ភ្នំពេញ៖ នៅក្នុងជំនួបរយៈពេលជាង៣០នាទី រវាងលោកស្រី ម៉ែន សំអន ជាមួយនឹងឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានបង្ហាញពីទស្សនវិស័យដូចគ្នា ទៅនឹងការចង់បាននូវសន្តិភាព ស្ថិរភាពនយោបាយ ការរីកចម្រើនលើវិស័យសេដ្ឋកិច្ច ការអភិវឌ្ឍ និងការពង្រឹងកិច្ចសហប្រតិបត្តិការ ឲ្យកាន់តែរឹងមាំថែមទៀតរវាងកម្ពុជា និងសហរដ្ឋអាមេរិក ដោយប្រកាន់ខ្ជាប់នូវលទ្ធិប្រជាធិបតេយ្យ សេរី ពហុបក្ស ។
លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានប្រាប់ លោក ប្រាទ្រិក ម៉ឺហ្វ៊ី ( W.Patrick Murphy ) ឯកអគ្គរដ្ឋទូតសហរដ្ឋអាមេរិកប្រចាំកម្ពុជាថា រាជរដ្ឋាភិបាលកម្ពុជា មិនដែលភ្លេចពីកិច្ចសហប្រតិបត្តិការដ៏ល្អ និងជាយូរអង្វែងមកហើយ ជាមួយសហរដ្ឋអាមេរិកនោះឡើយ ក្នុងនោះរាជរាដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន តែងតែណែនាំដល់គ្រប់ស្ថាប័ន ទាំងនៅថ្នាក់ជាតិ និងនៅក្រោមជាតិ ត្រូវពង្រឹងពង្រីកកិច្ចសហប្រតិបត្តិការនេះ ឲ្យកាន់តែល្អប្រសើរទ្វេរឡើង ដោយឈរលើបាវចនា កែទម្រង់ខាងក្នុង បង្កើនមិត្តខាងក្រៅ ឈរលើស្មារតីឯករាជ្យជាតិ ។
លោកស្រីម៉ែន សំអន បានបញ្ជាក់បែបនេះ ពេលជួបពិភាក្សាការងារជាមួយឯកអគ្គរដ្ឋទូតអាមេរិកប្រចាំកម្ពុជា នៅព្រឹកថ្ងៃទី២៣ ខែមករា ឆ្នាំ២០២០ នៅទីស្តីការក្រសួង ។
លោក W.Patrick Murphy បានថ្លែងថា ស្ថានទូត និងក្រសួងការបរទេសកម្ពុជា បានត្រៀមរៀបចំទិវារំលឹកខួប៧០ឆ្នាំ នៃថ្ងៃទំនាក់ទំនងការទូតកម្ពុជា-អាមេរិក ដោយនឹងធ្វើតាមខែនីមួយៗរហូតដល់ខែធ្នូឆ្នាំ២០២០ ក្នុងនោះមានវិស័យជាច្រើន ដែលត្រូវធ្វើទៅតាមប្រធានបទ នៃរដូវកាលរបស់កម្ពុជា រួមមានដូចជា វិស័យអប់រំ កសិកម្ម បរិស្ថាន សុខាភិបាល និងការលើកកម្ពស់សិទ្ធិនិងតួនាទីរបស់នារី ។ល។
លោកស្រី ម៉ែន សំអន បានឯកភាព និងគាំទ្រចំពោះផែនការ នៃទិវារំលឹកខួបលើកទី៧០ឆ្នាំ នៃទំនាក់ទំនងកម្ពុជា-អាមេរិក ក្នុងនោះលោកស្រី ឧបនាយករដ្ឋមន្ត្រី បានរំលឹកពីគុណតម្លៃ នៃទំនាក់ទំនងនេះ ដែលបានបម្រើឲ្យគ្នាទៅវិញទៅមកលើគ្រប់វិស័យ តែទោះ ជាយ៉ាងណាកម្ពុជា មិនភ្លេចទេ ចំពោះការជួយជ្រោមជ្រែងរបស់សហរដ្ឋអាមេរិក ដល់កម្ពុជាតាំងពីដើមរៀងមក ពិសេសការជួយរក្សាស្ថិរភាព សន្តិភាព និងសន្តិសុខ សណ្តាប់ធ្នាប់ដែលជាស្នូលនាំមកនូវការអភិវឌ្ឍ និងរីកចម្រើនជាបន្តបន្ទាប់ ដែលផ្ទុយពីការបំផ្លើសពីមជ្ឈដ្ឋានខាងក្រៅ ដើម្បីកេងយកចំណេញផលប្រយោជន៍នយោបាយ ។
លោកស្រីឧបនាយករដ្ឋមន្ត្រី បានរំលឹកពីទំនាក់ទំនងរវាងសម្តេចតេជោ ហ៊ុន សែន និងលោកប្រធានាធិបតី ដូណាល់ត្រាំ កន្លងមក ហើយនៅខែមីនា ខាងមុខ សម្តេចតេជោនាយករដ្ឋមន្ត្រី នៃកម្ពុជា នឹងអញ្ជើញទៅសហរដ្ឋអាមេរិក ដើម្បីចូលរួមក្នុងសន្និសីទកំពូលអាស៊ាន អាមេរិក ។
ទាក់ទងនឹងរឿងនេះ ឯកអគ្គរដ្ឋទូត បានស្វាគមន៍ នឹងរង់ចាំចូលរួមកិច្ចសហការល្អ ជាមួយវត្តមានរបស់សម្តេចតេជោ នាយករដ្ឋមន្ត្រីនៃកម្ពុជា ទៅកាន់សហរដ្ឋអាមេរិកផងដែរ ។
ក្នុងឱកាសនេះដែរ លោកស្រី ម៉ែន សំអន បានជម្រាបជូនពីតួនាទីរបស់ក្រសួង ដែលកំពុងធ្វើជាសេនាធិការឲ្យរាជរដ្ឋាភិបាល លើវិស័យទំនាក់ទំនងជាមួយរដ្ឋសភា ព្រឹទ្ធសភា ការផ្សព្វផ្សាយច្បាប់ តាមដានការអនុវត្តច្បាប់ ការធ្វើអធិការកិច្ចលើគ្រប់វិស័យ ទទួលពាក្យបណ្តឹង និងដោះស្រាយបណ្តឹងបរិហារកេរ និងបណ្តឹងតវាទប់ស្កាត់ និងប្រឆាំងអំពើពុករលួយ និងការរំលោភដោយអ្នកមានអំណាច មកលើប្រជាពលរដ្ឋ ដែលជាគោដៅចម្បងរបស់រាជរដ្ឋាភិបាលកម្ពុជា ក្នុងការអនុវត្តអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណ ៕ ដោយ៖បញ្ញាស័ក្តិ