តាកែវ៖ តាមការបញ្ជាក់ពីលោក មូល វិចិត្រ អភិបាលរងខេត្តតាកែវ បានឲ្យដឹងថា មកដល់ថ្ងៃទី ២៣ ខែមករា ឆ្នាំ២០២០នេះ អាការៈរបស់បងប្អូនកម្មការិនីរោងចក្រ វុណាម៉ី ដែលបានដួលសន្លប់ជិត ១០០នាក់ កាលពីរថ្ងៃមុននេះ ឥឡូវនេះ ស្ថានភាពសុខភាពរបស់ពួកគាត់ បានធូរស្រាលវិញហើយ កំពុងសម្រាកព្យាបាលនៅមន្ទីរពេទ្យបង្អែកស្រុកបាទី ។
បើយោងតាមគណៈកម្មាធិការ ដែលបង្កើតឡើង ដើម្បីស្វែករកមូលហេតុ នៃការដួលសន្លប់នេះដែរ ដែលមានការចូលរួមពីមន្រ្តី មកពីក្រសួងសុខាភិបាល និងក្រសួងការងារផងបានបង្ហាញថា មូលហេតុដែលនាំឲ្យកម្មករបន្តដួលសន្លប់ចំនួន ៩៧នាក់ ក្នុងរយៈពេលពីរថ្ងៃបន្តបន្ទាប់នេះ គឺបណ្ដាលមកពីកង្វះអ៊ុកស៊ីហ្សែន សម្រាប់ដកដង្ហើម និងដោយសារមិនមានខ្យល់ចេញចូល គ្រប់គ្រាន់នៅក្នុងរោងចក្រ។
សូមបញ្ជាក់ផងដែរថា នៅព្រឹកថ្ងៃទី២៣ ខែមករានេះដែរ លោក អ៊ូច ភា អភិបាលខេត្តតាកែវ បានចុះទៅពិនិត្យផ្ទល់នៅទីតាំងរោងចក្រវុណាម៉ី និងសួរសុខទុកដល់កម្មការិនីរោងចក្រ ដែលដួលសន្លប់នោះនៅមន្ទីរពេទ្យ ៕ ដោយ៖តាកែវ