ខេត្តស្វាយរៀង៖ លោក តូច ប៉ូលីវ៉ា អភិបាលរងខេត្តស្វាយរៀង ព្រឹកថ្ងៃទី២៣ ខែមករា ឆ្នាំ២០២០នេះបានស្នើដល់មន្ត្រីអប់រំ នៅទូទាំងខេត្ត ត្រូវខិតខំអប់រំ ទាំងចំណេះដឹង ចំណេះធ្វើ សីលធម៌ និងជីវធម៌ដល់សិស្សជំនាន់ក្រោយ ដែលជាទំពាំងស្នងឫស្សី និងជាអ្នកបន្តវេន។
ការស្នើបែបនេះរបស់លោក តូច ប៉ូលីវ៉ា បានធ្វើឡើងនៅក្នុងឱកាសដែលលោក បានអញ្ជើញក្នុងពិធីបើកសន្និបាត បូកសរុបការងារអប់រំ យុវជន និងកីឡា ឆ្នាំ២០១៨-២០១៩ របស់មន្ទីរអប់រំ យុវជននិងកីឡា ខេត្តស្វាយរៀង នៅសាលប្រជុំមន្ទីអប់រំ យុវជន និងកីឡា ដោយមានការចូលរួមពីលោក លោកស្រី ជានាយកសាលា ក្រុង-ស្រុកទាំង៨ ទូទាំងខេត្ត។
ក្នុងឱកាសនោះដែរ លោកអភិបាលរងខេត្ត បានមានប្រសាសន៍បន្តថាៈ មន្ត្រីអប់រំ គ្រប់លំដាប់ថ្នាក់ក្នុងខេត្ត ត្រូវបន្តភារកិច្ចដោយពង្រឹងឆន្ទៈមនសិការ វិជ្ជាជីវៈរបស់ខ្លួន អនុវត្តការងារឱ្យកាន់តែខ្លាំងក្លាថែមទៀត និងត្រូវលើកកម្ពស់សាមគ្គីភាពផ្ទៃក្នុង ឱ្យបានទូលំទូលាយ ដើម្បីលើកកម្ពស់កម្លាំងចលករក្នុងក្នុងកិច្ចអភិវឌ្ឍន៍ប្រទេស។
លោក អភិបាលរងខេត្ត បានបន្ថែមទៀតថា: មន្ត្រីអប់រំត្រូវយកចិត្តទុកដាក់ប្រមូលកុមារដល់វ័យសិក្សា ឱ្យចូលរៀនបានច្រើនជាអតិបរមាទាំងនៅទីប្រជុំជន និងនៅទីជនបទ ចាប់តាំងពីមត្តេយ្យសិក្សាឡើងទៅ និងរក្សាបាននៅស្ថិរភាពសិស្ស ឱ្យបន្តការសិក្សារៀនសូត្ររហូតចប់មធ្យមសិក្សា និងបន្តចូលរៀនរហូតបញ្ចប់ឧត្តមសិក្សា។
លោកបានលើកឡើងថា ត្រូវបន្តកែលម្អបរិស្ថានសាលារៀនឱ្យក្លាយជាទីមនោរម្យ ដើម្បីទាក់ទាញកុមារឱ្យចាប់អារម្មណ៍ និងមានចិត្តចង់ ទៅសាលារៀន ហើយទន្ទឹម និងការយកចិត្តទុកដាក់ទាំងបរិមាណ ក៏ត្រូវយកចិត្តទុកដាក់ពង្រឹងបន្ថែមទៀត នូវគុណភាពប្រកបដោយ គណៈនេយ្យភាព។ ជាការពិតណាស់ការពង្រឹងគុណភាពអប់រំ វាមានហេតុផលពាក់ព័ន្ធទៅនឹងកត្តាជាច្រើនដូចជា កត្តាគ្រូនិងសិស្ស កត្តាគ្រប់គ្រងដឹកនាំគឺជាកត្តាសំខាន់ដូចពាក្យស្លោកមួយពោលថា គ្រូល្អ សិស្សល្អ គ្រូពូកែ នាយកល្អ សាលាល្អ។
ក្រៅពីនេះក៏នៅមានកត្តាមួយចំនួនទៀត ដែលជះឥទ្ធិពលលើគុណភាពអប់រំជាអាទ៌មានកត្តាគ្រួសារ និងកត្តាសង្គមដែលជាកត្តាទាំងអស់នេះ ជាកត្តាដែលមិនអាចខ្វះកត្តាណាមួយបានឡើយ ពីព្រោះតាមគោលដៅអប់រំប្រកបដោយចីរភាព របស់យើង គឺកសាងពលរដ្ឋសកលប្រកប ដោយសមត្ថភាព ទាំងចំណេះដឹង ចំណេះធ្វើ មានជីវធម៌ និងចេះរួមរស់ជាមួយគ្នាប្រកបដោយភាពសុខដុមរមនា៕ដោយ៖វ៉ៃកូ
