ភ្នំពេញ ៖ នគរបាលខណ្ឌសែនសុខ បានចាប់ជនសង្ស័យម្នាក់ លួចរថយន្ត Lexus 200T ហើយសមត្ថកិច្ចក៏បានចុះត្រួតពិនិត្យ នៅយានដ្ឋានជួសជុលរថយន្តមួយកន្លែង ហើយដកហូតរថយន្ត១គ្រឿង ម៉ាកlexus ២០០t គ្មានផ្លាកលេខដែលជនសង្ស័យលួចទៅនោះ បញ្ជូនទៅអធិការដ្ឋាននគរបាលខណ្ឌពោធិ៍សែនជ័យ ដែលជាកន្លែងសាមីប្រព្រឹត្តបទល្មើស។
អធិការដ្ឋាននគរបាលខណ្ឌសែនសុខ បានឲ្យដឹងថា នៅថ្ងៃទី២០ ខែមករា ឆ្នាំ២០២០ វេលាម៉ោ១៣ និង២០នាទី ប៉ុស្តិ៍នគរបាលរដ្ឋបាលគោកឃ្លាង បានសហការជាមួយនាយកដ្ឋាននគរបាលព្រហ្មទណ្ឌ ធ្វើការត្រួតពិនិត្យនៅយានដ្ឋានជួសជុលរថយន្ត ១កន្លែងស្ថិតនៅភូមិត្រេពាំងស្វាយ សង្កាត់គោកឃ្លាង ខណ្ឌសែនសុខ និងបានឃាត់ខ្លួនម្ចាស់យានដ្ឋាន១នាក់ ឈ្មោះស្រេង ម៉េងស្រៀង ភេទប្រុស អាយុ២៧ឆ្នាំ ស្នាក់នៅក្នុងយានដ្ឋានខាងលើ ពាក់ព័ន្ធករណីបាត់រថយន្តនៅសង្កាត់ចោមចៅ ខណ្ឌពោធិ៍សែនជ័យ និងបានដកហូតរថយន្ត១គ្រឿង ម៉ាកlexus ២០០t គ្មានផ្លាកលេខ ។
បច្ចុប្បន្នជនសង្ស័យ និងវត្ថុតាងត្រូវបានបញ្ជូនទៅអធិការដ្ឋាននគរបាលខណ្ឌពោធិ៍សែនជ័យ និងកម្លាំងនាយកដ្ឋាននគរបាលព្រហ្មទណ្ឌ ដើម្បីយកទៅធ្វើការបន្ត ៕ដោយ៖បញ្ញាស័ក្តិ