កំពត៖ករណីឧកញ៉ា គុយ លៀបគី ព្រៃកោងកាងនៅមាត់សមុទ្រ ដែលជាដែនសហគមន៍នេសាទព្រែកត្នោត ស្ថិតនៅភូមិព្រែកត្នោត ឃុំព្រែកត្នោត ស្រុកទឹកឈូ ខេត្តកំពត រំលោភយកធ្វើកម្មសិទ្ធិ និងត្រូវបានក្រសួងកសិកម្ម រដ្ឋបាលជលផល និងអាជ្ញាធរខេត្តកំពត ចុះទៅឃាត់សកម្មភាពចាក់ដីលុបព្រៃកោងកាងដែលជាជម្រកធនធានសមុទ្រ និងជាដែនសហគមន៍នេសាទព្រែកត្នោតកាលពីថ្ងៃទី១៨ ខែមករា ឆ្នាំ២០២០នោះ គួរតែមានចំណាត់ការផ្លូវច្បាប់លើឧកញ៉ា គុយ លៀបគី មិនគួរត្រឹមបញ្ជាអោយកាយដីចេញវិញ។ ហើយបណ្ដោយអោយអ្នកប្រព្រិត្តិរួចខ្លួនពីសំណាញ់ច្បាប់នោះទេ គឺមិនសមទាល់តែសោះ។ រឿងនេះប្រសិនអ្នកចាក់ដីលុបព្រៃកោងត្រឹមតែជាពលរដ្ឋធម្មតា និងត្រូវជាប់គុកហើយ ដូច្នេះសូមលោកអភិបាលខេត្តកំពត ជាវ តាយ និងថ្នាក់ដឹកនាំក្រសួងកសិកម្មមេត្តាពិចារណាផង។
តាមលោក អេង ជាសាន ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល បានប្រាប់សារព័ត៍មានឱ្យដឹងថា ៖ ការចាក់ដីចូលព្រៃកោងកាងរំលោភយកដែនសហគមន៍នេសាទព្រែកត្នោតនេះ មានប្រវែង១០០ម៉ែត្រ និងទទឹង១០ម៉ែត្រ។ ហើយការចាក់ដីនេះធ្វើឱ្យខូចខាតបង្គោលឡាក់ ព្រំប្រទល់ព្រៃកោងកាងចំនួន៣ដើម និងលុបថ្នាល់បណ្តុះកូនកោងកាងចំនួន៧ពាន់ដើម។
តាមអាជ្ញាធរ និងមន្ត្រីជំនាញអះអាងថា៖ ឧកញ៉ា គុយ លៀបគី ពិតជាថ្លើមធំមែន រហូតដល់លោករដ្ឋមន្ត្រី វេង សាខុន បានបញ្ជាអោយលោក ឃុន សាវឿន អនុរដ្ឋលេខាធិការ ក្រសួងកសិកម្មរុក្ខា ប្រម៉ាញ់ និងនេសាទ ដឹកនាំមន្ដ្រីជំនាញចុះពិនិត្យ និងហាមឃាត់បណ្ដោះអាសន្ន ហើយសំណូមពរឲ្យអាជ្ញាធរមូលដ្ឋានបញ្ជាឲ្យបញ្ឈប់សកម្មភាពនេះ និងកាយដីចេញ ដើម្បីរក្សាសម្បត្តិសាធារណៈរបស់រដ្ឋ ការពារព្រៃកោងកាងដែលជាផ្ទះសុវត្ថិភាពរបស់ជីវៈចម្រុះ និងជួយដល់ប្រព័ន្ធអេកូឡូស៊ី។
លោក ម៉ម សំណាង ជាមេការគ្រប់គ្រងលើការចាក់ដីបានបញ្ជាក់ថា៖ ការចាក់ដីធ្វើផ្លូវនេះមានទទឹង១០ម៉ែត្រ បណ្តោយ ២៥០ម៉ែត្រ សម្រាប់ធ្វើផ្លូវសាធារណៈ។ លោក ម៉ម សំណាង បន្តថា៖ ការចាក់ដីនេះ លោកទទួលម៉ៅការពីឧកញ៉ា គុយ លៀបគី។បន្ទាប់ពីសួរនាំរួចនោះ មន្ត្រីខណ្ឌរដ្ឋបាលជលផលខេត្តកំពត បានណែនាំឱ្យផ្អាកសកម្មភាពចាក់ដីនេះ ដើម្បីស្វែងរកឯកសារពាក់ព័ន្ធផ្សេងៗ។
ពាក់ព័ន្ធការចាក់ដីលុបព្រៃកោងកាង និងដែនសហគមន៍នេសាទនេះ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មិនត្រឹមអោយអនុរដ្ឋលេខាខាងលើដឹកនាំក្រុមការងារពិនិត្យនិងផ្អាកសកម្មភាពចាក់ដីរំលោភយកព្រៃកោងកាងប៉ុណ្ណោះទេ គឺលោករដ្ឋមន្ត្រីថែមទាំងបញ្ជាបញ្ជាឱ្យលោក អេង ជាសាន ចុះទៅពិនិត្យជាបន្ទាន់។
លោក អេង ជាសាន បានឱ្យដឹងថា៖ ការចាក់លុបព្រៃកោងកាងនេះ វានាំឱ្យប៉ះពាល់ដល់ជម្រកធនធានសមុទ្រ ហើយក៏ប៉ះពាល់ដល់ការនេសាទរបស់ប្រជាសហគមន៍ផងដែរ។
ករណីខាងលើនេះ លោកជាវ តាយ អភិបាលខេត្តកំពត បញ្ជាឲ្យគ្រឿងចក្រកាយដី ដែលរំលោភព្រៃកោងកាង នៅឃុំព្រែកត្នោត ស្រុកទឹកឈូ ចេញវិញហើយ។
បន្ទាប់ពី រដ្ឋបាលខេត្តកំពត ដែលដឹកនាំដោយ លោក ជាវ តាយ អភិបាលខេត្ត ចុះពិនិត្យទីតាំងជាក់ស្តែងចាក់ដីរំលោភចូលព្រៃកោងកាង ជាមួយនិង លោក ឃុន សាវឿន អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទ និងលោក អេង ជាសាន ប្រតិភូរាជរដ្ឋាភិបាលទទួលបន្ទុករដ្ឋបាលជលផល រួចមក នៅរសៀល ថ្ងៃទី២០ ខែមករា ឆ្នាំ២០២០ លក ជាវ តាយ បានបញ្ជាឲ្យគ្រឿងចក្រកាយដី ដែលរំលោភព្រៃកោងកាង នៅឃុំព្រែកត្នោត ស្រុកទឹកឈូ ចេញវិញហើយ។
លោកអភិបាលខេត្ត បានលើកបញ្ជាក់ថា: អ្វីដែលជាកង្វល់របស់ប្រជាពលរដ្ឋក្នុងសហគមន៍គឺជាកង្វល់របស់រាជរដ្ឋាភិបាល។ ដូច្នេះរដ្ឋបាលខេត្តគ្មានអ្វីដែលទុកបណ្ដោយឲ្យការរំលោភបំពានណាមួយ ដែលផ្ទុយនឹងការអនុវត្តច្បាប់នោះទេ។ ជាលទ្ធផល រួមមាន៖ ក្រុមហ៊ុនត្រូវផ្អាកធ្វើសកម្មភាពចាក់ដី។ ក្រុមហ៊ុនត្រូវកាយដី ដែលចាក់ចូលសមុទ្រ ចេញវិញជាបន្ទាន់៕ ដោយ៖កូឡាប
