ស្ទឹងត្រែង៖ រថយន្តមួយគ្រឿង បើកបុកម៉ូតូមួគ្រឿង ពេញទំហឹង បណ្តាលឲ្យមន្ត្រីយោធាម្នាក់ បម្រើការនៅវរៈព្រំដែនកម្ពុជា-ឡាវ និងកូនប្រុសស្លាប់ភ្លាមៗ នៅនឹងកន្លែង ។ គ្រោះថ្នាក់ចរាចរណ៍បានកើតឡើង នៅវេលាល្ងាចថ្ងៃទី២៤ ខែមករា ឆ្នាំ២០២០ ស្ថិតនៅត្រង់ចំណុចខាងលើផ្ទះ១០០ខ្នង តាមបណ្តោយផ្លូវជាតិ ៧A ស្ថិតនៅក្នុងភូមិគីឡូ៨ សង្កាត់សាមគ្គី ក្រុងស្ទឹងត្រែង។
ជនរងគ្រោះទាំងពីរនាក់ មានឈ្មោះ មាន ចំប៉ា អាយុ២៨ឆ្នាំ ជាឪពុក និង កូនមានឈ្មោះ វាន វីរៈ អាយុ៣ឆ្នាំ សព្វថ្ងៃរស់នៅ ភូមិស្ដៅឃុំស្ដៅ ស្រុកសេសាន ខេត្តស្ទឹងត្រែង បានមកលេងផ្ទះឪពុកនៅភូមិហាងខូបាន សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង ខណៈពេលជិះម៉ូតូត្រឡប់ទៅផ្ទះវិញ ស្រាប់តែត្រូវរថយន្តជិះបញ្ច្រាសទិសគ្នា បុកបណ្តាលឱ្យស្លាប់ ភ្លាមនៅកន្លែងកើតហេតុតែម្តង។ រីឯរថយន្តបង្ក ម៉ាកនីសាន់ ពណ៌ក្រហម ពាក់ផ្លាកលេខ ភ្នំពេញ 2AD 0463 និងម៉ូតូម៉ាកហុងដាឌ្រីមសង់ ពាក់ផ្លាកលេខ ស្ទឹងត្រែង 1C 1281 ពណ៌ខ្មៅ ត្រូវនគរបាលចរាចរណ៍ជើងគោក យកទៅរក្សាទុក ដើម្បីចាត់វិធានការតាមច្បាប់។
ជនរងគ្រោះបានធ្វើដំណើរតាមម៉ូតូមួយគ្រឿង ពីរនាក់ឪពុកនិងកូន ក្នុងបំណងជូនកូនយកទៅឲ្យប្រពន្ធនៅឃុំស្ដៅ ស្រុកសេសាន រួចខ្លួនត្រូវទៅបន្ទាយយោធាសឹករងស្រុកបុរីអូរស្វាយសែនជ័យវិញ តែជាអកុសល ត្រូវជួបគ្រោះថ្នាក់ចរាចរណ៍ រថយន្តបុកស្លាប់តែម្តង៕ដោយ៖បញ្ញាស័ក្តិ