ខេត្តស្វាយរៀង៖សិស្សានុសិស្សអនុវិទ្យល័យខ្ជាយ ដួលសន្លប់ជាបន្តបន្ទាប់ មូលហេតុខ្វះអាហារូបត្ថម្ភនិងបរិស្ថានមិនល្អ ហើយមូលហេតុដោយសារមានរថយន្ត និងគោយន្តដឹកដីធ្វើចរាចរណ៍ ក្បែរសាលាបង្កឱ្យហុយធូលីដី ចូលក្នុងបន្ទប់រៀនបង្កឲ្យសិស្សថប់ដង្ហើម ណែនទ្រូង ពិបាកដកដង្ហើមវិលមុខ ដួលសន្លប់តែម្តង។
ហេតុការណ៍ករណីសិស្សដួលសន្លប់ជាលើកទី២នេះ កើតឡើងនៅវេលាម៉ោង៨និង០០នាទីព្រឹក ថ្ងៃទី២៣ ខែមករា ឆ្នាំ២០២០ នៅសាលាអនុវិទ្យាល័យខ្ជាយ ស្ថិតនៅភូមិខ្ជាយ ឃុំរមាំងថ្កោល ស្រុកស្វាយទាប ខេត្តស្វាយរៀង។
លោកឡុច ខឹក នាយកអនុវិទ្យាល័យខ្ជាយ បានឲ្យដឹងថា សិស្សសរុបចំនួន១៨១នាក់ ស្រី៩៥នាក់ (ស្មើ៦ថ្នាក់) គឺថ្នាក់ទី៧ដល់ថ្នាក់ទី៩ ហើយក្នុង១ថ្នាក់ សិស្ស២៨នាក់ ទៅ៣០នាក់។ ហើយសិស្សដួលសន្លប់នេះ គឺថ្ងៃទី២០ មករា ដួលសន្លប់៧នាក់។ ហើយនៅថ្ងៃទី២៣នេះ ដួលសន្លប់១០នាក់ទៀត ប្រុស១នាក់ សរុបឡើងដល់១៧នាក់ ប្រុសម្នាក់។
លោកនាយកបន្តទៀតថា នៅព្រឹកថ្ងៃទី២៣នេះ ដួលសន្លប់១០នាក់ ក្នុងនោះមានអ្នកដួលសន្លប់ចាស់៣នាក់ (ថ្ងៃទី២០មករា មាន៧នាក់ ថ្ងៃ២៣សន្លប់ម្តងទៀត។ លោកនាយកបានបញ្ជាក់ថា បើតាមការស្រាវជ្រាវសិស្ស ដែលដួលសន្លប់ គឺមូលហេតុចម្បង ខ្វះអាហារូបត្ថម្ភ គាត់មិនបានហូបអាហារ ពេលព្រឹកភាគច្រើន ឳពុកម្តាយធ្វើការរោងចក្រ ម្យ៉ាងឳពុកម្តាយឲ្យប្រាក់មកហូបចំណីអាហារ នៅសាលារៀន ក្មេងមើលហ្វេសប៊ុកច្រើន អត់សូវបានសម្រាក និងដេកយប់ជ្រៅ បណ្តាលឲ្យអត់ងងុយខ្សោយ គ្មានកម្លាំង និងខ្វះអាហារូបត្ថម្ភ និងមកពីបរិស្ថានអាក្រក់ យានយន្តដឹកដីបង្កហុយធូលី ចូលបន្ទប់រៀន គ្មានកង្ហាល់ដាក់ក្នុងបន្ទប់ ហើយមន្រ្តីបរិស្ថាន បានប្រកាសថា មានកំហាប់សម្ពៀតខ្យល់៦០ធ្វើឲ្យពិបាក ដកដង្ហើមទើបដួលសន្លប់។ ករណីសិស្សដួលសន្លប់នេះដែរ លោកតូច ប៉ូលីវ៉ា អភិបាលរងខេត្ត ក៏បានចុះទៅពិនិត្យ និងសួរសុខទុក្ខសិស្សរងគ្រោះទាំងនោះដែរ។
លោកតូច ប៉ូលីវ៉ា បានមានប្រសាសន៍ថា ទី១ សិស្សរងគ្រោះខ្វះអាហារូបត្ថម្ភ មូលហេតុសិស្សដេក មិនបានគ្រប់គ្រាន់ ខ្លះមានម្តាយឆ្លងទន្លេ ខ្លះឳពុកម្តាយធ្វើការរោងចក្រ គ្មានពេលមើលថែទាំកូនៗ លើការញ៉ាំអាហារគ្រប់គ្រាន់ តាមរបរអាហារ ខ្វះការតាមដានពេលកូនដេក (មើលទូរស័ព្ទច្រើនមិនងាយចូលដេក) ពេលមកសាលាមិនញ៉ាំអាហារពេលព្រឹក (អត់អាហារពេលព្រឹក) ញ៉ាំចំណីអាហារលក់ក្នុងសាលាខ្វះអនាម័យ (ដូចជាទឹកផ្លែឈើហួលកាលបរិច្ឆេទ តែជ្រក់ធ្វើខ្លួនឯងគ្មានអនាម័យ និងមាននុំបាញ់ត្រាងដាក់ថង់នាំចូលពីប្រទេសវៀតណាម។ល។ មានយានយន្តដឹកដីធ្វើចរាចរណ៍ នៅជាប់របងសាលាធ្វើឲ្យហុយធូលីដី ចូលក្នុងបន្ទប់រៀន ទាំងនេះដែលនាំឲ្យសិស្សដែលមាន កម្លាំងខ្សោយដួលសន្លប់ជាបន្តបន្ទាប់។ លោកតូច ប៉ូលីវ៉ា ក៏បានអំពាវនាវដល់មាតាបិតា អាណាព្យាបាលសិស្សទាំងអស់ ត្រូវចូលរួមពិនិត្យតាមដានកូនៗបញ្ហា របបអាហារ កូនការរស់នៅ ដេកពូនឲ្យទៀងពេល កុំបណ្តោយឲ្យមើលទូរស័ព្ទដល់យប់ជ្រៅ និងបានដាក់បទបញ្ជាដល់លោកគ្រូអ្នកគ្រូ ពិនិត្យនិងសម្អាតទីធ្លាសាលាបន្ទប់រៀន អ្នកលក់ដូរក្នុងសាលាត្រូវឲ្យមានអនាម័យ ចំណីអាហារឬភេសជ្ជៈ ណាមិនគួរឲ្យលក់ត្រូវហាម និងកុំឲ្យយកមកលក់ទៀត។ លោកវេជ្ជបណ្ឌិត សរ សុខចំរើន ប្រធានមន្ទីរពេទ្យស្រុកស្វាយទាប បានឲ្យដឹងថា មកដល់ថ្ងៃ២៣មករា២០២០នេះ សិស្សរងគ្រោះនៅសង្គ្រោះបន្ទាន់១២នាក់ ស្រី១១នាក់ ប្រុស១នាក់ ក្នុងនោះធ្ងន់ធ្ងរ២នាក់ ស្រីទាំង២នាក់ ត្រូវបញ្ជូនទៅមន្ទីរពេទ្យខេត្តស្វាយរៀង ដើម្បីសង្គ្រោះ។ សូមបញ្ជាក់ថា នៅថ្ងៃទី២០មករា សិស្សអនុវិទ្យាល័យខ្ជាយ ដួលសន្លប៧នាក់ សិស្សវិទ្យាលយ័ប្រសូតិ ដួលសន្លប់៤នាក់ សរុប១១នាក់ នៅថ្ងៃទី២២ សិស្សវិទ្យាលយ័ប្រសូតិ ដួលសន្លប់៥នាក់ ស្រី ក្នុងនោះអ្នកដួលសន្លប់ចាស់២នាក់ ត្រូវបញ្ជូនទៅសង្គ្រោះនៅមន្ទីរពេទ្យខេត្តស្វាយរៀង។ នៅថ្ងៃទី២៣មករានេះ សិស្សអនុវិទ្យាល័យខ្ជាយដួល សន្លប់១០នាក់ ប្រុស១នាក់ អ្នកចាស់៣នាក់ ធ្ងន់ធ្ងរ១នាក់ស្រី។ ហើយអ្វីដែលគ្រោះលើគ្រោះនោះ កាលពីវេលាម៉ោង៩និង២៥នាទីព្រឹក គ្រូពេទ្យបានដឹកបញ្ជូនសិស្សដួលសន្លប់ធ្ងន់ធ្ងរម្នាក់ ទៅមន្ទីរពេទ្យខេត្តស្វាយរៀង ដើម្បីសង្គ្រោះបាន ជួបគ្រោះថ្នាក់ចរាចរណ៍ រថយន្តសាមុយរបស់ពេទ្យ ទៅបុកយាយតាជិះម៉ូតូឆ្លងថ្នល់ ស្លាប់ទាំងពីនាក់ប្តីប្រពន្ធទៀតនេះ គ្រោះលើគ្រោះ ត្រូវហៅរថយន្តមកផ្ទេរ ជនរងគ្រោះធ្វើឲ្យសិស្ស កាន់តែមានសភាពធ្ងន់ធ្ងរថែមទៀត៕ដោយ៖ វ៉ៃកូ