ខេត្តកំពង់ស្ពឺ ៖ នាយឧត្តមសេនីយ៍ ហ៊ឹ យ៉ាន អគ្គស្នងការរងនគរបាលជាតិ បានណែនាំមន្ដ្រីនគរបាលចរាចរណ៍ទាំងអស់ ត្រូវបំពេញការងារប្រកបដោយក្រមសីលធម៌ វិជ្ជាជីវៈ និងការទទួលខុសត្រូវខ្ពស់ ហើយលោកថា ឆ្នាំ២០២០នេះ គឺជាឆ្នាំដែលត្រូវរឹតបន្តឹងច្បាប់ចរាចរណ៍ ។
ក្នុងពិធីបិទវគ្គបំប៉នជំនាញចរាចរណ៍ផ្លូវគោក នៅសាលានគរបាលជាតិមិត្តភាពកម្ពុជា-វៀតណាម នៅព្រឹកថ្ងៃទី២២ ខែមករា ឆ្នាំ២០២០នេះលោកនាយឧត្តមសេនីយ៍ ហ៊ឹម យ៉ាន បានថ្លែងថា នៅពេលចេញទៅបំពេញការងារវិញ ត្រូវខិតខំរៀបចំសន្ដិសុខ សណ្ដាប់ធ្នាប់សាធារណៈឲ្យកាន់តែល្អប្រសើរ ស្របតាមការរីកចម្រើនរបស់ប្រទេសជាតិ ក្នុងនោះត្រូវផ្ដោតសំខាន់ទៅលើសណ្ដាប់ធ្នាប់ចរាចរណ៍ ។ “ចំណុចនេះយើងត្រូវអនុវត្តតាមអនុសាសន៍ដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា គឺថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍ ឲ្យមានប្រសិទ្ធភាពខ្ពស់ ហើយសម្ដេចក្រឡាហោម លោកបានបន្ថែមមួយទៀត គឺឆ្នាំ២០២០នេះ គឺជាឆ្នាំនៃការរឹតបណ្ដឹងអនុវត្តច្បាប់” អគ្គស្នងការរងនគរបាលជាតិបានថ្លែងយ៉ាងដូច្នេះ។
នាយឧត្តមសេនីយ៍ បានកត់សម្គាល់ថា ភារកិច្ចស្នួលរបស់មន្ដ្រីនគរបាលចរាចរណ៍ គឺមានពីរ រួមមាន ទី១៖ រៀបចំសណ្ដាប់ធ្នាប់ និងទី២៖ ទប់ស្កាត់គ្រោះថ្នាក់ចរាចរណ៍ ហើយលោកសង្ឃឹមថា មន្ដ្រីនគរបាលចរាចរណ៍នៅទូទាំងប្រទេស នឹងអនុវត្តការងារតាមតួនាទីភារកិច្ច របស់ខ្លួនប្រកបដោយក្រមសីលធម៌ វិជ្ជាជីវៈ និងមានប្រសិទ្ធភាពខ្ពស់ សំដៅកាត់បន្ថយគ្រោះថ្នាក់ចរាចរណ៍ ។
យោងតាមរបាយការណ៍របស់លោក ឧត្តមសេនីយ៍ឯក អ៊ុ អុន អនុប្រធានសេនាធិការ និងជានាយកសាលានគរបាលជាតិមិត្តភាពកម្ពុជា-វៀតណាម បានឲ្យដឹងថា វគ្គបំប៉នជំនាញចរាចរណ៍ផ្លូវគោក នាពេលនេះ មានសិក្ខាកាម សរុបចំនួន៨៩នាក់ មកពីស្នងការដ្ឋាននគរបាលរាជធានី-ខេត្ត និងនាយកដ្ឋាន-អង្គភាព ចំនួន២៣ ។ បើកវគ្គបំប៉នជំនាញចរាចរណ៍ផ្លូវគោក សិក្សារយៈពេល៣ខែ ចាប់ដំណើរការពីថ្ងៃទី២៨ខែតុលា ឆ្នាំ២០១៩ ដល់ថ្ងៃទី២២ខែមករា ឆ្នាំ២០២០ ។
សូមបបញ្ជាក់ថា នៅក្នុងឆ្នាំ២០១៩ គ្រោះថ្នាក់ចរាចរណ៍នៅទូទាំងប្រទេសបានកើតចំនួន ៤.១២១លើក សម្លាប់មនុស្ស ១.៩៨១នាក់ និងរងរបួស ៦.១៤១នាក់ ដែលគិតជាមធ្យមភាគក្នុងមួយថ្ងៃ មានមនុស្សស្លាប់ ៥,៤នាក់។ គ្រោះថ្នាក់ចរាចរណ៍នេះកើតឡើង ភាគច្រើននៅក្នុងរាជធានីភ្នំពេញ ដែលមានតួលេខខ្ពស់ជាងគេ ស្លាប់ ៣៤៨នាក់ ខេត្តព្រះសីហនុ ស្លាប់ ១៤៩នាក់ និងខេត្តកណ្តាលស្លាប់ ១៤៣នាក់ ៕ ដោយ៖បញ្ញាស័ក្តិ
