ខេត្តកំពត៖ កម្លាំងនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកំពត បានអះអាងថា បានបន្តសកម្មភាពការងារចុះស្រាវជ្រាវ និងកំណត់មុខសញ្ញាបទល្មើសគ្រឿងញៀន ចាប់ពីទីប្រជុំជន រហូតដល់ភូមិ-ឃុំ ទទួលលទ្ធផលវិជ្ជមានជាបន្តបន្ទាប់ ក្រោយពេលទទួលបានព័ត៌មាន នៃបទល្មើសនេះ ពីប្រជាពលរដ្ឋ និងអាជ្ញាធរមូលដ្ឋាន។
តាមរបាយការណ៍ របស់ ការិយាល័យប្រឆាំងគ្រឿងញៀន នៃស្នងការនគរបាលខេត្តកំពត បានឲ្យដឹងថា កាលពីរសៀលថ្ងៃទី១២ ខែមករា ឆ្នាំ២០១៨ បានចុះបង្ក្រាបករណីចែកចាយ និងប្រើប្រាស់សារធាតុញៀន បាន ១ករណី ស្ថិតនៅភូមិទ្វីខាងជើង សង្កាត់អណ្តូងខ្មែរ ក្រុងកំពត។
យុទ្ធនាការចុះស្រាវជ្រាវ និងបង្ក្រាបបទល្មើសគ្រឿងញៀននេះ កម្លាំងជំនាញ បានឃាត់ខ្លួនជនសង្ស័យចំនួន ៣នាក់ និងថ្នាំម្សៅសថ្លាគ្រាម ចំនួន ៤កញ្ចប់តូច។
ជនសង្ស័យទាំង ៣នាក់ មានឈ្មោះ ម៉ិល តូ ភេទប្រុស អាយុ ២១ឆ្នាំ រស់នៅភូមិកំពង់បាយខាងជើង សង្កាត់កំពង់បាយ ក្រុង-ខេត្តកំពត។ ឈ្មោះ ពល ពន្លឺ ភេទប្រុស អាយុ១៦ឆ្នាំ រស់នៅភូមព្រៃឃុំ ឃុំព្រៃឃុំ ស្រុកទឹកឈូ ខេត្តកំពត និងឈ្មោះ ម៉ម វិបុល ភេទប្រុស អាយុ ២៧ឆ្នាំ រស់នៅភូមិព្រៃត្នោត ឃុំកំពង់ឃុំកំពង់គ្រែង ស្រុកទឹកឈូ ខេត្តកំពត។ ជនសង្ស័យទាំង ៣នាក់ ខាងលើ ជាប់ចោទពីបទសង្ស័យប្រព្រឹត្ត បទល្មើសជួញដូរ និងប្រើប្រាស់សារធាតុញៀន។
ចំណែក នៅថ្ងៃទី១៣ ខែមករា ឆ្នាំ២០១៨ កម្លាំងអធិការដ្ឋាននគរបាលក្រុងកំពត បានសហការជាមួយកម្លាំងព្រហ្មទណ្ឌ ខេត្តកំពត បានចុះបង្ក្រាបមុខសញ្ញាចែកចាយ និងជួញដូរគ្រឿងញៀនបាន ១ករណីទៀត នៅចំណុចរង្វង់មូលធូរ៉េន ស្ថិតក្នុងភូមិក្រាំង សង្កាត់ក្រាំងអំពិលក្រុង-ខេត្តកំពត។
យុទ្ធនាការនេះ សមត្ថកិច្ច បានឃាត់ខ្លួនជនសង្ស័យចំនួន ១នាក់ ឈ្មោះ លឹម សៅលិញ ភេទប្រុស អាយុ ២៨ឆ្នាំ រស់នៅភូមិក្រាំង សង្កាត់ក្រាំងអំពិល ក្រុង-ខេត្តកំពត។ នាឱកាសនោះ សមត្ថកិច្ច បានចាប់យកវត្ថុតាងមួយចំនួនរួមមាន៖ ជញ្ជីងសំរាប់ថ្លឹងថ្នាំញៀន ១គ្រឿង និងឧបករណ៍សំរាប់ជក់ថ្នាំញៀនមួយចំនួនទៀត។ជនសង្ស័យរូបនេះ ត្រូវសមត្ថកិច្ចសង្ស័យបានប្រព្រឹត្ត បទល្មើសជួញដូរ និងប្រើប្រាស់សារធាតុញៀន។
កម្លាំងនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកំពត បានឲ្យដឹងថា បច្ចុប្បន្នជនសង្ស័យទាំង ៤នាក់ និងវត្ថុតាង បានបញ្ជូនមកស្នងការដ្ឋាននគរបាលខេត្តកំពត ដើម្បីកសាងសំណុំរឿង បញ្ជូនទៅកាន់សាលាដំបូងខេត្តកំពត បន្តនីតិវិធីច្បាប់។
មន្ត្រីឃ្លាំមើលសង្គមប្រចាំខេត្តកំពត ថ្លែងស្វាគមន៍ចំពោះចំណាត់ការ និងសកម្មភាពចុះស្រាវជ្រាវចាប់មុខសញ្ញាជួញដូរ ចែកចាយ និងប្រើប្រាស់គ្រឿងញៀន នាមូលដ្ឋាននេះ និងទទួលបានលទ្ធផលវិជ្ជមាន ដោយចាប់ឃាត់ខ្លួនជនសង្ស និងវត្ថុតាមបានមួយចំនួនបញ្ជូនទៅកាន់សាលាដំបូងខេត្តកំពត ចាត់ការតាមនីតិវិធីច្បាប់ជាបន្តបន្ទាប់មកនេះ។
ទន្ទឹមគ្នានេះ ក្រុមអង្គការសង្គស៊ីវិលមួយចំនួន ក៏ស្នើដល់កម្លាំងនគរបាលប្រឆាំងបទល្មើសគ្រឿងញៀន ឲ្យបន្តសកម្មភាពចុះដល់មូលដ្ឋាន ដែលមានសកម្មភាពចែកចាយគ្រឿងញៀន ឲ្យបានច្រើនថែមទៀត ព្រោះបទល្មើសនេះ បានរីករាលដាលដល់មូលដ្ឋានតាមឃុំសង្កាត់និងភូមិដាច់ស្រយាលពីទីប្រជុំជន មានសកម្មភាពគួរឲ្យព្រួយបារម្ភបំផុតនាពេលបច្ចុប្បន្ននេះ។
បញ្ហានេះ ទាំងមន្ត្រីសង្គមស៊ីវិល និងអាណាព្យាបាល រស់នៅខេត្តកំពត ព្រួយបារម្ភថា បទល្មើសគ្រឿងញៀននេះ បើសមត្ថកិច្ចមិនបង្កើតសកម្មភាពចុះបង្ក្រាបឲ្យបានជាប្រចាំថ្ងៃទេ បទល្មើសនេះនឹងអាចរីករាលដាល កាន់តែធ្ងន់ធ្ងរនាថ្ងៃអនាគត។ ពិសេសជាងនេះ អាចនឹងប៉ះពាល់ដល់ការសិក្សា របស់យុវជន ដែលជាសរសរទ្រូងក្នុងការងារអភិវឌ្ឍប្រទេសជាតិជាមិនខាន។ ក្នុងនោះ ក៏អាចបង្កើតឲ្យមានបទល្មើសផ្សេងៗរួមមាន៖ បទល្មើសហិង្សាវាយកាប់ចាក់ ចោរកម្ម លួច ឆក់ ប្លន់ និងបទល្មើសរំលោភផ្លូវភេទជាដើម នឹងអាចកើតមានកាន់តែច្រើនថែមទៀត ដែលអាចនាំឲ្យបាត់បង់សណ្តាប់ធ្នាប់សង្គមនាថ្ងៃអនាគត៕ សុគន្ធ
