ខេត្តព្រះសីហនុ៖ មន្ត្រីរដ្ឋបាលខេត្តព្រះសីហនុ បានឲ្យដឹងថា គិតត្រឹមព្រលប់ថ្ងៃទី២៨ ខែមករា ឆ្នាំ២០២០នេះ គឺមិនមានអ្នកឆ្លងវីរុសរលាកសួតថ្មី”កូរ៉ូណា” ត្រូវបានមន្ត្រីជំនាញរកឃើញទៀតទេ ពោលគឺមានតែអ្នកជំងឺម្នាក់ ដែលបានរកឃើញ កាលពីថ្ងៃទី២៧ ខែមករា តែប៉ុណ្ណោះ។
រដ្ឋបាលខេត្តព្រះសីហនុ បានបដិសេធថា មូលដ្ឋាននេះ មិនទាន់រកឃើញមានអ្នកឆ្លងជំងឺ”កូរ៉ូណា” កើតឡើងទៀត ដូចការបំផុសព័ត៌មានចចាមអារាមមួយចំនួន ដែលបានចែកចាយ នៅតាមបណ្តាញសង្គមនោះទេ។
ទាក់ទិនការរកឃើញមានអ្នកឆ្លងវីរុស “កូរ៉ូណា”នេះដែរ គេសង្កេតឃើញថា ស្ថានភាពទូទៅនៅក្នុងក្រុងព្រះសីហនុ នៅថ្ងៃទី២៨ ខែមករា ឆ្នាំ២០២០នេះ ហាក់មានសភាពស្ងាត់ជាងថ្ងៃធម្មតា ហើយប្រជាពលរដ្ឋគ្រប់ៗរូប បាននាំគ្នាជជែកតែពីរឿងវីរុស”កូរ៉ូណា” គ្រប់ៗគ្នា ទាំងនៅកន្លែងធ្វើការរដ្ឋ, ឯកជន, តាមទីផ្សារ, អាហារដ្ឋាន និងតាមតុកាហ្វេជាដើម។
ទោះជាបែបនេះក្តី ថ្នាក់ដឹកនាំក្រសួងសុខាភិបាល ក៏ដូចជាមន្ត្រីជំនាញស្ថាប័នពាក់ព័ន្ធ នៃរដ្ឋបាលខេត្តព្រះសីហនុ ក៏បានចុះផ្សព្វផ្សាយអប់រំ ដល់សាធារណជន ជាពិសេសប្រជាពលរដ្ឋ រស់នៅក្នុងក្រុងព្រះសីហនុ ឲ្យមានការប្រុងប្រយ័ត្នពីរបៀបការពារការចម្លងរោគ ឬវីរុស”កូរ៉ូណា” តាមរយៈការពាក់ម៉ាស់ និងការលាងសម្អាតដៃជាមួយនឹងសាប៊ូ ឬទឹកថ្នាំជាដើម។
យ៉ាងណាក៏ដោយចុះ អាជ្ញាធររដ្ឋបាលខេត្តព្រះសីហនុ មិនមានប្រកាសបិទសាលារៀន ទីផ្សារ ឬការធ្វើពាណិជ្ជកម្មផ្សេងៗនោះទេ ដោយរក្សានៅមានដំណើរការជាធម្មតា។
យ៉ាងណាក្តី គេសង្កេតឃើញថា មានសាលារៀនមួយចំនួន នៅក្នុងក្រុងព្រះសីហនុ មិនមានសិស្សមករៀន ហើយទីកន្លែងលក់ដូរសម្ភារៈផ្សេងម និងអាហារដ្ឋានខ្លះ បានបិទទ្វារមិនដំណើរការនោះទេ បន្ទាប់ពី ក្រសួងសុខាភិបាលកម្ពុជា បានប្រកាសរកឃើញមានជនជាតិចិនម្នាក់ បានឆ្លងវីរុស”កូរ៉ូណា” នៅខេត្តព្រះសីហនុ កាលពីថ្ងៃទី២៧ ខែមករា ឆ្នាំ២០២០។
ដោយឡែក ចំពោះបុរសជនជាតិចិនម្នាក់ ដែលឆ្លងវីរុស”កូរ៉ូណា” ត្រូវបានក្រុមគ្រូពេទ្យ នៃមន្ទីរពេទ្យបង្អែកខេត្តព្រះសីហនុ បានរៀបចំបន្ទប់សម្រាកព្យាបាល ឲ្យនៅដាច់ដោយឡែកពូអ្នកជំងឺដ៏ទៃទៀត ព្រមទាំងដាក់ឲ្យគ្រូពេទ្យជំនាញ ឲ្យរង់ចាំតាមដានការវិវត្តន៍ សុខភាព របស់អ្នកជំងឺជាប្រចាំ ដោយយកចិត្តទុកដាក់។
ទោះជាយ៉ាងនេះក្តី ដោយសារតែមានការព្រួយបារម្ភ នៅថ្ងៃទី២៨ ខែមករានេះ ក៏មានអាណាព្យាបាល ក៏ដូចជាប្រជាពលរដ្ឋ នៅតាមក្រុមគ្រួសារមួយចំនួន បានផ្អាកមិននាំយកឲ្យកូនចៅទៅសាលារៀននោះទេ។ ជាងនេះទៀត ក៏ឃើញមានប្រជាពលរដ្ឋខ្លះទៀត បានផ្អាកការធ្វើដំណើរទេសចរណ៍ របស់ខ្លួន ដោយមុនចាកចេញពីផ្ទះជាដើម ដោយព្រួយបារម្ភពីបញ្ហាសុខភាព ឬខ្លាចឆ្លងវីរុសកូរ៉ូណា ។
ជាងនេះទៀត ក៏ឃើញមានទីកន្លែងលក់ដូរ ឬហាងលក់ចំណីអាហារហូបចុកខ្លះ ក្នុងក្រុងព្រះសីហនុ បានបិទទ្វារផ្អាកបើកបម្រើសេវាជាបណ្តោះអាសន្នផងដែរ។ ជាពិសេសជាងនេះ ក៏កត់សម្គាល់ឃើញថា មានមនុស្សម្នាទាំងក្មេងចាស់គ្រប់ៗរូប បានប្រើប្រាស់ម៉ាស់ សម្រាប់ពាក់ការពារទប់ស្កាត់ការឆ្លងវីរុស”កូរ៉ូណា” ដែលមានប្រភពមកពីប្រទេសចិននេះគ្រប់ៗគ្នា៕ ដោយ៖ ដែន សីមា