ភ្នំពេញ៖ ជំងឺផ្តាសាយបក្សី H5N1 ករណីថ្មីទៀត បានកើតមាននៅក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ តែត្រូវបានទប់ស្កាត់ទាន់ពេលវេលាមិនបង្កគ្រោះថ្នាក់ដល់សុខភាពរបស់ប្រជាពលរដ្ឋនោះឡើយ។
កាលពីថ្ងៃទី០៩ ខែមករា ឆ្នាំ២០១៨កន្លងទៅនេះ វិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វនៃអគ្គនាយកដ្ឋានសុខភាពសត្វ និងផលិតកម្មសត្វ បានធ្វើវិភាគរកឃើញមេរោគផ្តាសាយបក្សីលើសំណាកសត្វមាន់ចំនួន៣ក្បាល នៅក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។បើទោះបីជាយ៉ាងណាជំងឺផ្តាសាយនេះត្រូវបានទប់ស្កាត់ទាន់ពេលវេលាមិនមានការរីករាលដាល ឬបង្កការប៉ះពាល់ដល់ប្រជាពលរដ្ឋនោះឡើយ។លោករដ្ឋមន្ត្រីក្រសួងកសិកម្មរុក្ខាប្រម៉ាញ់និងនេសាទបានបញ្ជាក់នៅថ្ងៃទី១៣ ខែមករា ឆ្នាំ២០១៨នេះថា ក្រសួងតាមទប់ស្កាត់បានទាន់ពេលវេលា ហើយប្រជាពលរដ្ឋឥឡូវមានការយល់ដឹងច្រើនចំពោះផលប៉ះពាល់នៃជំងឺផ្តាសាយនេះ ដូច្នេះមិនមានបង្កផលធ្ងន់ធ្ងរនោះទេ យើងបានទប់ស្កាត់អស់ហើយ។
គួរបញ្ជាក់ថា៖ កាលពីចុងឆ្នាំ២០១៧កន្លងទៅនេះ ក៏មានផ្ទុះករណីជំងឺផ្តាសាយបក្សីនៅក្នុងខេត្តកំពង់ចាម និងខេត្តកំពង់ធំផងដែរ តែត្រូវបានទប់ស្កាត់ទាន់ពេលវេលា ហើយមិនមានបង្កជាបញ្ហាធ្ងន់ធ្ងរសម្រាប់សុខភាពរបស់ប្រជាពលរដ្ឋនោះឡើយ៕ ដោយ៖បញ្ញាស័ក្តិ
