ប្រទេសចិននឹងធ្វើការពន្យារបុណ្យចូលឆ្នាំរបស់ខ្លួនរហូតដល់ថ្ងៃទី ២ ខែកុម្ភៈ ដែលវិធានការនេះគឺជាការព្យាយាម និងកាត់បន្ថយការរីករាលដាលនៃវីរុសផ្លូវដង្ហើមដ៏កាចសាហាវ (Coronasvirus) ដែលសម្លាប់មនុស្សជាច្រើននាក់ និងរាលដាលទូទាំងពិភពលោក។
តួលេខចុងក្រោយបានបង្ហាញថា អ្នកស្លាប់ដោយសារវីរុសកូរ៉ូណានេះ បានកើនឡើងដល់ចំនួន ៨០នាក់ ខណៈអ្នកឆ្លងមានចំនួន ២.៧៦១នាក់នៅក្នុងប្រទេសចិន។
បុណ្យចូលឆ្នាំប្រពៃណីចិននឹងត្រូវបញ្ចប់នៅថ្ងៃព្រហស្បតិ៍សប្តាហ៍នេះ។ មនុស្សរាប់រយលាននាក់បានធ្វើដំណើរទូទាំងប្រទេសចិន ដើម្បីទៅជួបជុំគ្រួសាររបស់ពួកគេ។
សូមបញ្ជាក់ថា វីរុសដ៏អាថ៌កំបាំង និងកាចសាហាវនេះ បានផ្ទុះឡើងដំបូងនៅក្នុងទីក្រុងវូហាន (Wuhan) នៃខេត្ត ហូបុី (Hubei) និងបានរីករាលដាលទៅដល់ប្រទេស និងតំបន់ចំនួន ១៣ទូទាំងពិភពលោក។
ថៃ ជាប្រទេសទី ២ដែលមានអ្នកឆ្លងវីរុសនេះច្រើនបំផុត គឺមានរហូតដល់ ៨ករណី ប៉ុន្តែមិនទាន់មានករណីស្លាប់នៅឡើយទេ ខណៈដែលនេប៉ាល់ មាន ១ករណី។
ប្រទេសដទៃទៀត ដែលមានឆ្លងវីរុសនេះមានដូចជា ម៉ាកាវ អូស្ត្រាលី ជប៉ុន ម៉ាឡេស៊ី សិង្ហបុរី បារាំង កូរ៉េខាងត្បូង តៃវ៉ាន់ អាមេរិច វៀតណាម៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
