តាកែវ៖ ថ្លែងក្នុងអង្គសន្និបាតមន្ទីរអប់រំយុវជន និងកីឡាខេត្តតាកែវ កាលពីចុងសប្តាហ៍នេះ លោក មូល វិចិត្រ អភិបាលរងខេត្តតាកែវ បានជំរុញឲ្យលោកគ្រូ អ្នកគ្រូ គួរមានកម្មវិធីចុះកម្មសិក្សានូវក្រៅស្រុក ឬនៅតាមគោលដៅសាលារៀនគំរូ ដើម្បីធ្វើការស្វែងយល់លើកិច្ចការងារដឹកនាំ និងការអភិវឌ្ឍរបស់អង្គភាពគេ យកមកអនុវត្តលើអង្គភាពរបស់ខ្លួន ឲ្យមានការកែប្រែ និងល្អជាងមុន ពីព្រោះការអភិវឌ្ឍន៍ និងភាពជឿនលឿននៅក្រៅស្រុក គឺមានការអភិវឌ្ឍខ្លាំង ដច្នេះយើងមិនអាចនូវដដែលបាននោះទេ។
លោកអភិបាលរងខេត្តបានលើកឡើងយ៉ាងដូច្នេះថា ប្រទេសជាតិដែលខ្លាំង គឺ ជាប្រទេសដែលសម្បូរទៅដោយធនធានមនុស្សពូកែ ដូច្នេះដើម្បីឲ្យប្រទេសយើងខ្លាំងដូចប្រទេសជាច្រើនផ្សេងទៀត នៅលើសាកលលោក លោកគ្រូអ្នកគ្រូ ត្រូវតែយកចិត្តទុកដាក់ខ្ពស់ខិតខំស្រាវជ្រាវ សិក្សាបន្ថែម រួចយកមកបង្ហាត់បង្រៀនដល់កូនសិស្សជំនាន់ក្រោយ ដែលជាទំពាំងស្នងឫស្សី និងជាអ្នកបន្តវេនលើកិច្ចការងារមួយចំនួន ដើម្បីជួយដល់សង្គមជាតិរបស់យើងនាថ្ងៃអនាគត ឲ្យកាន់តែមានភាពរីកចម្រើន ។
ចុងបញ្ចប់នៃកម្មវិធីបិទអង្គសន្និបាត របស់មន្ទីរអប់រំយុវជននិងកីឡាខេត្តតាកែវ ក៏មានផ្តល់ទង់ជ័យលាភី ដល់សាលាគោលដៅនៅទូរទាំងខេត្ត និងណែនាំឲ្យសាលាដែលមិនទាន់ធ្វើបានល្អ ខិតខំប្រឹងប្រែងឡើងបន្ថែមទៀត ទទួលបានកិត្តិយសសម្រាប់សាលារបស់ខ្លួន ៕ដោយ៖ តាកែវ
