ប្រទេសហ្វីលីពីន នៅថ្ងៃអង្គារនេះបានប្រកាសឈប់ចេញទិដ្ឋការឲ្យប្រជាជនចិន ក្នុងគោលបំណងការពារកុំឲ្យវីរុសកូរ៉ូណា រីករាលដាលចូលក្នុងប្រទេសរបស់ខ្លួន។
រហូតមកដល់ពេលនេះ វីរុសដ៏កាចសាហាវនោះបានសម្លាប់មនុស្សជាង ១០០នាក់ និងចម្លងដល់មនុស្សជាង ៤.៥០០នាក់នៅក្នុងប្រទេសចិន ចាប់តាំងពីវាផ្ទុះកាលពីខែធ្នូ កន្លងមក។
មិនទាន់មានករណីឆ្លងវីរុសផ្លូវដង្ហើមថ្មីនេះ នៅក្នុងប្រទេសហ្វីលីពីនឡើយ ចាប់តាំងពីវាបានផ្ទុះឡើងនៅទីក្រុងវូហាន ប៉ុន្តែវីរុសនេះបានរីករាលដាលទៅដល់ប្រទេសមួយចំនួន ដូចជា ជប៉ុន កម្ពុជា ស្រីលង្កា សិង្ហបុរី កូរ៉េខាងត្បូង តៃវ៉ាន់ ថៃ អាមេរិច កាណាដា និងនេប៉ាល់ជាដើម។
“ពួកយើងចាត់វិធានការទាំងនោះ ដើម្បីបន្ថយការធ្វើដំណើរ និងជួយការពារកុំឲ្យមានការចម្លងវីរុសនេះ”។ នេះជាការបញ្ជាក់របស់លោក Jaime Morente ស្នងការការិយាល័យរបស់ហ្វីលីពីននៅក្នុងសេចក្តីប្រកាស។
សូមបញ្ជាក់ថា ការផ្ទុះវីរុសដ៏អាថ៌កំបាំងនេះ បង្ហោះឲ្យមានការព្រួយបារម្ភយ៉ាងខ្លាំង ខណៈដែលវាអាចចម្លងពីមនុស្សទៅកាន់មនុស្សបានយ៉ាងលឿន។
អង្គការសុខភាពពិភពលោក បាននិយាយកាលពីថ្ងៃចន្ទម្សិលមិញថា គេនៅមិនទាន់ច្បាស់នៅឡើយទេថា តើវីរុសនោះអាចឆ្លងទៅកាន់អ្នកផ្សេងឬយ៉ាងណាទេ មុនពេលវាចេញរោគសញ្ញា។
អាជ្ញាធរចិនធ្លាប់បញ្ជាក់ថា វីរុសនេះអាចឆ្លងទៅកាន់មនុស្សផ្សេងបាន មុនពេលវាបង្ហាញរោគសញ្ញា។
ភ្ញៀវទេសចរចិនស្មើនឹង ២២ភាគរយ នៃចំនួនភ្ញៀវទេសចរសរុបចំនួន ៧,៥លាននាក់ ដែលបានធ្វើដំណើរទៅកាន់ប្រទេសហ្វីលីពីនចន្លោះខែមករា និងខែវិច្ឆិកាកាលពីឆ្នាំមុន ដែលធ្វើឲ្យទេសចរចិនជាប់ចំណាត់ថ្នាក់លេខ ២ ដែលបានមកហ្វីលីពីន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
