ខេត្តឧត្តរមានជ័យ៖ បណ្តាញសង្គមទម្លាយឈ្មោះមន្ត្រីក្នុងមន្ទីរមុខងារសាធារណខេត្តឧត្តរមានជ័យម្នាក់ ដែលបង្កើតមុខរបរថ្មីមួយទៀត ក្នុងមន្ទីរបស់ខ្លួន គឺរត់ការមនុស្សជាង១០នាក់ ដាក់ពាក្យសុំចូលបម្រើការងារ ក្នុងក្របខ័ណ្ឌស៊ីវិល បម្រើនៅមន្ទីរនេះ ប្រមូលបានប្រាក់ជាង១០ម៉ឺនដុល្លារអាមេរិក ហើយបិទសាប៊ូ រត់គេចខ្លួនបាត់។
ប្រភពអះអាងថា មន្ត្រីក្នុងមន្ទីរមុខងារសាធារណៈនេះ មានឈ្មោះ អ៊ឹម អន អនុប្រធានការិយាល័យមួយ ក្នុងមន្ទីរមុខងារសាធារណខេត្តឧត្តរមានជ័យ បានប្រមូលលុយជាងដប់ម៉ឺនដុល្លារ ពីជនរងគ្រោះចំនួន១២នាក់ ជាសិស្សទើបប្រឡងបាក់ឌុបជាប់ ក្នុងឆ្នាំកន្លងទៅ រស់នៅ ស្រុកបន្ទាយ ក្រុងសំំរោង ខេត្តឧត្តរមានជ័យ បានឱ្យធ្វើការដាក់់់ពាក្យចូលមន្ត្រីក្របខ័ណ្ឌ និងបង់់ប្រាក់ជាមុនក្នុងម្នាក់ៗចំំនួន៦.៥០០ដុល្លារ លើសុំណុំបែបបទឯកសារ ដាក់ជូនទៅក្រសួងមុខងារសាធារណ: និងបានសន្យាថា ឈ្មោះក្របខ័ណ្ឌអ្នកដាក់ទៅក្រសួងនេះ ចេញ នឹងត្រូវប្រកាសក្នុងខែកុម្ភៈឆ្នាំ២០២០។
ប្រភពដដែល បានបញ្ជាក់ថា លោកអ៊ឹន អន នេះមានស្រុកកំណើតនៅ ភូមិដងប្លៀក ឃុំដួង ស្រុកស្ទោង ខេត្តកំពង់ធំ។ បច្ចុប្បន្នបាត់ដំណឹងសូន្យឈឹង រហួតអស់រយៈពេល១ខែនេះ នៅកន្លែងធ្វើការងារនៅក្នុងមន្ទីរក៏មិនដែលឃើញមុខ និងទូរស័ព្ទ ខលមិនដែលចូលដែរ។
ពាក់ព័ន្ធនឹងករណីខាងលើនេះ លោក អ៊ុក ឧត្តម ប្រធានមន្ទីរមុខងារសាធារណៈខេត្តនេះ បានឱ្យដឹងនៅថ្ងៃទី២០ខែមករានេះថា លោកទទួលស្គាល់់ឈ្មោះ អ៊ឹម អន ជាមន្ត្រីបម្រើការក្នុងមន្ទីរមុខងារសាធារណៈ តែពាក់់ព័ន្ធការជ្រើសរើស មន្ត្រីចូលក្របខ័ណ្ឌនៅខាងក្រៅ មកបម្រើការងារមន្ទីរនេះ លោកមិនបានដឹងនោះទេ តែបើមន្ត្រីណាអនុវត្តន៍ខុសពីគោលការណ៍ ត្រូវទទួលទោសតាមច្បាប់មន្ត្រីរាជការ៕ដោយ៖បញ្ញាស័ក្តិ
