ភ្នំពេញៈ ជនសង្ស័យម្នាក់បានជិះម៉ូតូស្មាសវីមួយគ្រឿង ប្រដាប់ដោយកាំភ្លើងខ្លីមួយដើមដេញភ្ជង់ប្លន់យកម៉ូតូឌ្រីមសង់ស៊េរី ២០២០ ពីនារីម្នាក់ កំពុងជិះចេញពីទិញម្ហូបបានសម្រេច ហើយគេចខ្លួនបាត់ កាលពីវេលាម៉ោង ១១ ព្រឹកថ្ងៃទី២៨ ខែមករា ឆ្នាំ២០២០ ស្ថិតនៅផ្លូវ៣៧១ ស្រកចូលបូរីជឹបម៉ុង សង្កាត់ចាក់អង្រែលើ ខណ្ឌមានជ័យ ។
សមត្ថកិច្ចបានឲ្យដឹងថា នារីជាម្ចាស់ម៉ូតូមានឈ្មោះ លាក់ ភេទស្រី អាយុជាង២០ ឆ្នាំ មុខរបរកម្មករសំណង់ ស្នាក់នៅក្នុងការដ្ឋានបូរី ជឹប ម៉ុង សង្កាត់ចាក់អង្រែលើ ខណ្ឌមានជ័យ ។
បើតាមសម្តីស្ត្រីជាម្តាយតរបស់នារីរងគ្រោះ បាននិយាយរៀបរាប់ថា មុនកើតហេតុកូនស្រីរបស់គាត់ បានជិះម៉ូតូមួយគ្រឿងម៉ាក ឌ្រឹមសង់ ស៊េរី២០២០ ពណ៌ខ្មៅ ពាក់ផផ្លាកលេខ ភ្នំពេញ 1AB 7254 ទៅទិញម្ហូបនៅផ្លូវ៣៧១ សង្កាត់បឹងទំពន់ ហើយបានជិះម៉ូតូត្រឡប់មកវិញ ដល់ចំណុចស្រកចូលបូរីជឹបម៉ុង ក៏មានជនសង្ស័យម្នាក់ជិះម៉ូតូស្មាស់ពណ៌ខ្មៅ គ្មានផ្លាកលេខមួយគ្រឿង នឹងប្រដាប់ដោយកាំភ្លើងខ្លីមួយដើម ដេញភ្ជង់ប្លន់យកម៉ូតូពីកូនស្រីគាត់ជិះគេចខ្លួនបាត់ស្រមោល ដោយបន្សល់ទុកម៉ូតូស្មាស់មួយគ្រឿងនៅកន្លែងកើតហេតុ។
ក្រោយកើតហេតុកម្លាំងនគរបាលប៉ុស្តិ៍ចាក់អង្រែលើ បានចុះដល់ទីតាំងកើតហេតុ និងបាននាំនារីជាម្ចាស់ម៉ូតូ មកសួរនាំនឹងដាក់ពាក្យបណ្តឹង ដើម្បីងាយស្រួលឲ្យសមត្ថកិច្ចធ្វើការស្រាវជ្រាវ តាមចាប់ជនសង្ស័យយកមក ផ្តន្ទាទោសតាមផ្លូវច្បាប់៕ដោយ៖បញ្ញាស័ក្តិ