ្ទៃក្នុងនៅតាមគ្រឹះស្ថានសិក្សាសាធារណៈនិងឯកជន” ជាពិសេសត្រូវពង្រឹងយន្តការរបស់ ក្រុមប្រឹក្សាវិន័យនៅតាម
គ្រឹះស្ថានសិក្សានីមួយៗ ឱ្យបានរឹងមាំ។
២. ក្រុមប្រឹក្សាយុវជន ក្រុមប្រឹក្សាកុមារ និងរចនាសម្ព័ន្ធអង្គការយុវជនដែលមាននៅតាម គ្រឹះស្ថានសិក្សារួមទាំងកាយរឹទ្ធិជាតិកម្ពុជា យុវជនកាកបាទក្រហម ត្រូវចូលរួមឱ្យបានផុសផុលបំផុតជាមួយ សិស្សានុសិស្សក្នុងការកសាងមិត្តភាព សាមគ្គីភាព ការជួយយកអាសារគ្នា ការគោរពវិន័យនិងក្រមសីលធម៌ ការគោរពសេចក្តីថ្លៃថ្នូររបស់បុគ្គល គ្រួសារ សាលារៀន និងសង្គមជាតិ។
៣. គ្រឹះស្ថានសិក្សាទាំងអស់ត្រូវប្រើប្រាស់ពេលវេលាសមស្របសម្រាប់ការកោះប្រជុំ សិស្សានុសិស្សតាមថ្នាក់ តាមក្រុម ឬក្នុងអំឡុងពេលមុនឬក្រោយកម្មវិធីគោរពទង់ជាតិ ដើម្បីធ្វើការពន្យល់ ណែនាំដាស់តឿនក្រើនរំលឹកដល់សិស្សានុសិស្សទាំងអស់ឱ្យគោរពវិន័យ និងបទបញ្ជាផ្ទៃក្នុងរបស់ គ្រឹះស្ថានសិក្សា។ គ្រឹះស្ថានសិក្សា ត្រូវជំរុញការសិក្សាស្វែងយល់អំពីអត្ថន័យ និងការច្រៀងបទចម្រៀង “ពង្សាវតារខ្មែរ” ដើម្បីលើកតម្កើងភាពមោទភាពឧត្តមភាពជាតិនិយម និងការជឿជាក់លើព្រះរាជាណាចក្រកម្ពុជា ពីគ្រប់ ស្រទាប់សិស្សានុសិស្ស។ សេចក្តប្រកាសព័ត៌មាននេះ និងបទបញ្ជាផ្ទៃក្នុងរបស់គ្រឹះស្ថានសិក្សាត្រូវ ផ្សព្វផ្សាយជាសាធារណៈ លើបញ្ជរព័ត៌មាននៅតាមគ្រឹះស្ថានសិក្សា និងប្រព័ន្ធផ្សព្វផ្សាយតាមគ្រប់រូបភាព។
៤. គ្រូបន្ទុកថ្នាក់ និងគ្រូប្រចាំមុខវិជ្ជា ត្រូវបន្តដាស់តឿន ក្រើនរំលឹក និងបញ្ឈប់ការអប់រំចរិយា សម្បទាបន្ថែមលើពុទ្ធិសម្បទា និងបំណិនសម្បទានៅគ្រប់ម៉ោងសិក្សាទាំងអស់ដល់សិស្សានុសិស្សឱ្យ អស់ពីលទ្ធភាព។
ក្រសួងអប់រំ យុវជន និងកីឡាសូមថ្លែងអំណរគុណ និងសូមអំពាវនាវដោយទទូច ចំពោះ មាតាបិតា អ្នកអាណាព្យាបាល និងអ្នកពាក់ព័ន្ធនានា សូមមេត្តាចូលរួមជាមួយក្រសួងអប់រំ យុវជន និងកីឡា ដើម្បីចំណាយពេលវេលាបន្ថែម ទាំងនៅតាមគេហដ្ឋាន ឬទីកន្លែងផ្សេងទៀត ក្នុងការបន្តអប់រំ ពន្យល់ ណែនាំបុត្រធីតាគ្រប់ៗរូបឱ្យដើរលើគន្លងនៃសីលធម៌ និងចរិយាធម៌។ក្រសួងអប់រំ យុវជន និងកីឡាសូមសំណូមពរដល់អាជ្ញាធរមានសមត្ថកិច្ចគ្រប់លំដាប់ថ្នាក់ សូមបន្តពង្រឹងការអនុវត្តច្បាប់ ការអនុវត្តគោលនយោបាយភូមិ-ឃុំមានសុវត្ថិភាព” ដើម្បីរក្សា សណ្តាប់ធ្នាប់សាធារណៈសន្តិសុខ និងសុវត្ថិភាព សម្រាប់សហគមន៍ និងគ្រឹះស្ថានសិក្សាទាំងអស់ នៅទូទាំង ព្រះរាជាណាចក្រកម្ពុជា។
ដើម្បីទប់ស្កាត់បញ្ហាបាតុភាព ភាពអសកម្មនៅតាមគ្រឹះស្ថានសិក្សាមួយចំនួន ការធ្លាក់ចុះនៃ សីលធម៌សង្គមការប្រើប្រាស់អំពើហិង្សា និងភាពខ្វះទំនួលខុសត្រូវរបស់សិស្សសាលា មន្ទីរអប់រំ យុវជន និងកីឡា រាជធានីភ្នំពេញបានរៀបចំកិច្ចប្រជុំស្ដីពី ការត្រួតពិនិត្យ និងពង្រឹង ប្រសិទ្ធភាពការងារតាមគ្រឹះស្ថានសិក្សាសាធារណៈ និងឯកជន។ឮ
ក្នុងនោះដែរការងារសំខាន់ៗ ដែលត្រូវបានយកមកពង្រឹងបន្ថែម ក្នុងកិច្ចប្រជុំនេះរួមមាន៖
ការពង្រឹងការគ្រប់គ្រងសាលារៀន ដែលក្នុងនោះអ្នកដែលពាក់ព័ន្ធមាន នាយក នាយរង- នាយិការង គ្រូបន្ទុកថ្នាក់ គ្រូបន្ទុកផ្នែកក្រុមប្រឹក្សាកុមារ យុវជន ។ តួនាទី ភារកិច្ចរបស់ការិយាល័យអប់រំ យុវជន និងកីឡាខណ្ឌ ដែលមានតួនាទីក្នុងការពង្រឹងការងារតាមដាន ការដឹកនាំគ្រប់គ្រងដំណើរការសាលារៀន ត្រូវមានការប្រជុំប្រចាំខែឱ្យបានទៀងទាត់ ត្រូវមានម្ចាស់ការ ចុះពិនិត្យ និងដោះស្រាយបញ្ហាដែលកើតមាននៅតាមគ្រឹះស្ថានសិក្សាក្រោមឱវាទត្រូវរាយការណ៍ពីសកម្មភាពជាប្រចាំនៅតាមគ្រឹះស្ថានសិក្សារបស់ខ្លួន។
កិច្ចប្រជុំនេះបានប្រព្រឹត្តទៅក្រោមការដឹកនាំដោយលោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ ដែលក្នុងនោះមានការចូលរួមពីសំណាក់ថ្នាក់ដឹកនាំមន្ទីរ ប្រធានការិយាល័យនៃមន្ទីរ ប្រធានការិយាល័យអប់រំ យុវជន និងកីឡាខណ្ឌ នាយកវិទ្យាល័យ នាយកអនុវិទ្យាល័យ និងនាយកសាលាបឋមសិក្សា៕ ដោយ៖កូឡាប