ខេត្តព្រះសីហនុ៖ មន្ត្រីនគរបាលអន្តោប្រវេសន៍ ប្រចាំច្រកទ្វារអន្តរជាតិខេត្តព្រះសីហនុ បានឲ្យដឹងថា មាននាវាទេសចរណ៍បរទេសមួយគ្រឿងទៀត បានចូលចតកំពង់ផែក្រុងព្រះសីហនុ នៅម៉ោង៧ព្រឹកថ្ងៃទី២១ ខែមករា ឆ្នាំ២០២០។
នាវានេះ បានដឹកភ្ញៀវទេសចរចម្រុះជាតិសាសន៍ចំនួន ១៨០៦នាក់ ហើយចូលមកទស្សនាប្រទេសកម្ពុជា ក៏ដូចជាទស្សនាក្រុងព្រះសីហនុ ក្នុងរយៈពេលមួយថ្ងៃ។
មន្ត្រីនគរបាលអន្តោប្រវេសន៍ដដែលឲ្យដឹងបន្តថា នាវានេះមានកងនាវិកសរុប ៨២១នាក់ ដោយមានដំណើរចេញពីប្រទេសថៃ ចូលមកទស្សនាប្រទេសកម្ពុជា មុននឹងធ្វើដំណើរបន្ត ឆ្ពោះទៅកាន់ប្រទេសវៀតណាម នៅម៉ោង ២១យប់ថ្ងៃទី២១ ខែមករា ឆ្នាំ២០២០៕ ដោយ៖ ដែន សីមា
