ប្រទេសស្រីលង្កាព្យាយាមបង្កើតកំណត់ត្រាពិភពលោក ក្នុងការប្រមូលផ្តុំកូនភ្លោះឲ្យច្រើនបំផុត ប៉ុន្តែព្រឹត្តិការណ៍នោះទំនងបរាជ័យដោយសារតែ ចំនួនកូនភ្លោះដ៏ច្រើនហួសពីការរំពឹងទុកបានមកចូលរួម។
អ្នករៀបចំព្រឹត្តិការណ៍ឈ្មោះ កូនភ្លោះស្រីលង្កា (Sri Lanka Twins) បានស្នើឲ្យកូនភ្លោះទាំងអស់ធ្វើការប្រមូលផ្តុំគ្នានៅពហុកីឡដ្ឋាន ស្ថិតក្នុងរដ្ឋធានី Colombo ដើម្បីព្យាយាមបំបែកកំណត់ពិភពលោក (Guiness World Record) ដែលបង្កើតឡើងដោយតៃវ៉ាន់តាំងពីឆ្នាំ ១៩៩៩។
កំណត់ត្រារបស់តៃវ៉ាន់នៅពេលនោះគឺមានកូនភ្លោះចំនួន ៣.៩៦១គូ កូនភ្លោះ ៣ចំនួន ៣៧ឈុត និងកូនភ្លោះ ៤ចំនួន ៤ឈុត។
ប៉ុន្តែការប៉ុនប៉ងរបស់ស្រីលង្កាត្រូវបានបង្អាក់ ដោយសារតែចំនួនកូនភ្លោះយ៉ាងច្រើន បានមកប្រមូលផ្តុំគ្នានៅពហុកីឡដ្ឋានកាលពីថ្ងៃចន្ទម្សិលមិញនេះ បង្កឲ្យមានការតម្រង់ជួរយ៉ាងវែង និងបង្អាក់ដល់ការចុះឈ្មោះ។
ហ្វូងកូនភ្លោះមកយ៉ាងបែបនេះ ធ្វើឲ្យមានការតម្រង់ជួរយ៉ាងវែង ដើម្បឲ្យមានការត្រួតពិនិត្យលើសំបុត្រកំណើត ហើយកូនភ្លោះដែលចូលរួមត្រូវឈរឲ្យគេរថតរូបភាព និងត្រូវរង់ចាំយ៉ាងតិច ៥នាទី។
អ្នករៀបចំមានគោលបំណងបំបែកកំណត់ត្រាដែលកាន់កាប់ដោយតៃវ៉ាន់ ជាមួយនឹងកូនភ្លោះត្រឹមតែ ៥.០០០គូប៉ុណ្ណោះ ប៉ុន្តែមានកូនភ្លោះរហូតដល់ ១៤.០០០គូបានចុះឈ្មោះជាមួយនៅអង្គការនៅស្រីលង្កា។ នេះបើតាមសេចក្តីរាយការណ៍របស់ AFP។
អ្នករៀបចំព្រឹត្តិការណ៍និយាយថា ចំនួនអ្នកចូលរួមច្រើនពេក ប្រហែលជាមិនអាចស្របតាមគោលការណ៍ដែលកំណត់ដោយអង្គារ Guiness World Records បានឡើយ ទោះបីជាគេមានពេល ២សប្តាហ៍មុនពេលដឹងថា តើកំណត់ត្រាពួកគេ អាចបង្កើត ឬមិនបង្កើតបានយ៉ាងណាក៏ដោយ។
ទោះយ៉ាងណា អ្នករៀបចំ ប្តេជ្ញាថានឹងរៀបចំព្រឹត្តិការណ៍ផ្សេងទៀត ចំណែកកូនភ្លោះទាំងអស់ដែលបានចូលរួម បាននិយាយថាពួកគេសប្បាយចិត្តក្នុងការសាកល្បងម្តងទៀត៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
