បន្ទាយមានជ័យ៖ នៅព្រឹកថ្ងៃទី២៧ខែមករានេះ នៅច្រកអន្តរជាតិប៉ោយប៉ែត ខេត្តបន្ទាយមានជ័យ បានចែកម៉ាសដោយឥតគិតថ្លៃ( Free) ១លានម៉ាសដល់ប្រជាជន ។ នៅច្រកព្រំដែនប៉ោយប៉ែត មន្រ្តីជំនាញពាក់ព័ន្ធកំពុងចែកម៉ាសដល់ប្រជាជន១លានម៉ាស ដើម្បីពាក់ការពារជំងឺផ្លូវដង្ហើម Corona ដែលកំពុងរាតត្បាតខ្លាំងនៅប្រទេសចិន និងថៃនៅពាសពេញពិភពលោក។
ជំងឺផ្លូវដង្ហើមដ៏កាចសាហាវនេះ បានសម្លាប់ប្រជាជនចិនអស់៨០នាក់ហើយ គិតត្រឹមព្រឹកថ្ងៃទី២៧ខែមករាឆ្នាំ២០២០នេះ។ ខណៈដែលប្រទេសថៃ ជាប្រទេសឈរនៅលេខ២ មានអ្នកផ្ទុកមេរោគនេះ ចំនួន៨ករណី។ ដើម្បីជាវិធានការទប់ស្កាត់ការឆ្លងមេរោគនេះឱ្យបាន នៅច្រកព្រំដែនប៉ោយប៉ែត បានធ្វើការចែកម៉ាស់ រហូតដល់១លានម៉ាស ហើយមានរយៈពេល១ខែ សម្រាប់ប្រជាជនប្រើប្រាស់។
អង្គភាពនគរបាលច្រកទ្វារព្រំដែនអន្តរជាតិប៉ោយប៉ែត ចាប់ផ្តើមចែកម៉ាសក្នុងរយៈពេល១ខែ ដោយគិតចាប់ពីថ្ងៃចន្ទ ទី២៧ ខែមករា ឆ្នាំ២០២០នេះតទៅ។ ម៉ាសចំនួន១លានម៉ាស ចែកជូនមន្រ្តីនគរបាលច្រកទ្វារ និងភ្ញៀវជាតិ-អន្តរជាតិ ដើម្បីការពារការចម្លងមេរោគថ្មី ដែលបង្កឡើងពីកូរ៉ូណាវីរុស។
លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលច្រកទ្វារអន្តរជាតិប៉ោយប៉ែត និងមន្រ្តីក្រោមឱវាទទាំងអស់ បានចែកម៉ាស់ដល់ពលរដ្ឋដែលឆ្លងកាត់ច្រកព្រំដែន។ អំណោយម៉ាសទាំងអស់ បានមកពីជំនួយរបស់សប្បុរសជននានា និងចែកដល់អ្នករត់ម៉ូតូឌុប កម្មករ អាជីវករ ភ្ញៀវជាតិ អន្តរជាតិ ចេញចូល ច្រកទ្វារអន្តរជាតិប៉ោយប៉ែត៕ដោយ៖បញ្ញាស័ក្តិ
