សៀមរាប៖ សិស្សថ្នាក់ទី៧ នៃ សាលាវិទ្យាល័យហ៊ុនសែនស្វាយធំ ប្រមាណ៥៥នាក់ ស្រី៣២នាក់ បានកើតអាការះ ឈឺក្បាល ហៀរទឹកភ្នែក និងរកក្អួត ដែលសង្ស័យថា មូលហេតុដែលបណ្តាលអោយមាន ហេតុការណ៍នេះ កើតឡើង គគឺបណ្តាលមកពីការដុតសំរាមក្បែរសាលារៀន។
លោកវរសេនីយ៍ទោ លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា កាលពីវេលាម៉ោង៣:០០នាទីរសៀលថ្ងៃទី២២ ខែមករា ឆ្នាំ២០២០នេះ សិស្សថ្នាក់ទី៧ នៃ សាលាវិទ្យាល័យហ៊ុនសែនស្វាយធំ ប្រមាណ៥៥នាក់ ស្រី៣២នាក់ បានកើតអាការះ ឈឺក្បាល ហៀរទឹកភ្នែក និងរកក្អួត បន្ទាប់ពីទទួលសេចក្តីរាយការណ៍ ពីគ្រូនាយកសាលា ខ្ញុំបាទ បានដឹកនាំកម្លាំងនគរបាលប៉ុស្តិ៍កណ្តែក និងកម្លាំងនគរបាលនៃអធិការដ្ឋានស្រុកប្រាសាទបាគង សហការណ៍ជាមួយ កម្លាំងគណៈបញ្ជាការឯកភាពស្រុកប្រាសាទបាគង ដែលមានលោកសូរ ប្លាតុង ជាប្រធាន ចុះទៅដល់ទីកន្លែងកើតហេតុ ដើម្បីជួយអន្តរាគមន៍ និងជូនក្មួយៗសិក្សានុសិស្សខាងលើ ទៅមណ្ឌលសុខភាព ដើម្បីពិនិត្យនិងព្យាបាល។
លោកបានអធិការបានបន្តថា ក្រោយធ្វើការពិនិត្យបរិវេណសាលា ក្រុមការងារបានដាក់ការសង្ស័យថា មូលហេតុដែលបណ្តាលអោយមាន ហេតុការណ៍នេះ កើតឡើង គឺបណ្តាលមកពីការដុតសំរាមក្បែរសាលារៀន បច្ចុប្បន្ន ស្ថានភាព ក្មួយៗសិក្សានុសិស្សខាងលើទាំង៥៥នាក់ មានភាពប្រសើរជាធម្មតាវិញហើយ៕ ដោត៖កូឡាប
